NSS - ဩဂုတ် ၁၇

ယခုဘဏ္ဍာနှစ် လေးလတာအတွင်း မြန်မာနိုင်ငံ၏နိုင်ငံခြားရင်းနှီးမြှုပ်နှံမှုပမာဏသည် အမေရိကန်ဒေါ်လာ ၆၆၁ ဒသမ ၆၂၁ သန်းသာ ဝင်ရောက်ခဲ့ကြောင်း မြန်မာနိုင်ငံရင်းနှီးမြှုပ်နှံမှုကော်မရှင်၏ တရားဝင်ထုတ်ပြန်သော အချက်အလက်များအရ သိရသည်။

နိုင်ငံခြားရင်းနှီးမြှုပ်နှံမှုဝင်ရောက်မှုကျဆင်းနေပြီး ယခင်နှစ်ဘဏ္ဍာနှစ်ကဲ့သို့ အခြေအနေကိုရောက်ရှိနိုင်ကြောင်း စီးပွားရေးပညာရှင်တစ်ဦးက သုံးသပ်သည်။ 

“စင်ကာပူကအများဆုံးနဲ့မြန်မာနိုင်ငံမှာလာလုပ်နေတယ်။ မြန်မာပြည်မှာမီးပျက်တဲ့အချက်က နိုင်ငံခြားရင်းနှီးမြှုပ်နှံမှုတွေကျဆင်းသွားစေတယ်။ နောက်ပြီးတရုတ်ရဲ့ရင်းနှီးမြှုပ်နှံမှုတွေကျဆင်းလာတာဟာလဲ နိုင်ငံရေးရောစီးပွားရေးပါသက်ရောက်မှုရှိနေတယ်”ဟု အဆိုပါ စီးပွားရေးပညာရှင်ကဆိုသည်။

၂ဝ၂၁ ခုနှစ် နိုင်ငံရေးအပြောင်းအလဲအပြီး နှစ်နှစ်ခန့်အထိ နိုင်ငံခြားရင်းနှီး မြှုပ်နှံမှု ကျဆင်းခြင်းမရှိခဲ့သော်လည်း နောက်ပိုင်းကာလများတွင် ဆက်တက်ကျဆင်းလာခြင်းဖြစ်သည်။ ၂ဝ၂၁ ခုနှစ် အောက်တိုဘာလမှ ၂ဝ၂၄ ခုနှစ် ဇူလိုင်လအထိ နှစ်နှစ်ကျော်ကာလအတွင်း နိုင်ငံခြားရင်းနှီးမြှုပ်နှံမှု ‌ အမေရိကန်ဒေါ်လာ ၂၉၄၄ သန်းသာ ဝင်ရောက်ခဲ့ခြင်းဖြစ်သည်။ 

“နိုင်ငံရေးအပြောင်းအလဲက နိုင်ငံခြားရင်းနှီးမြှုပ်နှံမှုကို တိုက်ရိုက်သွားထိတယ်။ အရင်အရပ်သားလက်ထက်မှာ သန်းငါးထောင်ဝန်းကျင်အထိရောက်သွားတယ်။ နစကလက်ထက်မှာ ငွေကြေးမူဝါဒတွေ မတည်ငြိမ်တာက အဆိုးဆုံးဖြစ်သွားပြီးတော FDI တွေ မြန်မာပြည်ကိုအဝင်ရပ်သွားတာ”ဟု အမည်မဖော်လိုသူ MIC အရာရှိ အငြိမ်းစားတစ်ဦးက ဆိုသည်။

လက်ရှိတွင်မြန်မာနိုင်ငံ၏နိုင်ငံခြားရင်းနှီးမြှုပ်နှံမှုတွင် စင်ကာပူ၊ တရုတ် နှင့်ထိုင်းနိုင်ငံတို့က အစဉ်အလိုက်အများဆုံး နိုင်ငံများအဖြစ် ရပ်တည်နေပြီး လုပ်ငန်းကဏ္ဍများတွင် စွမ်းအင်၊ သဘာဝဓာတ်ငွေ့ နှင့် ရေနံ ၊ ကုန်ထုတ် လုပ်မှုကဏ္ဍများက အစဉ်အလိုက်အများဆုံးအဖြစ် ရပ်တည်နေသည်။