မျိုးကြီး (NSS) - ဇွန် ၁၄

ရှမ်းပြည်နယ်တောင်ပိုင်း၊ လဲချားမြို့နယ်အတွင်းရှိ ရှမ်းပြည်တိုးတက်ရေးပါတီ (SSPP/SSA)၏ တပ်စခန်း(၁ဝ)ခုအား ဆုတ်ခွာပေးရန် တပ်မတော်ဘက်က တောင်းဆိုထားကြောင်း သတင်းရရှိသည်။

၎င်း တပ်စခန်း(၁ဝ)ခုအား ဆုတ်ပေးရန်အတွက် တပ်မတော်ဘက်က ယခုလ ဇွန်လ ၉ ရက်နှင့် ဇွန်လ ၁၁ ရက်တို့တွင် (၂) ကြိမ်တိတိသတိပေးကာ တောင်းဆိုထားခြင်းဖြစ်ကြောင်း SSPP/SSA ဘက်က အသိပေးထုတ်ပြန်ထားသည်။

SSPP/SSA ၏ တပ်စခန်း(၁ဝ)ခုသည် လဲချားမြို့နယ်၊ လဲချား-ပန်လုံလမ်းမကြီး၏ တောင်ဘက်အရပ်တွင် တည်ရှိကြောင်း သိရသည်။

အဆိုပါတပ်စခန်းများသည် SSPP/SSA ဌာနချုပ်၏ လုံခြုံရေးအတွက် အဓိကကျသည့် နေရာများဖြစ်ခြင်းကြောင့် တပ်စခန်းများကို ဆုတ်ခွာပေးနိုင်ခြင်းမရှိကြောင်းလည်း ပြန်လည်အသိပေးထုတ်ပြန်ထားသည်ကို တွေ့ရှိရသည်။

တပ်မတော်က ဆုတ်ခွာပေးရန် တောင်းဆိုထားသည့် တပ်စခန်းများကို SSPP/SSA ဘက်က ဆုတ်ခွာပေးခြင်းမရှိသည့်အတွက် စစ်အင်အားရာနှင့်ချီကာ တပ်မတော်က ဖြည့်တင်းထားကြောင်းနှင့် နှစ်ဖက်အ ကြား စစ်ရေးတင်းမာနေသည့်အခြေအနေရှိကြောင်း SSPP/SSA ဘက်က ဆိုထားသည်။

အထက်ပါအခြေအနေများနှင့်ပတ်သက်၍ နစက သတင်းထုတ်ပြန်ရေးအဖွဲ့ဘက်က တစ်စုံတစ်ရာထုတ် ဖော်ပြောဆိုခြင်းမျိုး မတွေ့ရသေးပေ။

ရှမ်းပြည်တိုးတက်ရေးပါတီ(SSPP/SSA)သည် လက်ရှိ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် ဖိတ်ခေါ်ခဲ့သည့် ငြိမ်းချမ်းရေးဆွေးနွေးပွဲသို့ တက်ရောက်ဆွေးနွေးထားသည့် လက်နက်ကိုင်အဖွဲ့အစည်းတစ်ခုလည်း ဖြစ်သည်။

ထို့ပြင် နစက၏ NSPNC နှင့် SSPP/SSA တို့ကြားတွင်လည်း ငြိမ်းချမ်းရေးတွေ့ဆုံဆွေးနွေးမှုများ ရှိထားသည်။