ALynn (NSS) - မေ ၁၅

အမေရိကန်သမ္မတဂျိုးဘိုင်ဒင်သည် ကမ္ဘာ့အကြီးဆုံးစီးပွားရေးအင်အားစုနှစ်ခုအကြား ပွတ်တိုက်မှုဖြစ်စေမည့် တရုတ်၏ လျှပ်စစ်ကားများ၊ ဘက်ထရီ၊ ဆိုလာ၊ စတီးလ်၊ အလူမီနီယံနှင့် ဆေးဘက်ဆိုင်ရာ ပစ္စည်းများအပေါ် အကောက်ခွန်နှုန်းထားအသစ်များ သတ်မှတ်ဖို့ ကြိုးပမ်းလာသည်။ 

ဘိုင်ဒင်က ပြည်တွင်းရှိ တရုတ်ကုမ္ပဏီများကြောင့် အမေရိကန်ကုမ္ပဏီများမှာ အကျိုးအမြတ်မရရှိဘဲ ကမ္ဘာ့ကုန်သွယ်ရေးတွင် မျှတမှုမရှိသလိုဖြစ်နေကြောင်း ပြောကြားခဲ့သည်။ ပြိုင်ဆိုင်မှု မျှတသရွေ့ အမေရိကန်အလုပ်သ မားများသည် တရားမျှတမှုရှိစွာ အားသွန်ခွန်စိုက် ယှဉ်ပြိုင်နေဦးမည်ဖြစ် ကြောင်း၊ သို့သော် တရုတ်အစိုးရက နိုင်ငံတော်ပိုင်ငွေများကိုအသုံးပြု၍ တရုတ်ကုမ္ပဏီများကို လည်ပတ်စေသောကြောင့် တရားမျှတမှုမရှိသလိုဖြစ်နေကြောင်း”လည်း ပြောကြားခဲ့သည်။ 

အမေရိကန်၏ အခွန်တိုးမြှင့်သတ်မှတ်ခြင်းအပေါ် တရုတ်က ချက်ချင်း လက်တုံ့ပြန်မည်ဟု ကတိပြုခဲ့သည်။ အမေရိကန်၏ အခွန်စည်းကြပ်မှု တိုးမြှင့်ခြင်းကို တရုတ်ကဆန့်ကျင်ပြီး ၎င်း၏အကျိုးစီးပွားများကို ကာကွယ်ရန် ဆောင်ရွက်သင့်သည်များကို လုပ်ဆောင်သွားမည်ဖြစ်ကြောင်း ၎င်း၏ ကူး သန်းရောင်းဝယ်ရေးဝန်ကြီးဌာနက ပြောကြားခဲ့သည်။ အမေရိကန်၏ အကောက်ခွန်နှုန်းအသစ်သည် သံမဏိနှင့် အလူမီနီယံ၊ တစ်ပိုင်းလျှပ်ကူးပစ္စည်း၊ လျှပ်စစ်ကားများ၊ ဓာတ်သတ္တုများ၊ ဆိုလာဆဲလ်များနှင့် ကရိန်းများအပါအဝင် တရုတ်သွင်းကုန် ပစ္စည်းတန်ဖိုး ဒေါ်လာ ၁၈ ဘီလျံအပေါ် သက်ရောက်သွားမည်ဖြစ်ကြောင်း အိမ်ဖြူတော်က ပြောကြားခဲ့သည်။ EV ကာများအပေါ် အခွန်တိုးမြှင့်သတ်မှတ်သော်လည်း အမေရိကန်သို့ တင်သွင်းသော တရုတ် EV အရေအတွက်မှာ အလွန်နည်းပါးသည့်အတွက် ယင်းမှာ နိုင်ငံရေးအရ သက်ရောက်မှုအတွက်သာ ပြုမူခြင်းဖြစ်သည်မှာ သိသာနေသည်။

အမေရိကန်သည် ၂၀၂၃ ခုနှစ်တွင် တရုတ်နိုင်ငံမှ ကုန်ပစ္စည်းများ ဒေါ်လာ ၄၂၇ ဘီလျံဖိုးတင်သွင်းခဲ့ပြီး တရုတ်သို့ ဒေါ်လာ ၁၄၈ ဘီလျံဖိုးခန့်သာ ပြန်လည်တင်ပို့နိုင်ခဲ့သည်။ ထို့ကြောင့် ဆယ်စုနှစ်များစွာကြာ ကုန်သွယ်ရေးကွာဟမှု ဆက်လက်ဖြစ်ပေါ်နေသောကြောင့် အမေရိကန်အတွက်  ကုန် သွယ်ရေးမှာ အကဲဆတ်သည့်အကြောင်းအရာဖြစ်လာကြောင်း သိရသည်။ အမေရိကန် ကုန်သွယ်ရေး ကိုယ်စားလှယ် Katherine Tai က တရုတ်သည် အမေရိကန်၏ ဉာဏမူပိုင်ခွင့်ကို ခိုးယူခြင်းကြောင့် ယခုအခွန်စည်းကြပ်မှုအသစ်သည် တရားမျှတကြောင်း ပြောကြားခဲ့သည်။ သို့သော် Tai သည် နေရောင်ခြည်စွမ်းအင်သုံး စက်ကိရိယာ ၁၉ ခု အပါအဝင် တရုတ်နိုင်ငံမှ ရာနှင့်ချီသော စက်မှုစက်ပစ္စည်းတင်သွင်းမှု အမျိုးအစားများအတွက် အခွန်ကင်းလွတ်ခွင့်ကို အကြံပြုထားသည်။