ALynn (NSS) - ဇွန် ၁၃

ရုရှား၏ “စစ်ပွဲစီးပွားရေး”နှင့်ဆက်နွှယ်သည်ဟု စွပ်စွဲခံရသည့် နောက်ထပ် လူပုဂ္ဂိုလ် ၃၀၀ နှင့် အဖွဲ့အစည်းများကို ဗုဒ္ဓဟူးနေ့ (ဇွန်လ ၁၂ ရက်)တွင် အမေရိကန်နိုင်ငံခြားရေးနှင့် ဘဏ္ဍာရေးဝန်ကြီးဌာနက ဒဏ်ခတ်ပိတ်ဆို့ခဲ့သည်။ ဘဏ္ဍာရေးဌာန၏အဆိုအရ ယခုအစီအမံများသည် မော်စကိုအား အနောက်နိုင်ငံများ၏ ပိတ်ဆို့အရေးယူမှုမှ ရှောင်လွှဲနိုင်စေသည်ဟု ယူဆသော သံသယရှိသူများနှင့် ကုမ္ပဏီများကို ပစ်မှတ်ထားခြင်းဖြစ်သည်။

ရုရှားနှင့်၎င်း၏နိုင်ငံခြား မိတ်ဖက်များအကြား ကုန်သွယ်မှုမှာ ဒေါ်လာသန်း ၁၀၀ ဖြစ်သည်။ အမေရိကန်၏ ယခုပိတ်ဆို့အရေးယူမှုစာရင်းတွင် တရုတ်၊ ကာဂျစ်စတန်နှင့် တာကီယဲရှိ ကုမ္ပဏီများနှင့် လူပုဂ္ဂိုလ်များသည် ပါဝင်သည်ဟု ဘဏ္ဍာရေးဌာနက ကြေညာထားသည်။ အမေရိကန်နိုင်ငံခြားရေးနှင့် ဘဏ္ဍာရေးဝန်ကြီးဌာနနှစ်ခုသည် ရုရှားရှိ အမေရိကန်နိုင်ငံသား မည်သူ့ကိုမဆို ဒီဇိုင်းဝန်ဆောင်မှုများ၊ အိုင်တီပံ့ပိုးမှုဝန်ဆောင်မှုများ၊ လုပ်ငန်းစီမံခန့်ခွဲမှု ဆော့ဖ်ဝဲ၊ ဒီဇိုင်းနှင့်ထုတ်လုပ်ရေးတို့အတွက် cloud-based ဝန်ဆောင်မှုများထောက်ပံ့ခြင်းမျိုး မပြုကြရန် အမိန့်ထုတ်ပြန်ခဲ့သည်။ 

ဘဏ္ဍာရေးဌာနသည် အုပ်ချုပ်ရေးအမိန့်အမှတ် ၁၄၀၂၄ အရ Sberbank နှင့် VTB အပါအဝင် ရုရှား၏ စစ်ဘက်-စက်မှုလုပ်ငန်းတွင် ပါဝင်ပတ်သက်သူများအားလုံးကို ဒဏ်ခတ်ပိတ်ဆို့မည့် စာရင်းတွင် ထည့်သွင်းရန် ပြန်လည်သတ်မှတ်ထားသည်။ ဆိုလိုသည်မှာ ရုရှားနှင့် “ထင်ရှားသော အရောင်းအ၀ယ်ပြုလုပ်ခြင်း သို့မဟုတ် ကူညီဆောင်ရွက်ပေးခြင်း သို့မဟုတ် ဝန် ဆောင်မှုတစ်ခုခုကို ပံ့ပိုးပေးခြင်း” ဆက်နွှယ်မှုရှိသော ကြားနိုင်ငံများရှိ ဘဏ္ဍာရေးအဖွဲ့အစည်းများသည် ဒဏ်ခတ်ပိတ်ဆို့မှုစာရင်းတွင် ပါဝင်သွားမည်ဖြစ်သည်။  

အမေရိကန်သည် ၂၀၂၂ ခုနှစ်၊ ဖေဖော်ဝါရီလမှစတင်ကာ ရုရှားနှင့် ကုမ္ပဏီပေါင်း ၄,၀၀၀ ကျော်ကို ဒဏ်ခတ်ပိတ်ဆို့ခဲ့သည်။ အမေရိကန်၏ လှုပ်ရှားမှုသည် အီတလီတွင် ကျင်းပသည့် G7 ထိပ်သီးအစည်းအဝေး မတိုင်မီတွင် သိမ်းဆည်းထားသော ရုရှား၏ ပိုင်ဆိုင်မှုများကို နိုင်ငံတော်ပိုင်ဘဏ္ဍာအဖြစ် ကြေညာရန်မျှော်လင့်ထားသည်။ သို့သော်လည်း အမေရိကန်နှင့် ၎င်း၏ EU မဟာမိတ်များအကြား ၎င်းနောက်တစ်ဆင့်အတွက် ညှိနှိုင်းမရအခြေအနေများရှိနေကြောင်း ထွက်ပေါ်လာခဲ့သည်။

ရုရှားသည် အမေရိကန်၏ရန်လိုသည့် လုပ်ရပ်များကို တုံ့ပြန်မည်မဟုတ်ကြောင်း ရုရှားနိုင်ငံ ခြားရေးဌာနပြောရေးဆိုခွင့်ရှိသူ Maria Zakharova က ဝါရှင်တန်၏ ကြေညာချက်ကို တုံ့ပြန်သည့်အနေဖြင့် ပြောကြားခဲ့သည်။ တစ်ချိန်တည်းတွင်ပင် မော်စကိုစတော့အိတ်ချိန်းသည် အမေရိကန်၏ ဒဏ်ခတ်ပိတ်ဆို့မှုအသစ်များကြောင့် ကြာသပတေးနေ့မှစတင်ကာ အမေရိကန် ဒေါ်လာနှင့် ယူရိုငွေများအသုံးပြု၍ အရောင်းအဝယ်ပြုလုပ်တော့မည်မဟုတ်ကြောင်း ကြေညာခဲ့သည်။