ဂျန်ဇက် (NSS) - ဇွန် ၁၇

မြန်မာ အိမ်အကူအမျိုးသမီး Piang Ngaih Don ကို သေဆုံးအောင်  ညှင်းပန်းနှိပ်စက်သတ်ခဲ့သူအဖြစ် စွပ်စွဲခံရသော အိန္ဒိယအမျိုးသမီးက မြန်မာအမျိုးသမီးကိုညှင်းပန်းနှိပ်စက်မှုများကို ဖုံးကွယ်ထားနိုင်ရန်အတွက် အိမ်၌တပ်ဆင်ထားသော (CCTV) ကင်မရာများကို ဖွက်ထားခဲ့ကြောင်း ဝန်ခံပြောဆိုလိုက်သည်။

အသက် ၆၄ နှစ်အရွယ်ရှိ အိန္ဒိယအမျိုးသမီးကြီး Prema S. Naraynasamy က မြန်မာအိမ်အကူအမျိုးသမီးကို နှိပ်စက်မှုများနှင့်ပတ်သက်ပြီး သက်သေများမရရှိစေရန်အတွက်တပ်ဆင်ထားသော (CCTV) ကင်မရာများကို သားမက်ဖြစ်သူ သကီဗင်ချီဗန်နှင့်အတူ ဖွက်ထားခဲ့ကြောင်း ပြောသည်။ အဆိုပါအိန္ဒိယ အမျိုးသမီးကြီးအပြင် သားမက်ဖြစ်သူတို့သည် မြန်မာအိမ်အကူအမျိုးသမီးကို သေဆုံးအောင် ညှင်းပန်းနှိပ်စက်မှုဖြင့် စွဲချက်မျိုးစုံတင်ခံထားရပြီး စင်ကာပူတရားရုံးတွင် စစ်ဆေးနေဆဲဖြစ်ကြောင်းသိရသည်။ မြန်မာအိမ်အကူအမျိုးသမီးသည် စင်ကာပူနိုင်ငံရှိ ကီဗင်ချီဗန်၏အိမ်တွင် အိမ်အကူအဖြစ် ၂ဝ၁၅ ခုနှစ် မေလ ၂၈ ရက်တွင်စတင်လုပ်ကိုင်ခဲ့ပြီး အလုပ်စတင်လုပ်ချိန်က မြန်မာအမျိုးသမီး၏ ခန္ဒာကိုယ်အလေးချိန်သည် ၃၉ ကီလိုဂရမ်ရှိခဲ့ကြောင်း၊ သေဆုံးချိန်တွင် ခန္ဒာကိုယ်အလေးချိန်များစွာ ကျဆင်းသွားခဲ့ပြီး အလေးချိန် ၂၄ ကီလိုဂရမ်သာရှိခဲ့ကြောင်း သိရသည်။

မြန်မာအမျိုးသမီးသည် အိမ်ရှင်များ၏ ညှင်းပန်းနှိပ်စက်ခံရမှုများကြောင့် ၂ဝ၁၆ ခုနှစ် ဇူလိုင်လ ၂၆ ရက်တွင် သေဆုံးခဲ့ကြောင်းသိရသည်။ အသက် ၂၄ နှစ်အရွယ်ရှိ မြန်မာအိမ်အကူအမျိုးသမီးသည် အစာအငတ်ခံရသလို အိမ်ရှင်များ၏ ညှင်းပန်းရိုက်နှက်မှုများကြောင့် ရရှိထားသော ဒဏ်ရာများကို ဆေးဝါးကုသခွင့်မရဘဲရှိခဲ့ကြောင်း သိရသည်။ မြန်မာအိမ်အကူအမျိုးသမီးသည် အိန္ဒိယအမျိုးသမီးကြီးအပြင် သမီးဖြစ်သူ Gaiyathiri Murugayan နှင့်ကီဗင်ချီဗန်တို့၏ ညှင်းပန်းနှိပ်စက်မှု မျိုးစုံတွေ့ကြုံခံစားခဲ့ရကြောင်း စင်ကာပူအစိုးရရှေ့နေများက ပြောသည်။ အိန္ဒိယအမျိုးသမီးကြီးသည် မြန်မာအိမ်အကူအမျိုးသမီးကို သေဆုံးအောင် ညှင်းပန်းနှိပ်စက်မှုများကြောင့် စွဲချက် ၄၇ ခုအတင်ခံခဲ့ရပြီး ၂ဝ၂၃ ခုနှစ် ဇန်နဝါရီလတွင် ထောင်ဒဏ် ၁၄ နှစ် ပြစ်ဒဏ်ချမှတ်ခံခဲ့ရကြောင်းသိရသည်။ 

စင်ကာပူအစိုးရရှေ့နေများသည် အိန္ဒိယအမျိုးသမီးကို မြန်မာအမျိုးသမီးသေဆုံးမှုနှင့်ပတ်သက်ပြီး လူသတ်မှုဖြင့် ကနဦးစွဲချက်တင်ခဲ့သော်လည်း နောက်ပိုင်းတွင်လူသတ်မှုစွဲချက်ကို ပယ်ဖျက်ပေးခဲ့ကြောင်းသိရသည်။ စင်ကာပူတရားရုံးသည် မြန်မာအိမ်အကူအမျိုးသမီးသေဆုံးမှုနှင့်ပတ်သက်ပြီး အိန္ဒိယအမျိုးသမီးကြီးအပေါ် စွဲဆိုထားသော ကျန်စွဲချက်များကို ထပ်မံစစ်ဆေးနေဆဲဖြစ်ကြောင်းသိရသည်။အိန္ဒိယအမျိုးသမီး၏သမီးဖြစ်သူ Gaiyathiri Murugayan သည်မြန်မာအိမ်အကူအမျိုးသမီးကို သေဆုံးအောင်ညှင်းပန်းနှိပ်စက်မှုများနှင့်ပတ်သက်ပြီး ၂ဝ၂၁ ခုနှစ် ဇွန်လ ၂၂ ရက်တွင်ထောင်ဒဏ် နှစ်ပေါင်း ၃ဝ အမိန့်ချမှတ်ခံခဲ့ရကြောင်း စင်ကာပူတရားရုံးက သတင်းထုတ်ပြန်ထားသည်။