Pika (NSS) - ဩဂုတ် ၂၉

Nokia ဖုန်းများကို ထုတ်လုပ်သည့် HMD Global ကုမ္ပဏီသည် အရုပ်ထုတ်လုပ်သည့်ကုမ္ပဏီ Mattel နှင့်ပူးပေါင်းကာ ပန်းရောင်ခေါက်ဖုန်းဖြစ်သည့် HMD Barbie ဖုန်းကို မိတ်ဆက်ခဲ့ကြောင်းသိရသည်။

အဆိုပါဖုန်းသည် အမေရိကန်ဒေါ်လာ(၁၇၁)ဒေါ်လာတန်ဖိုးရှိပြီး ဩဂုတ်လ(၂၈)ရက်နေ့မှစတင်ကာ ဝယ်ယူနိုင်ပြီဖြစ်ကြောင်းသိရသည်။အဆိုပါပန်းရောင်ခေါက်ဖုန်းသည် ဖုန်းခေါ်ဆိုခြင်းနှင့် စာတိုပေးပို့ခြင်းများကို လုပ်ဆောင်နိုင်မည်ဖြစ်သော်လည်း ဆိုရှယ်မီဒီယာအပ်ပ်များကို အသုံးပြုနိုင်မည်မဟုတ်ကြောင်းလည်း သိရသည်။ ထို့ပြင် ယင်းခေါက်ဖုန်းတွင် လျှို့ဝှက်ထားသော ဒီဇိုင်းများလည်းပါဝင်ကြောင်း HMD Global ကုမ္ပဏီကပြောကြားခဲ့သည်။ 

ပန်းရောင်ခေါက်ဖုန်းကိုမိတ်ဆက်မှုသည် ယခုနှစ်အတွင်း ဘာဘီအရုပ်၏ (၆၅)နှစ်ပြည့်မွေးနေ့နှင့်တိုက်ဆိုင်ပြီး ဩစတြေးလျရုပ်ရှင်သရုပ်ဆောင်မာဂေါ့ရော်ဘီသရုပ်ဆောင်ထားကာ ရုံတင်ဝင်ငွေအမေရိကန်ဒေါ်လာ(၁ ဒသမ ၄)ဘီလျံထိရရှိခဲ့သော ဘာဘီဇာတ်ကားထွက်ရှိခဲ့ပြီးနောက် တစ်နှစ်အကြာတွင် ယခုကဲ့သို့ဖန်တီးခဲ့ခြင်းဖြစ်ကြောင်း သိရသည်။ သုတေသနကုမ္ပဏီ CCS Insight မှ ခွဲခြမ်းစိတ်ဖြာသူ ဘန်ဝုဒ်က'ပျော်စရာတစ်ခုအနေနဲ့ ဒီဖုန်းကိုဝယ်ယူဖို့ လူအနည်းစုကိုသွေးဆောင်နိုင်လိမ့်မယ်လို့ ကျွန်တော်ထင်ပါတယ်။ ဒါပေမဲ့ လက်တွေ့မှာတော့ လူတိုင်းကသူတို့ရဲ့ စမတ်ဖုန်းကိုပဲ အသုံးပြုနေတာကြောင့် အများကြီးမျှော်လင့်ထားလို့တော့မရပါဘူး' ဟုပြောဆိုခဲ့သည်။

ထို့ပြင် HMD Global ကုမ္ပဏီသည် ဗြိတိန်တွင် ဘာဘီဖုန်းအလုံးရေ(၄)သိန်းကျော် ရောင်းချနိုင်လိမ့်မည်ဟု ခန့်မှန်းထားကြောင်း CCS Insight ကုမ္ပဏီကပြောကြားခဲ့သည်။