စော (NSS) - ဧပြီ ၉

သင်္ကြန်ပိတ်ရက်များတွင် ရန်ကုန်၊ မန္တလေး၊‌ မော်လမြိုင်၊ ပြည် အထူးရထားခရီးစဉ်များ ပြေးဆွဲသွားမည်ဖြစ်ကြောင်း မြန်မာ့မီးရထားထံမှ သိရသည်။

အဆိုပါအထူးရထားခရီးစဉ်များမှာ ရန်ကုန်-မန္တလေး-ရန်ကုန်၊ ရန်ကုန်-မော်လမြိုင်-ရန်ကုန်နှင့်  ရန်ကုန်-ပြည်-ရန်ကုန် ရထားများဖြစ်ကြောင်း သိရသည်။ ပုံမှန်ပြေးဆွဲနေသည့် ရန်ကုန်-မန္တလေး-ရန်ကုန် အမှတ် (၁၁)အဆန်/အမှတ် (၁၂)အစုန် ရထားများကို နံနက် (၅)နာရီအချိန်တွင် ရန်ကုန် ဘူတာမှ စတင်ထွက်ခွာကာ နေ့စဉ်ပြေးဆွဲသွား မည်ဖြစ်ပြီး ရန်ကုန်-မန္တလေး-ရန်ကုန် အစုန် ။အဆန် အထူးရထားများကို  ဧပြီလ ၁၂ရက်၊ ၁၉ ရက် နှင့် ၂၁ရက်များတွင် ပြေးဆွဲပေးသွားမည်ဖြစ်ကြောင်း သိရသည်။

‘အထူးရထားပုံမှန်ထွက်တာက သောကြာ၊ တနင်္ဂနွေပါ။ သောကြာနေ့ ၁၂ ရက်နေ့ ထွက်မယ့်ဟာက ပုံမှန်အတိုင်းထွက်ပြီးတော့ ၁၄ ရက်နေ့ထွက်မယ့် ရထားကို နားလိုက်တာပါ။ သင်္ကြန်ရက်တွင်းဖြစ်နေလို့’ဟု ရန်ကုန်ဘူတာကြီးမှ တာဝန်ရှိသူတစ်ဦးက NP News ကိုပြောသည်။

ထို့ပြင် ပုံမှန်ပြေးဆွဲနေသည့် ရန်ကုန်-မော်လမြိုင်-ရန်ကုန် အမှတ် (၈၁) အဆန်/အမှတ် (၈၂)အစုန် ရထားများကို နံနက် (၆)နာရီခွဲအချိန်တွင် ရန်ကုန်မှစတင်ထွက်ခွာကာ နေ့စဉ်ပြေးဆွဲသွားမည်ဖြစ်ပြီး ရန်ကုန်-မော်လမြိုင်-ရန်ကုန် အထူးရထားကို ဧပြီလ ၁၁ ရက်၊ ၁၂ ရက်၊ ၁၃ရက်၊ ၂၀ရက်၊ ၂၁ရက်နှင့် ၂၂ ရက်တို့၌ နံနက် (၇)နာရီ(၄၅)မိနစ်အချိန်တွင် ရန်ကုန်ဘူတာမှ စတင်ထွက်ခွာမည်ဖြစ်ကြောင်း  သိရသည်။

အလားတူ ရန်ကုန်-ပြည်-ရန်ကုန် အထူးရထား အား ဧပြီလ ၁၁ ရက်၊ ၁၂ရက်၊ ၁၃ရက်၊ ၂၀ရက်၊ ၂၁ရက် နှင့် ၂၂ ရက်များ၌ပြေးဆွဲပေးမည်ဖြစ်ပြီး မွန်းလွဲ (၁)နာရီအချိန်တွင် ရန်ကုန်ဘူတာကြီးမှ စတင်ထွက်ခွာမည်ဖြစ် ကြောင်းသိရသည်။

ထို့ပြင် ပုံမှန်ပြေးဆွဲနေသည့် ရန်ကုန်-ပဲခူး-ရန်ကုန် အမှတ် (၁၃)အဆန်/အမှတ် (၁၄)အစုန် ရထားများ၊ မြို့ပတ်ရထားများ၊ ရန်ကုန်-ပြည်-ရန်ကုန် အမှတ် (၇၁)အဆန်/အမှတ် (၇၂)အစုန် ရထားများကို ဧပြီလ ၁၃ ရက်မှ ၁၆ ရက်နေ့အထိ ရပ်နားသွားမည်ဖြစ်ကြောင်း သိရသည်။ အလားတူ ရန်ကုန်-ပုဂံ-ရန်ကုန် ခရီးစဉ်တွင် ဧပြီလ ၁၂ ရက်နေ့၌ ရန်ကုန်မှထွက်ခွာမည့် အမှတ် (၆၁)အဆန်ရထားနှင့်  ဧပြီလ ၁၆ ရက်နေ့၌ ပုဂံမှ ထွက်ခွာမည့် အမှတ် (၆၂)အစုန်ရထားကို ရပ်နား မည်ဖြစ်ကြောင်းသိရသည်။

သင်္ကြန်ကာလအတွက် အထူးရထားလက်မှတ်များကို အထက်တန်းအတွက် (၃)ရက်၊ ရိုးရိုးတန်း အတွက် (၁)ရက်ကြိုတင်၍ ရောင်းချသွားမည်ဖြစ်ပြီး နေပြည်တော်မှ ဌာနဆိုင်ရာ ဝန်ထမ်းများအနေဖြင့် မြန်မာ့မီရထား၊ စီးပွားရေးဌာန၊ ခရီးသည်ဌာနခွဲတို့တွင် လျှောက်လွှာဖြင့် ကြိုတင်ဝယ်ယူနိုင်ကြောင်း မြန်မာ့မီးရထားမှ ဆိုသည်။