ဂျန်ဇက် (NSS) - ဧပြီ ၂၁ 

ထိုင်ဝမ်ကာကွယ်ရေးဝန်ကြီးက အမေရိကန်လွှတ်တော်က ခွင့်ပြုပေးခဲ့တဲ့ အကူအညီပေးမယ့် ငွေကြေးများကို ဘယ်လိုအသုံးပြုရမလဲဆိုတာကို အမေရိကန်အစိုးရနဲ့ ဆွေးနွေးသွားမှာဖြစ်ကြောင်း ပြောပါတယ်။

အမေရိကန်အောက်လွှတ်တော်ဟာ ယူကရိန်း၊ အစ္စရေးနဲ့ ထိုင်ဝမ်တို့ကို အမေရိကန်ဒေါ်လာ ၉၅ ဘီလျံအသုံးပြုခွင့်ပေးမယ့် ဥပဒေမူကြမ်းကို ဧပြီ ၂ဝ ရက်က ခွင့်ပြုပေးခဲ့ကြောင်း သိရပါတယ်။ အမေရိကန်နိုင်ငံဟာ တရုတ်နိုင်ငံနဲ့အငြင်းပွားနေတဲ့ ထိုင်ဝမ်ကို စစ်လက်နက်ပစ္စည်းများအပြင် နိုင်ငံတကာမျက်နှာစာမှာ ကူညီထောက်ပံ့ပေးနေကြောင်း သိရပါတယ်။ 

အမေရိကန်လွှတ်တော်ရဲ့ခွင့်ပြုပေးမှုတွေဟာ ထိုင်ဝမ်အတွက် အမေရိကန်နိုင်ငံရဲ့ကူညီထောက်ပံ့ပေးမှု ကျောက်ဆောင်လို့မျိုး ခိုင်မာနေတာကိုပြသလိုက်တာဖြစ်တယ်လို့ ထိုင်ဝမ်ကာကွယ်ရေးဝန်ကြီးက ပြောပါတယ်။

ထိုင်ဝမ်ကာကွယ်ရေးဝန်ကြီးက "ကျွန်တော်တို့ဟာ အမေရိကန်အစိုးရနဲ့ ဘတ်ဂျက်ကိစ္စတိုင်ပင်ဆွေးနွေးမယ်။ ထိုင်ဝမ်ရေလက်ကြား တည်ငြိမ်ရေး၊ ငြိမ်းချမ်းရေး နဲ့ အမျိုးသားလုံခြုံရေးကိစ္စတွေ ပိုမိုကောင်းမွန်စေဖို့ အမေရိကန်အစိုးရနဲ့ ပူးပေါင်းဆောင်ရွက်မယ်" လို့ ပြောပါတယ်။

ထိုင်ဝမ်ကို အကူအညီပေးမယ့် အမေရိကန်အစိုးရရဲ့အစီအစဉ်တွေဟာ တရုတ်အစိုးရအတွက် စိတ်ဆိုးဒေါသဖြစ်စရာဖြစ်လာဖွယ်ရှိနေပါတယ်။ အမေရိကန်အောက်လွှတ်တော်က ခွင့်ပြုပေးခဲ့တဲ့ ဒေါ်လာ ၉၅ ဘီလျံကို ထိုင်ဝမ်၊ ယူကရိန်းနဲ့ အစ္စရေးနိုင်ငံတို့ခွဲဝေယူရမှဖြစ်ပြီး ထိုင်ဝမ်က အမေရိကန်ဒေါ်လာ ၁ဝ ဘီလျံကျော် ခွဲတမ်းရဖွယ်ရှိနေပါတယ်။ ထိုင်ဝမ်ဟာ လက်ရှိအချိန်မှာ တရုတ်နိုင်ငံရဲ့ဖိအားပေးမှုမျိုးစုံရင်ဆိုင်နေရပြီး အမေရိကန်နဲ့ မဟာမိတ်ဖြစ်မှုကို တိုးမြှင့်လုပ်ဆောင်နေပါတယ်။

တရုတ်နိုင်ငံက ထိုင်ဝမ်ဟာ ၎င်းတို့ပိုင်နက်ဖြစ်တယ်လို့ ပြောဆိုထားပြီး ထိုင်ဝမ်ကလည်း တရုတ်လက်အောက်က ခွဲထွက်ကာလွတ်လပ်ရေးရယူဖို့ လိုလားနေပါတယ်။ ထိုင်ဝမ်မှာ သမ္မတအသစ်အဖြစ်တာဝန်ယူမယ့်သူဟာ တရုတ်ဆန့်ကျင်ရေးသဘောထားပြင်းထန်သူဖြစ်ရာ  ၎င်းလက်ထက်မှာ တင်းမာမှုအရှိန် ပိုမိုဖြစ်လာဖွယ်ရှိနေပါတယ်။