ALynn (NSS) - ဩဂုတ် ၂၈

အစ္စရေးနှင့် ပါလက်စတိုင်း စစ်သွေးကြွအဖွဲ့ ဟားမတ်စ်တို့ကြား စစ်ပွဲဖြစ်ပွားပြီးကတည်းက လက်ဘနွန်ပြည်သူ့စစ်၊ ဟဇ်ဘိုလာအဖွဲ့သည် ဟားမတ်စ်အဖွဲ့နှင့် အတူတကွရပ်တည်ကြောင်း ထုတ်ဖော်ပြောဆိုခဲ့သည်။ 

အစ္စရေးမြောက်ပိုင်းသို့ ဒုံးကျည်များ၊ ဒုံးပျံများနှင့် ပေါက်ကွဲစေတတ်သော ဒရုန်းများကို နေ့စဉ်နီးပါးပစ်ခတ်ခဲ့ပြီး အစ္စရေးက ၎င်းတို့၏ ပစ်ခတ်မှုများကို တုံ့ပြန်ခဲ့သည်။ ဩဂုတ်လနှောင်းပိုင်းမှစ၍ တိုက်ပွဲများ ပြင်းထန်လာကာ အလုံးစုံစစ်ပွဲကို ဦးတည်နိုင်သည့် အန္တရာယ်ဖြစ်ခဲ့သည်။ သို့သော် အစ္စရေးနှင့် ဟစ်ဇ်ဘိုလာတို့ နှစ်ဦးစလုံးသည် အလုံးစုံပဋိပက္ခကို ရှောင်ရှားဖို့အတွက် ကြိုးပမ်းနေကြဆဲဖြစ်သည်။ 

အီရန်သည် ဟစ်ဇ်ဘိုလာအား ရန်ပုံငွေ၊ လေ့ကျင့်ရေး၊ လက်နက်နှင့် ဖောက်ခွဲရေး ပစ္စည်းများအပြင် နိုင်ငံရေး၊ သံတမန်ရေး၊ ငွေကြေးနှင့် အဖွဲ့အစည်းဆိုင်ရာ အကူအညီအများစုကို ထောက်ပံ့ပေးနေကြောင်း အမေရိကန်နိုင်ငံခြားရေးဌာနက ဆိုသည်။ အဆိုပါအဖွဲ့သည် “မှောင်ခိုကုန်ကူးမှု၊ နိုင်ငံကူးလက်မှတ်အတုပြုလုပ်မှု၊ မူးယစ်ဆေးဝါးရောင်းဝယ်မှု၊ ငွေကြေးခဝါချမှု၊ အကြွေးဝယ်ကတ်၊ လူဝင်မှုကြီးကြပ်ရေးနှင့် ဘဏ်လိမ်လည်မှု” အပါအဝင် တရားဝင် နှင့် တရားမဝင် လမ်းကြောင်းများမှ ရန်ပုံငွေရရှိနေကြောင်း နိုင်ငံခြားရေးဌာနက ပြောကြားခဲ့သည်။ ဟစ်ဇ်ဘိုလာသည် ၎င်း၏ အထောက်အပံ့အားလုံးကို အီရန်မှလာသည်ဟု ယခင်ကပြောကြားခဲ့ပြီး မူးယစ်ဆေးဝါး ရောင်းဝယ်ဖောက်ကားမှုတွင် ပါဝင်ပတ်သက်မှု မရှိကြောင်း အကြိမ်ကြိမ် ငြင်းဆိုခဲ့သည်။

ဟစ်ဇ်ဘိုလာသည် အရှေ့အလယ်ပိုင်း၏ အင်အားအကြီးဆုံး ပြည်သူ့စစ်ဖြစ်လာပြီး အီရန်၏ အရေးအကြီးဆုံး မဟာမိတ်ဖြစ်လာကာ ၎င်း၏ ခေါင်း ဆောင်များသည် ယီမင်ရှိ ဟူသီသူပုန်များ ပါဝင်သော မဟာမိတ်စစ်သွေးကြွအဖွဲ့များ ကွန်ရက်ကို ဆက်လက်ထိန်းသိမ်းထားရန် ကူညီပေးလျက်ရှိသည်။ ဟစ်ဇ်ဘိုလာက တိုက်ခိုက်ရေးသမား ၁၀၀,၀၀၀ ရှိကြောင်း၊ အစ္စရေး စစ်တပ်၏ ခန့်မှန်းချက်အရ ၎င်းတွင် အမြဲတမ်းတပ်သား ၂၀,၀၀၀ မှ ၂၅,၀၀၀ နှင့် သောင်းနှင့်ချီသော အရန်တပ်ဖွဲ့ဝင်များရှိသည်။

အစ္စရေးစစ်လေယာဉ်များသည် လက်ဘနွန်တောင်ပိုင်းကို သြဂုတ် ၂၅ ရက်က အကြီးစားတိုက်ခိုက်ခဲ့ရာ ဟဇ်ဘိုလာဒုံးကျည်ပစ်လွှတ်မှု ထောင်ပေါင်းများစွာကို ဖယ်ရှားနိုင်ခဲ့သည်။ အစ္စရေးတာဝန်ရှိသူများက အဆိုပါ စစ်ဆင်ရေးကို ကြိုတင်ကာကွယ်မှုဟု ခေါ်ဆိုခဲ့သည်။ ဇူလိုင်လတွင် ဘေရွတ်မြို့၌ လေကြောင်းတိုက်ခိုက်မှုတစ်ခုအတွင်း အစ္စရေးတပ်မှူး Fuad Shukr သေဆုံးခဲ့ခြင်းအတွက် လက်တုံ့ပြန်ရန် ဟစ်ဇ်ဘိုလာမှ သိသိသာသာ တိုက်ခိုက်မှုတစ်ခု ပြုလုပ်တော့မည်ဟူသော ထောက်လှမ်းရေးသတင်းအချက်အလက်များအပေါ် အခြေခံ၍ ထိုကဲ့သို့ စစ်ဆင်ရေး ဆင်နွှဲခဲ့ကြောင်း ပြောကြားခဲ့သည်။

သြဂုတ် ၂၅ ရက်က တိုက်ခိုက်မှုများကြောင့် အစ္စရေးနှင့် ဟစ်ဇ်ဘိုလာတို့ကြား အလုံးစုံစစ်ပွဲ ဖြစ်ပွားမည်ကို စိုးရိမ်မှုများ မြင့်တက်လာခဲ့သော်လည်း နေ့လယ်ပိုင်းတွင် နှစ်ဖက်စလုံးက ၎င်းတို့၏ ပုံမှန်အတိုင်း အကန့်အသတ်ဖြင့် အပြန်အလှန် ပစ်ခတ်မှုများကို ပြန်လည် စတင်ခဲ့သည်။