ယွန်း (NSS) - ဩဂုတ် ၂ဝ

    တက္ကသိုလ်ဝင်ခွင့်လျှောက်လွှာများကို ဩဂုတ်(၂၆)ရက်မှစတင် လျှောက် ထားနိုင်ပြီး လားရှိုးတက္ကသိုလ်အပါအဝင် တက္ကသိုလ်(၃)ခုကို ဖွင့်လှစ်နိုင်ခြင်းမရှိကြောင်း ပညာရေးဝန်ကြီးဌာန၏ ထုတ်ပြန်ချက်အရသိရကာ ထိုသို့ဖွင့်လှစ်နိုင်ခြင်းမရှိသေး သည့်အတွက် ကျောင်းသား၊ ကျောင်းသူများစွာ နစ်နာနေရကြောင်း NSS က မေးမြန်းထားသည့် အချက်အလက်များအရ သိရသည်။

အကြမ်းဖက်သမားများက ကျောင်းတက်နေသော ကျောင်းသား၊ ကျောင်းသူများ ဆရာ၊ ဆရာမများကို အသက်ဘေးခြိမ်းခြောက်မှုများ ပြုလုပ်ခဲ့ကြသည့်အပြင် ဖမ်းဆီးခြင်း၊ သတ်ဖြတ်ခြင်းများ ပြုလုပ်ခဲ့သောကြောင့် ပညာရေးကဏ္ဍအတွက် ထိခိုက်ခြင်း သာမက လူ့စွမ်းအားအရင်းအမြစ် ပြုန်းတီးခြင်းလည်း ဖြစ်ပေါ်ခဲ့သည်။

ပညာရေးဝန်ကြီးဌာနက ဩဂုတ်(၁၅)ရက် ထုတ်ပြန်ချက်အရ ပြီးခဲ့သည့် ၂၀၂၃ ခုနှစ်တွင် တက္ကသိုလ်ပေါင်း(၂၆)ခုတွင် လျှောက်ထားခွင့်ပြုခဲ့ သော်လည်း ယခုပညာသင်နှစ်၌ လားရှိုးတက္ကသိုလ် အပါအဝင် လွိုင်ကော်တက္ကသိုလ်နှင့် တောင်ကုတ် တက္ကသိုလ်တို့မှာ ဝန်ကြီးဌာန၏ ထုတ်ပြန်ချက်တွင် ပါဝင်ခြင်းမရှိကြောင်းတွေ့မြင်ရသည်။

တက္ကသိုလ်ဝင်ခွင့်လျှောက်ထားနိုင်ရန်အတွက် မိမိတို့ဖြေဆိုခဲ့သည့် စာစစ်ဌာနကြီးကြပ်ရေး မှူးများထံတွင် အမှတ်စာရင်း၊ အရည်အချင်းမှတ် တမ်းချုပ်ရမှတ်အဆင့်၊ တက္ကသိုလ်ဝင်ခွင့်လမ်းညွှန်စာအုပ်နှင့် တက္ကသိုလ်ဝင်ခွင့်လျှောက်ထားရမည့် ပုံစံစာအိတ်ကို ဩဂုတ်လ(၂၆)ရက်မှစ၍ ထုတ်ယူနိုင်ကြောင်း ထုတ်ပြန်ချက်တွင် ဖော်ပြထားသည်။

             အဆိုပါတက္ကသိုလ်ဝင်ခွင့် လျှောက်လွှာစာအိတ်ကို တက္ကသိုလ်ပေါင်း(၂၃)ခု၌ ဩဂုတ်လ(၂၆) ရက်မှ စက်တင်ဘာလ (၁၂)ရက်အထိ စနေ၊ တနင်္ဂနွေ ရုံးပိတ်ရက်များအပါအဝင် ပိတ်ရက်မရှိ လက်ခံသွားမည်ဖြစ်ကြောင်း ပညာရေးဝန်ကြီးဌာနက ဆိုထားသည်။

"တောင်ကုတ်ကို(ဆရာ၊ ဆရာမတွေ)ကျ တော့ ရန်ကုန်အနောက်ပိုင်းတက္ကသိုလ်တို့ ဘာတို့ ကို ပေါင်းတယ်။ လွိုင်ကော်ကကျတော့ တက္ကသိုလ် သုံးခုလားမသိဘူးပေါင်းတယ်။ လားရှိုးကတောင်ကြီး မှာပေါင်းတယ်။ မြင်းခြံဆိုရင် မန္တလေးကို လာပေါင်း တယ်။ မြင်းခြံလည်းပိတ်လိုက်တယ်ကြားတယ် Official ပိတ်တာတော့မဟုတ်ဘူး။ ဒါပေမဲ့ မြင်းခြံက ဆရာ၊ ဆရာမတွေကိုတော့ မန္တလေးကိုလာတွဲ တာတော့ နောက်ဆုံးသိလိုက်တယ်။ တချို့ကျတော့ ကျောင်းကဖွင့်ပေမယ့် အတန်းတွေမရှိဘူး။ စစ်တွေ ဆိုလည်း အတန်းမရှိဘူး၊ ပိတ်တော့မပိတ်ဘူး။ တရား ဝင်ကတော့ လားရှိုးရယ်၊ တောင်ကုတ်ရယ်၊ လွိုင် ကော်ရယ်ပေါ့"ဟု တက္ကသိုလ်ကထိက တစ်ဦးက NSS ကို ပြောသည်။

သတ်မှတ်ရက်ကျော်လွန်ပြီး လျှောက်ထားသူများသည် အဆင့်မြင့် ပညာဦးစီးဌာန(ရန်ကုန်ရုံး ခွဲ) သထုံလမ်း၊ ကမာရွတ်မြို့နယ် ရန်ကုန်မြို့သို့ ပေးပို့လျှောက်ထားရန် ထုတ်ပြန်ချက်တွင် ဖော်ပြ ထားသည်။ အဆိုပါတက္ကသိုလ်ဝင်ခွင့်ခေါ်ယူခြင်း သည် သီးခြားဝင်ခွင့်ခေါ်ယူသော တက္ကသိုလ်မှအပ တစ်နိုင်ငံလုံးရှိ တက္ကသိုလ်များအားလုံးအတွက် အကျုံးဝင်ပြီး ကြေညာချက်တွင်ပါရှိသည့် တက္က သိုလ်များအတွက်သာ ဝင်ခွင့်ခေါ်ယူခြင်း မဟုတ် ကြောင်း မြန်မာနိုင်ငံစာစစ်ဦးစီးဌာနက အသိပေးထားသည်။ကြေညာချက်တွင်ပါရှိသည့် တက္ကသိုလ် (၂၃)ခုသည် ဝင်ခွင့်လျှောက်လွှာများကို ပြန်လည် လက်ခံမည့် နေရာဌာနများဖြစ်ကြောင်း စာစစ်ဦးစီးဌာနက ဆိုထားသည်။

၂၀၂၄ ခုနှစ် တက္ကသိုလ်ဝင်စာမေးပွဲကို ပြီးခဲ့သည့် မတ်လ(၁၁)ရက်တွင် ကျင်းပခဲ့ပြီး အောင်စာရင်းကို ဇွန်လ (၁၁)ရက်တွင် ထုတ်ပြန်ခဲ့သည်။ ၂၀၂၃-၂၀၂၄ ပညာသင်နှစ် တက္ကသိုလ် ဝင်စာမေးပွဲ တွင် ဝင်ရောက်ဖြေဆိုသူဦးရေ ၁၂၈,၆၃၅ ဦးရှိခဲ့ပြီး ၇၄,၅၉၂ ဦးအောင်မြင်ခဲ့သည့်အတွက် ၅၇ ဒသမ ၉၀ ရာခိုင်နှုန်း အောင်မြင်ခဲ့ကြောင်း သိရသည်။