ALynn (NSS) - ဧပြီ ၁၈

ဥရောပသမဂ္ဂခေါင်းဆောင်များသည် ဧပြီလ ၁၇ ရက် (ဗုဒ္ဓဟူးနေ့)တွင် အစ္စရေးကို ဒရုန်းများ၊ ဒုံးကျည်များဖြင့် တိုက်ခိုက်ခဲ့သည့် အီရန်၏လုပ်ရပ်ကြောင့် အရှေ့အလယ်ပိုင်းဒေသတွင် ပဋိပက္ခ ပိုမိုကြီးထွားလာစေသည့်အတွက် အီရန်အပေါ် အရေးယူပိတ်ဆို့ခြင်းများချမှတ်ရန် တွေ့ဆုံ ဆွေးနွေးခဲ့ကြသည်။ 

ဘရပ်ဆဲလ်တွင်ကျင်းပသော နှစ်ရက်တာ ထိပ်သီးတွေ့ဆုံမှုသည် အီရန်က အစ္စရေးကို တိုက်ခိုက်ခဲ့သည့် အဖြစ်အပျက်အပြီး အီးယူ ၂၇ နိုင်ငံမှ ခေါင်းဆောင်များ၏ ပထမဆုံးအကြိမ်တွေ့ဆုံမှုလည်းဖြစ်သည်။ အစ္စရေးက ပြန်လည်လက်တုံ့ပြန်ရန် အချက်ပြနေခြင်းများရှိသော်လည်း မည်သို့မည်ပုံတုံ့ပြန်သွားမည်ကို မသိရှိရသေးပါ။ အီးယူက အီရန်အပေါ် ပိတ်ဆို့မှုများလုပ်ဆောင်သွားမည်ဖြစ်ပြီး အစ္စရေးအနေဖြင့် လက်တုံ့ပြန်ခြင်းကိစ္စများကို ချုပ်တည်းထားရန် နားချခဲ့သည်။ 

ပြင်သစ်သမ္မတက “အရေးယူပိတ်ဆို့ခြင်းကို အဓိကထားလုပ်ဆောင်သွားမည်ဖြစ်ပြီး အီရန်၏ ဒရုန်းနှင့် ဒုံးကျည်များထုတ်လုပ်ရေးလုပ်ငန်းတွင် ပါဝင်ကူညီနေသူများကိုပါ ပစ်မှတ်ထားအရေးယူသွားမည် ဖြစ်ကြောင်း”‌ပြောကြားခဲ့သည်။ ဂျာမန်ခေါင်းဆောင်ကလည်း “အစ္စရေးအနေဖြင့် အပြင်းအထန် ပြန်လည်လက်တုံ့ပြန်ခြင်းမျိုး မပြုလုပ်သွားရန်မှာ အရေးကြီးကြောင်း”ပြောကြားခဲ့သည်။ 

အီးယူခေါင်းဆောင်များက အီရန်၏ တိုက်ခိုက်မှုအပေါ်ရှုတ်ချခဲ့ကြပြီး အစ္စရေး၏လုံခြုံရေးအတွက် ပူးပေါင်းဆောင်ရွက်သွားမည်ဖြစ်ကြောင်း ထပ်လောင်းကတိပြုခဲ့ကြသည်။ ထို့ပြင် တင်းမာမှုများကို ဖြေလျှော့ရန် လက်ဘနွန်အပါအဝင် အဖက်ဖက်က ဝိုင်းဝန်းဆောင်ရွက်သွားဖို့လည်း တိုက်တွန်းလိုက်သည်။ အီးယူ၏ ထုတ်ပြန်ကြေညာချက်တွင် “အီရန်၏ မောင်းသူမဲ့ ဝေဟင်သုံးယာဉ်များနှင့် ဒုံးကျည်များကို အထူးထိန်းချုပ်ကန့်သတ်မှုများ ဆောင်ရွက်သွားမည်ဖြစ်ကြောင်း”ဖော်ပြပါရှိသည်။ ဧပြီလ ၁၃ ရက် (စနေနေ့)က အီရန်၏ အစ္စရေးအားတိုက်ခိုက်မှုသည် ဧပြီလ ၁ ရက်က ဆီးရီးယားရှိ ၎င်း၏သံရုံးအား တိုက်ခိုက်ခဲ့သည့် လုပ်ရပ်အား လက်တုံ့ပြန်ခြင်းဖြစ်ကြောင်း သိရသည်။ 

အီးယူသည် ယခင်ကတည်းက အီရန်အား လူ့အခွင့်အရေးချိုးဖောက်မှု၊ ဖျက်အားပြင်းလက်နက်များပေါများမှု၊ ရုရှား-ယူကရိန်းစစ်ပွဲအတွင်း ရုရှားအား ဒရုန်းများထောက်ပံ့နေမှုစသည့် စွဲချက် များဖြင့် အရေးယူပိတ်ဆို့ခြင်းမျိုးစုံကို ချမှတ်ခဲ့ပြီးဖြစ်သည်။ အီးယူထိပ်သီးတွေ့ဆုံမှုတွင် ချမှတ်ခဲ့သည့် ဆုံးဖြတ်ချက်များအရ အီရန်အပေါ် ကျယ်ကျယ်ပြန့်ပြန့်အရေးယူပိတ်ဆို့မှုများကို လာမည့် တနင်္လာနေ့ (ဧပြီလ ၂၂ ရက်) မှစ၍ အမေရိကန်နှင့်အတူ အနောက်မဟာမိတ်များက ပူးပေါင်းဆောင်ရွက်သွားမည်ဖြစ်ကြောင်းသိရသည်။