Pika (NSS) - မေ ၂၉

အမေရိကန်ကနိုင်ငံက ပေါ့ပ်တေးဂီတ အမျိုးသမီးပရိသတ်တစ်ဦးသည် ၎င်း၏ခန္ဓာကိုယ်ပေါ်တွင် ပေါ့ပ်ဂီတဘုရင်မအဖြစ်တင်စားခံထားရသော မက်ဒေါနား၏ ရုပ်ပုံတက်တူး(၁၈)ခုကို ထိုးခဲ့ပြီးနောက် ကမ္ဘာ့ဂင်းနစ်စံချိန်ချိုးဖျက်နိုင်ခဲ့ကြောင်းသိရသည်။

ပေါ့ဂီတဘုရင်မအဖြစ် တင်စားခံထားရသော မက်ဒေါနားကို ဂုဏ်ပြုသည့်အနေဖြင့် ၎င်း၏ ရုပ်ပုံတက်တူး(၁၈)ခုကို ထိုးခဲ့ခြင်းဖြစ်ကြောင်း တာရာဘယ်ရီက ပြောကြားခဲ့သည်။ အမေရိကန်နိုင်ငံ ကန်းဆက်ပြည်နယ် Topeka မြို့တွင် နေထိုင်သော တာရာဘယ်ရီသည် ခန္ဓာကိုယ်ပေါ်တွင် အဆိုတော်တစ်ဦးတည်း၏ ရုပ်ပုံတက်တူးအများဆုံးရှိခြင်းအတွက် ကမ္ဘာ့ဂင်းနစ်စံချိန်ချိုးဖျက်နိုင်ခဲ့ခြင်းဖြစ်သည်။ တာရာဘယ်ရီသည် ခန္ဓာကိုယ်ပေါ်တွင် နာမည်ကျော်ရက်ပ်ပါအဆိုတော် Eminem ၏ ရုပ်ပုံတက်တူး (၁၅)ခုကိုထိုးခဲ့သော ဗြိတိန်အမျိုးသမီး နစ်ကီပက်တာဆန်၏ ဂင်းနစ်စံချိန်ကို ချိုးဖျက်နိုင်ခဲ့ခြင်းဖြစ်ကြောင်းလည်း သိရသည်။ မက်ဒေါနားက တက်တူးထိုးထားသည့် ၎င်း၏ပရိသတ်များကို သီချင်းဗီဒီယိုတစ်ခုတွင် ပါဝင်စေရန်အတွက် ရှာဖွေနေသည်ဟု ကြားခဲ့ရပြီးနောက် ၂၀၁၆ ခုနှစ်တွင် မက်ဒေါနား၏ ပထမဆုံးရုပ်ပုံတက်တူးကို ထိုးခဲ့ခြင်းဖြစ်ကြောင်း တာရာဘယ်ရီက ပြောကြားခဲ့သည်။

တာရာဘယ်ရီက 'နာမည်ကျော်ရက်ပ်ပါအဆိုတော် Eminem ရဲ့ ရုပ်ပုံတက်တူး(၁၅)ခုကို ထိုးထားတဲ့ အမျိုးသမီးက ကမ္ဘာ့ဂင်းနစ်စံချိန်ရရှိခဲ့တယ်လို့ ကြားလိုက်ရတဲ့အချိန်မှာ ကျွန်မမှာ မက်ဒေါနားရဲ့ ရုပ်ပုံတက်တူး(၂)ခုထိုးပြီးနေပါပြီ။ အဲဒီညမှာပဲ ဒီဂင်းနစ်စံချိန်ကို  ရအောင်ယူမယ်လို့ ကျွန်မဆုံးဖြတ်ခဲ့ပြီး တက်တူးဆရာကို ဖုန်းဆက်ခဲ့တာပါ။ သူကလည်း ကျွန်မကို ဆက်လုပ်ဖို့ အားပေးခဲ့တာပါ။ လူအတော်များများက ကျွန်မရဲ့ လက်မောင်းတွေမှာ ထိုးထားတဲ့ တက်တူးတွေကို ဓါတ်ပုံ ဒါမှမဟုတ် ဗီဒီယိုရိုက်လို့ရလားလို့ မေးခဲ့ကြပါတယ်။ အဲဒီလိုစကားတွေကြားခဲ့ရတဲ့အတွက် ကျွန်မတကယ်ကိုဝမ်းသာပါတယ်။ ဒီတက်တူးတွေထိုးဖို့အတွက် ပိုက်ဆံတွေချေးတာမျိုး၊ အပေးအယူလုပ်တာမျိုးတွေ လုပ်ခဲ့ရပါတယ်"ဟု ပြောဆိုခဲ့သည်။ ထို့ပြင် မက်ဒေါနား၏ ရုပ်ပုံတက်တူး(၁၈)ခု၏ စုစုပေါင်းတန်ဖိုးမှာ အမေရိကန်ဒေါ်လာ(၉၈၀၀)ကျော်ရှိကြောင်း တာရာဘယ်ရီက ခန့်မှန်းပြောဆိုခဲ့သည်။