ALynn (NSS) - ဇွန် ၂

ပြင်သစ်၏ စစ်သင်တန်းပို့ချသည့် ပထမအုပ်စုသည် ယူကရိန်းနိုင်ငံသို့ ချီတက်လာရန်ပြင်ဆင်နေကြောင်း ယူကရိန်းအကြီးတန်းအမတ် Aleksey Goncharenko က သောကြာနေ့တွင် ပြောကြားခဲ့သည်။ ယူကရိန်း ထိပ်တန်းတပ်မှူး Syrsky က နိုင်ငံတွင်း ပြင်သစ်အမှုထမ်းများ ဖြန့်ကြက်နိုင်ရေး လိုအပ်သည့် စာရွက်စာတမ်းကိစ္စများ ပြီးမြောက်ကြောင်း ကြေညာပြီး ရက်ပိုင်း အကြာမှာ ယခုကဲ့သို့ သတင်းထွက်ပေါ်လာခြင်းဖြစ်သည်။

NATO အစုအဖွဲ့အတွင်းမှာပင် တပ်ဖွဲ့များကို ယူကရိန်းစစ်မြေပြင်မှာ တပ်ဖြန့်ဖို့ ဆုံးဖြတ်ချက်နှင့် ပတ်သက်၍ အငြင်းအခုံဖြစ်နေဆဲဖြစ်သည်။ အဖွဲ့ဝင်အချို့ကမူ ၎င်းတို့သည် ရုရှား-ယူကရိန်း ပဋိပက္ခမှာ တိုက်ရိုက်သက်ဆိုင်သူများမဟုတ်သည့်အတွက် တပ်ဖွဲ့များကို ဖြန့်ကြက်ခြင်း မပြုလုပ်လိုပေ။ သို့သော် ရုရှားက ယူကရိန်း၏ ကျောထောက်နောက်ခံဖြစ်နေသည့် အနောက်အုပ်စုအား တိုက်ရိုက်ပါဝင်သူများအဖြစ် ရှုမြင်ပြီး ရုရှားမြေပေါ်ရှိပစ်မှတ်များကို တိုက်ခိုက်ရန်အတွက် အနောက်အုပ်စုမှ ထောက်ပံ့ပေးသော လက်နက်များကို ယူကရိန်းက အသုံးပြုနေကြောင်း ဖော်ပြထားသည်။ 

ဖေဖော်ဝါရီလတွင် ပြင်သစ်သမ္မတ အီမန်နျူရယ်မက်ခရွန်က အနာဂတ်တွင် NATO အဖွဲ့ဝင် နိုင်ငံများ၏ တပ်ဖွဲ့ဝင်များ ယူကရိန်းသို့ စေလွှတ်မည့်အခြေအနေကို ၎င်းအနေဖြင့် အဆုံး အဖြတ်ပေး၍မရကြောင်းပြောကြားခဲ့သည်။ သို့သော် မကြာမီကပင် ပြင်သစ်အရာရှိများက သမ္မတ ဆိုလိုသည့် တပ်ဖွဲ့ဝင်များမှာ တိုက်ခိုက်ရေးသမားမဟုတ်သည့် စစ်မှုထမ်းများဖြစ်ကြောင်း ရှင်းလင်းပြောကြားခဲ့သည်။ နောက်ပိုင်းတွင် မက်ခရွန်က NATO သည် ရုရှားအပေါ် “ထွေပြားစေမည့်မဟာဗျူဟာ” မူဝါဒကို ချမှတ်သင့်သည်ဟု တိုက်တွန်းခဲ့ဖူးသည်။ ပြင်သစ်ခေါင်းဆောင်သည် ယူကရိန်းသို့ စစ်သင်တန်းဆရာများ စေလွှတ်လိုသော နိုင်ငံများတိုးပွားလာအောင် နောက်ကွယ်တွင် လုပ်ဆောင်နေသည်ဟု Bloomberg က သောကြာနေ့ (မေလ ၃၁ ရက်) တွင် ဖော်ပြခဲ့သည်။

ဖေဖော်ဝါရီလတွင် ယူကရိန်း၏ ထိပ်တန်းဗိုလ်ချုပ်ဖြစ်လာသော Syrsky က ပြင်သစ်နိုင်ငံမှ စစ်သင်တန်းပို့ချသူများကို ၎င်းတို့၏ သင်ကြားရေးအဆောက်အအုံများ၊ တပ်သားများနှင့် ရင်းနှီး ကျွမ်းဝင်စေရန် ယူကရိန်း၏လေ့ကျင့်ရေးဌာနများသို့ သွားရောက်ကြည့်ရှုခွင့်ပြုသည့် စာရွက်စာတမ်းများအား လက်မှတ်ရေးထိုးခဲ့ကြောင်းကို ပြင်သစ်ကာကွယ်ရေးဝန်ကြီး Sebastien Lecornu ထံ အကြောင်းကြားခဲ့ပြီးဖြစ်ကြောင်း တနင်္လာနေ့တွင် ပြောကြားခဲ့သည်။

ယူကရိန်းသို့ နောက်ထပ် စစ်ရေးအကူအညီများပေးခြင်းသည် တိုက်ပွဲများ ပိုမိုပြင်းထန်စေဖို့ လှုံဆော်နေခြင်းသာဖြစ်ကြောင်း ရုရှားက သတိပေးထားသည်။ ယူကရိန်းတွင် အနောက်နိုင်ငံမှ စစ်သည်အများစု လှုပ်ရှားနေသည်မှာ အချိန်အတော်ကြာရှိနေပြီဖြစ်ကြောင်း သမ္မတ ဗလာဒီမာ ပူတင်က အင်္ဂါနေ့တွင် ပြောကြားခဲ့သည်။ ထို့ပြင် “၎င်းတို့က ကြေးစားသမားအမည်ခံ အထူးကျွမ်းကျင်စစ်သည်တွေပါပဲ”ဟု သမ္မတပူတင်က သတင်းထောက်များကို ပြောကြားခဲ့သည်။ ယူကရိန်းသို့ အနောက်အုပ်စုတပ်ဖွဲ့များ ဖြန့်ကြက်ချထားခြင်းသည် ဥရောပတွင် ပြင်းထန်သော စစ်ပွဲနှင့် ကမ္ဘာလုံးဆိုင်ရာ ပဋိပက္ခဆီသို့ ဦးတည်သွားမည်ဖြစ်ကြောင်း ၎င်းက သတိပေးခဲ့သည်။