ALynn (NSS) - ဩဂုတ် ၁၂

ယူကရိန်းတပ်ဖွဲ့ဝင်များသည် Kursk နယ်ခြားဒေသအတွင်းသို့ နက်ရှိုင်းစွာ ထိုးဖောက်ဝင်ရောက်ခဲ့ကြောင်း မော်စကိုက တနင်္ဂနွေနေ့ (သြဂုတ် ၁၁ ရက်)တွင် ဖော်ပြခဲ့ပြီး ရုရှားနိုင်ငံအား မတည်မငြိမ်ဖြစ်စေရန်နှင့် ၎င်း၏ တပ်ဖွဲ့များကို ဖြန့်ကျက်ရန်ရည်ရွယ်၍ ထိုးဖောက်ဝင်ရောက်လာခြင်းဖြစ်သည်ဟု ယူကရိန်းထိပ်တန်းအရာရှိတစ်ဦးက ပြောကြားခဲ့သည်။

တနင်္ဂနွေနေ့နှောင်းပိုင်းတွင် ရုရှားတပ်ဖွဲ့များသိမ်းပိုက်ထားသော ယူကရိန်းတောင်ပိုင်းရှိ Zaporizhzhia နျူကလီးယားစက်ရုံမီးလောင်မှုအတွက် တစ်ဖက်နှင့် တစ်ဖက် အပြစ်တင်နေကြသော်လည်း ကုလသမဂ္ဂနျူကလီး ယားစောင့်ကြည့်ရေးအဖွဲ့က နျူကလီးယားယိုစိမ့်မှု လက္ခဏာမရှိကြောင်း ပြောကြားခဲ့သည်။

မော်စကိုစစ်တပ်သည် အရန်တပ်များ၊ တင့်ကားများ၊ လေကြောင်း၊ အမြောက်များနှင့် ဒရုန်းများဖြင့် အလျင်စလို ပြန်လည်တိုက်ခိုက်ခဲ့သည်။ သို့သော် ယူကရိန်းစစ်တပ်သည် ၎င်း၏ပိုင်နက်နယ်မြေ၏ ကီလိုမီတာ ၃၀ အကွာအဝေးအထိ ထိုးဖောက်ဝင်ရောက်နိုင်ခဲ့ကြောင်း တနင်္ဂနွေနေ့တွင် ဖော်ပြခဲ့သည်။ အနောက် Kursk ဒေသရှိ အခြေအနေများနှင့် ပတ်သက်၍ နေ့စဉ် အစီရင်ခံချက်တွင် ယူကရိန်းတပ်ဖွဲ့များက ကျည်ကာယာဉ်များ အသုံးပြု၍ ရုရှားပိုင်နက်အတွင်းသို့ နက်နက်နဲနဲ ဖြတ်ကျော်ဝင်ရောက်ရန် ကြိုးပမ်းခဲ့ကြောင်း ကာကွယ်ရေးဝန်ကြီးဌာနက ပြောကြားခဲ့သည်။ အဆိုပါတပ်ဖွဲ့ဝင်အချို့သည် ရုရှား-ယူကရိန်းနယ်စပ်မှ ၂၅ ကီလိုမီတာနှင့် ၃၀ ကီလိုမီတာ အကွာရှိ Tolpino နှင့် Obshchy Kolodez ကျေးရွာများအနီးတွင် ရှိနေသည်ဟု ဆိုသည်။ “ရုရှားက နယ်စပ်မှာ ကိယက်ဗ်တပ်ဖွဲ့ဝင် ၁,၀၀၀ တပ်ဖြန့်ထားတယ်ဟု လျှော့ပြောနေပေမယ့် အမှန်တကယ်က ထောင်ပေါင်းများစွာဖြစ်တယ်”လို့ ယူကရိန်းအရာရှိတစ်ဦးက ဆိုသည်။

ယူကရိန်းသမ္မတ ဇီလန်စကီးသည် Zaporizhzhia နျူကလီးယားစက်ရုံရှိ အအေးခံမျှော်စင် မီးလောင်မှုအတွက် ရုရှားကို အပြစ်တင်ခဲ့သလို ရုရှားကလည်း ယင်းမှာ ယူကရိန်း၏ ပစ်ခတ်မှုကြောင့် ဖြစ်သည်ဟု စွပ်စွဲခဲ့သည်။“နျူကလီးယား အန္တရာယ်တော့ မတွေ့ရဘူး”ဟု အဆိုပါ နေရာ၌ ကျွမ်းကျင်သူများက စစ်ဆေးပြီးနောက် နိုင်ငံတကာ အနုမြူစွမ်းအင် အေဂျင်စီမှ ကြေညာချက် ထုတ်ပြန်ခဲ့သည်။ ကီယက်ဗ်နှင့် မော်စကို နှစ်ဖက်စလုံးက ဓာတ်ရောင်ခြည် သင့်မှုအဆင့် မြင့်တက်လာခြင်းမရှိကြောင်း ဖော်ပြခဲ့သည်။

ရုရှားသည် ၂၀၂၂ ခုနှစ် ဖေဖော်ဝါရီလတွင် ယူကရိန်းအား အထူးစစ်ဆင်ရေး ဆင်နွှဲပြီးနောက် အရှေ့ဘက်နှင့် တောင်ဘက်ပိုင်းဒေသများကို သိမ်းပိုက်ကာ ယူကရိန်းမြို့များကို နေ့စဉ် ဒုံးကျည်များ၊ ဒရုန်းများဖြင့် တိုက်ခိုက်မှုများ ပြုလုပ်ခဲ့သည်။ ထို့နောက် ကိယက်ဗ်သည် လူအင်အားနှင့် လက်နက်ထောက်ပံ့မှုများအတွက် ရုန်းကန်နေရပြီး တပ်အချို့ပြန်ဆုတ်သွား ခဲ့ရသည်။

Kursk ဒေသအား ထိုးစစ်ဆင်မှုသည် ယခုအချိန်အထိ ကိယက်ဗ်၏ အကြီးဆုးနှင့် အအောင်မြင်ဆုံး နယ်စပ်ဖြတ်ကျော် ထိုးစစ်ဖြစ်ပြီး ဒုတိယကမ္ဘာစစ်နောက်ပိုင်း ရုရှား ပိုင်နက်အတွင်း ပြည်ပစစ်တပ်များ၏ အထူးခြားဆုံး တိုက်ခိုက်မှုလည်း ဖြစ်သည်။ စနေနေ့က အရပ်သား ၇၆,၀၀၀ ကျော်ကို နယ်စပ်ဒေသများမှ ဘေးလွတ်ရာသို့ ရွှေ့ပြောင်းခဲ့ရပြီး တနင်္ဂနွေနေ့တွင် နောက်ထပ် ရွှေ့ပြောင်းဖို့ရှိကြောင်း ရုရှားနိုင်ငံက ပြောကြားခဲ့သည်။