ALynn (NSS) - ဇွန် ၁၃

အာဂျင်တီးနားနိုင်ငံ၊ အထက်လွှတ်တော်က သမ္မတ Javier Milei ၏ စီးပွားရေး ပြင်ဆင်မွမ်းမံမှုများကို အထောက်အပံ့ဖြစ်စေမည့် ဥပဒေကြမ်းတစ်ခုကို ဆွေးနွေးအတည်ပြုရန် ကြိုးပမ်းနေသည့်အတွက် ဗြူနိုအေးရိစ်မြို့တော်လမ်းမပေါ်တွင် ဆန္ဒပြမှုများပေါ်ပေါက်လာခဲ့သည်။ 

ထောင်နှင့်ချီသော ဆန္ဒပြသူများသည် ဗုဒ္ဓဟူးနေ့ (ဇွန်လ ၁၂ ရက်)တွင် ကွန်ဂရက်စ်အဆောက်အအုံတွင်စုရုံးခဲ့ကြပြီး အဆိုပြုထားသော ခြိုးခြံချွေတာရေးဥပဒေကြမ်းကို ဆန့်ကျင်ကြောင်း ဆန္ဒပြခဲ့ကြသည်။ အဓိကရုဏ်းနှိမ်နင်းရေးရဲများသည် ဦးထုပ်များ၊ နံပါတ်တုတ်များ၊ ပလတ်စတစ်ဒိုင်းများ ကိုင်ဆောင်ကာ လူစုခွဲရန်ရောက်ရှိလာသည်။ ဆန္ဒပြသူများကို မျက်ရည်ယိုဗုံးတွေ၊ ရော်ဘာကျည်ဆန်များ၊ မီးသတ်ပိုက်များ အသုံးပြု၍ နှိမ်နင်းခဲ့သည်။ ဥပဒေပြုရေးကို ဆန့်ကျင်သည့် လူအုပ်ကြီးထဲမှ မျက်လုံးနှင့် အရေပြား မီးလောင်ဒဏ်ရာရရှိသူများကို ကုသရန်အတွက် အနီးနားရှိ ဆေးရုံတစ်ခုသို့ ပြောင်းရွှေ့ခဲ့ရကြောင်း ဒေသတွင်း မီဒီယာများက ဖော်ပြခဲ့သည်။

“အာဂျင်တီးနားဒီမိုကရေစီအတွက် ဝမ်းနည်းစရာနေ့တစ်နေ့”ဟု အတိုက်အခံများကို ကိုယ်စားပြုသည့် Peronist နိုင်ငံရေးပါတီက ဆိုရှယ်မီဒီယာတွင် ဖော်ပြခဲ့ပြီး “ရဲတပ်ဖွဲ့က ကျူးလွန်တဲ့ ဖိနှိပ်မှုတွေကို လုံးဝရှုတ်ချကြောင်း” ကြေညာခဲ့သည်။ တစ်ချိန်တည်းတွင်ပင် Milei ၏အစိုးရသည် နေ့ခင်းဘက်တွင် ဆန္ဒပြသူအချို့အသုံးပြုသည့် အကြမ်းဖက်နည်း ဗျူဟာများကို ထောက်ပြခဲ့သည်။ ကျောက်ခဲများဖြင့် ပစ်ပေါက်ခြင်းနှင့် တုတ်များကို လက်နက်အဖြစ် အသုံးပြုခြင်းစသည့် သတင်းများထွက်ပေါ်လာပြီးနောက် လူ ၁၈ ဦးကို ဖမ်းဆီးထားကြောင်း တာဝန်ရှိသူများက ပြောကြားခဲ့သည်။ 

ထို့ပြင် အသံလွှင့်ဌာနပိုင် Cadena 3 ကားတစ်စီးကိုလည်း မီးရှို့ခဲ့ကြောင်း သိရသည်။ ဗြူနိုအေးရိစ်မြို့ရှိ တရားရေးနှင့်လုံခြုံရေးဝန်ကြီး Waldo Wolff က လူတစ်ဦးကို လက်ပစ်ဗုံးဖြင့် တွေ့ရှိခဲ့ကြောင်း ပြောကြားခဲ့သည်။ ထို့ပြင် ဆန္ဒပြသူများသည် အစိုးရကို ဖြုတ်ချရန်နှင့် ကွန်ဂရက်၏ လုပ်ငန်းစဉ်များကို နှောင့်ယှက်ရန်ကြိုးပမ်းခဲ့သည်ဟု အစိုးရက သုံးသပ်ခဲ့သည်။ Ley de Bases သို့မဟုတ် "အခြေခံဥပဒေ"ဟုခေါ်သော မငြိမ်မသက်မှုများ၏ အဓိက အကြောင်းရင်းဖြစ်သော ဥပဒေမူကြမ်းသည် သမ္မတ Milei ၏ လစ်ဘရယ်ဆန်သော အစီအစဉ်ကို ရှေ့တိုးလုပ်ဆောင်ရန် တွန်းအားပေးနေသည်။ Milei သည် ပြည်သူပိုင်ကုမ္ပဏီများကို ပုဂ္ဂလိကပိုင်ပြုလုပ်ရန် ကြိုးပမ်းခြင်းဖြင့် ၎င်း၏အုပ်ချုပ်ရေးအာဏာကို ကျယ်ပြန့်အောင်ချဲ့ထွင်နေသည်။ အာဂျင်တီးနားတွင် နှစ်စဉ် ငွေကြေးဖောင်းပွမှုနှုန်းသည် ၃၀၀ ရာခိုင်နှုန်းနီးပါး ရှိနေသည်။ စရိတ်စကများ တိုးလာသည်နှင့်အမျှ ဆင်းရဲမွဲတေမှုလည်း တိုးလာသည်။ Milei က ၎င်း၏ ခြိုးခြံ ချွေတာမှု အစီအမံများသည် ငွေကြေးဖောင်းပွမှုနှင့် နိုင်ငံ၏ ကြွေးမြီများကို ထိန်းထားနိုင် လိမ့်မည်ဟု ယူဆသော်လည်း ၎င်း၏ ပြင်းထန်သော ဖြတ်တောက်မှုများသည် အခြေအနေကို ပိုမိုဆိုးရွားစေမည်ဟု ဝေဖန်သူများက ခန့်မှန်းကြသည်။

အတိုက်အခံများ ထိန်းချုပ်ထားသော အထက်လွှတ်တော်တွင် Milei အဆိုပြုထားသော ဥပဒေမူကြမ်းအပေါ် ဆန့်ကျင်မှုများ ပိုမိုမြင့်မားလာမည်ဟု နိုင်ငံရေးလေ့လာသူများက ယုံကြည်ကြ သည်။ Peronist Union သည် အထက်လွှတ်တော်၏ ၇၂ နေရာအနက်မှ ၃၃ နေရာရရှိထားပြီး Milei ၏ La Libertad Avanza ပါတီမှာ ၇ နေရာသာရရှိထားသည်။