Pika (NSS) - ဧပြီ ၂၁ 

အမေရိကန်အောက်လွှတ်တော်ဟာ ယူကရိန်း၊ အစ္စရေးနဲ့ ထိုင်ဝမ်တို့အတွက် အကူအညီပေးရေးအစီအစဉ်အသစ် အမေရိကန်ဒေါ်လာ(၉၅)ဘီလျံ ဥပဒေမူကြမ်းကို ဧပြီလ(၂၀)ရက်မှာ အတည်ပြုပေးခဲ့တယ်လို့ သိရပါတယ်။

အဲဒီဥပဒေမူကြမ်းဟာ လက်ရှိအချိန်မှာ ဒီမိုကရက်တစ်တွေ ကြီးစိုးတဲ့အထက်လွှတ်တော်ကို ရောက်ရှိနေပြီဖြစ်တယ်လို့လည်း သိရပါတယ်။ 

အမေရိကန်သမ္မတဂျိုးဘိုင်ဒန်နဲ့ အထက်လွှတ်တော် ရီပတ်ဘလစ်ကန်အမတ် Mitch McConnell တို့ဟာ အဲဒီ အကူအညီပေးရေးအစီအစဉ်အသစ်ကို မဲခွဲဆုံးဖြတ်ဖို့ အောက်လွှတ်တော်ဥက္ကဋ္ဌ မိုက်ခ်ဂျွန်ဆင် ကို တိုက်တွန်းခဲ့တာလို့လည်း သိရပါတယ်။

အထက်လွှတ်တော်ဟာ အောက်လွှတ်တော်ကအတည်ပြုထားတဲ့ဥပဒေမူကြမ်းကို လာမယ့်ဧပြီ(၂၃)ရက်မှာ စတင် စဉ်းစားသွားဖို့ စီစဉ်ထားတယ်လို့လည်း သိရပါတယ်။ အဲဒီ ဥပဒေမူကြမ်းအတွက် နောက်ဆုံးအတည်ပြုမှုဟာ လာမယ့်သီတင်းပတ်အတွင်းမှာ ဖြစ်လာနိုင်ဖွယ်ရှိနေပြီး သမ္မတဂျိုးဘိုင်ဒန်က အတည်ပြုလက်မှတ်ရေးထိုး သွားနိုင်ဖွယ် ရှိနေတယ်လို့လည်း သိရပါတယ်။

ဒါ့ပြင် အဲဒီဥပဒေမူကြမ်းထဲမှာ အမေရိကန်စစ်လက်နက်ပစ္စည်းတွေ၊ သိုလှောင်မှုတွေကို ပြန်လည်ဖြည့်တင်းဖို့ အမေရိကန်ဒေါ်လာ(၂၃)ဘီလျံ အပါအဝင် ယူကရိန်းပဋိပက္ခကိုဖြေရှင်းဖို့အတွက် အမေရိကန်ဒေါ်လာ (၆ဝ ဒသမ ၈၄) ဘီလျံ၊ လူသားချင်းစာနာထောက်ထားမှုဆိုင်ရာလိုအပ်ချက်တွေအတွက် အမေရိကန်ဒေါ်လာ (၉ ဒသမ ၁) ဘီလျံ အပါအဝင် အစ္စရေးအတွက် အမေရိကန်ဒေါ်လာ(၂၆)ဘီလျံ နဲ့ ထိုင်ဝမ် အပါအဝင် အင်ဒို-ပစိဖိတ်ဒေသ အတွက် အမေရိကန်ဒေါ်လာ(၈ ဒသမ ၁၂) ဘီလျံ ပါဝင်တယ်လို့လည်း သိရပါတယ်။ 

အမေရိကန်လွှတ်တော်အမတ်တွေဟာ မှန်ကန်တဲ့သမိုင်းလမ်းကြောင်းကို ဆက်လက်ထိန်းသိမ်းထားတဲ့အတွက် ကျေးဇူးတင်မိတယ်လို့လည်း ယူကရိန်းသမ္မတ ဇီလန်စကီးက ပြောခဲ့ပါတယ်။ 

ဇီလန်စကီးက “အောက်လွှတ်တော်က အတည်ပြုပေးလိုက်တဲ့ဥပဒေမူကြမ်းဟာ ပြည်သူထောင်ပေါင်းများစွာရဲ့ အသက်တွေကို ကယ်တင်ပြီး ကျွန်တော်တို့နိုင်ငံကို ပိုမိုအားကောင်းလာအောင် လုပ်ဆောင်ပေးပါလိမ့်မယ်” လို့ ပြောခဲ့ပါတယ်။