ALynn (NSS) - ဩဂုတ် ၂၈

လွန်ခဲ့သော နှစ်နှစ်ခန့်က အစီရင်ခံစာပါ ရှင်ကျန်းရှိ လူသားမျိုးနွယ်အပေါ် ကျူးလွန်သည့် ရာဇ၀တ်မှုများကို ကိုးကားပြီး တရုတ်နိုင်ငံတွင် “သံသယဖြစ်ဖွယ်မူဝါဒများ” ဆက်လက်ရှိနေသေးကြောင်း ကုလသမဂ္ဂလူ့အခွင့် အရေးရုံးက အင်္ဂါနေ့ (ဩဂုတ်လ ၂၇ ရက်)တွင် ပြောကြားခဲ့သည်။ 

အနောက်မြောက်ပိုင်း ရှင်ကျန်းဒေသရှိ ဝီဂါ (၁) သန်းကျော်နှင့် အခြား မွတ်ဆလင် လူနည်းစုများကို ဖမ်းဆီးထိန်းသိမ်းထားကြောင်း တရုတ်နိုင်ငံက စွပ်စွဲခံထားရပြီး စွဲချက်တင်မှုကို ပေကျင်းက ပြင်းပြင်းထန်ထန် ပယ်ချလိုက်သည်။ ကုလသမဂ္ဂ လူ့အခွင့်အရေးအကြီးအကဲ Volker Turk သည် ယခုနှစ် မေလ ၂၆ ရက်မှ ဇွန်လ ၁ ရက်နေ့အထိ ပေကျင်းသို့ အဖွဲ့တစ်ဖွဲ့စေလွှတ်ရန် လမ်းခင်းပေးခဲ့သည်။ ၂၀၂၃ ခုနှစ် ဖေဖော်ဝါရီလကတည်းက ဂျီနီဗာတွင် တရုတ်အရာရှိများနှင့် ဆွေးနွေးမှုများ ဆက်တိုက် ပြုလုပ်ခဲ့ကြောင်း လူ့အခွင့်အရေးရုံး (OHCHR) မှ အင်္ဂါနေ့ (ဩဂုတ်လ ၂၇ ရက်) တွင် ထုတ်ပြန်ခဲ့သည်။ အဆိုပါအဖွဲ့သည် တရုတ်အာဏာပိုင်များနှင့်အတူ အကြမ်းဖက်မှု တန်ပြန်ရေးမူဝါဒများနှင့် ရာဇ၀တ်မှုဆိုင်ရာ တရားစီရင်ရေးစနစ်တို့ကို အလေးပေး ဆွေးနွေးခဲ့ကြောင်း OHCHR မှ ပြောရေးဆိုခွင့်ရှိသူ Ravina Shamdasani က သတင်းထောက်များအား ပြောကြားခဲ့သည်။

OHCHR အဖွဲ့မှ တရုတ်အာဏာပိုင်များအား “အမျိုးသားလုံခြုံရေးနှင့် အကြမ်းဖက်မှု နှိမ်နင်းရေးဆိုင်ရာ ဥပဒေလိုအပ်ချက်များကို အပြည့်အဝပြန်လည်သုံးသပ်ရန်၊ လူနည်းစုများကို ခွဲခြားဆက်ဆံခြင်းမှ ကာကွယ်ရန်” တောင်းဆိုခဲ့သည်။ ထို့ပြင် တရုတ်နိုင်ငံတွင် လူ့အခွင့်အရေး ကာကွယ်မှုအပေါ် ထင်သာမြင်သာရှိသောတိုးတက်မှုများအပြင် ညှဉ်းပန်းနှိပ်စက်မှုများ ပါဝင်သော ချိုးဖောက်မှုများကို စုံစမ်းစစ်ဆေးမှုများပြုလုပ်ရန် တောင်းဆိုခဲ့သည်။

၂၀၂၂ ခုနှစ် သြဂုတ်လ ၃၁ ရက်နေ့တွင် အစီရင်ခံစာတစ်ခု၌ ရှင်ကျန်းတွင် ဖြစ်နိုင်ချေရှိသော "လူသားမျိုးနွယ်အပေါ် ကျူးလွန်သည့် ရာဇ၀တ်မှု" ကို ဖော်ပြထားသည်။ အဆိုပါအစီရင်ခံစာကို တရုတ်နိုင်ငံက ပြတ်ပြတ်သားသား ပယ်ချခဲ့ပြီး အစီရင်ခံစာတွင် နှိပ်စက်ညှဉ်းပန်းမှု၊ အတင်းအကြပ် ဆေးကုသမှုခံယူမှုနှင့် လိင်ပိုင်းဆိုင်ရာ သို့မဟုတ် ကျားမရေးရာ အကြမ်းဖက်မှုများအပြင် အဓမ္မလုပ်အားပေးခိုင်းစေမှုဆိုင်ရာ အသေးစိတ် အထောက်အထားများကို ဖော်ပြထားသည်။

တရုတ်နိုင်ငံသည် နှိပ်စက်ညှင်းပန်းမှုဆိုင်ရာ စွပ်စွဲချက်များကို ငြင်းဆိုထားပြီး အစွန်းရောက် ဝါဒကို တိုက်ဖျက်ရန်နှင့် ဖွံ့ဖြိုးတိုးတက်မှုကို မြှင့်တင်ပေးရန်ရည်ရွယ်၍ ရှင်ကျန်းတွင် အသက်မွေးဝမ်းကျောင်း လေ့ကျင့်ရေးစင်တာများ ဖွင့်လှစ်ထားကြောင်း အခိုင်အမာ ပြောကြားခဲ့သည်။