စော (NSS) - ဧပြီ ၇

သင်္ကြန်ပိတ်ရက် ခရီးထွက်အပန်းဖြေသူများအနေဖြင့် ကမ်းခြေမှ ‌ပင်လယ်သတ္တဝါများအား အလွယ်တကူကိုင်ခြင်းကို ရှောင်းရှားသင့်ပြီး ဂျပ်မြွေကိုလည်း သတိထားရန်လိုကြောင်း ပင်လယ်သတ္တဝါနှင့် သားရဲတိရစ္ဆာန် သုတေသန ပညာရှင်တစ်ဦးက  NSS မှတဆင့်အကြုံပြုပြောကြားထားသည်။

ယခုအခါ မြန်မာနှစ်ကူးသင်္ကြန်ပိတ်ရက်တွင် ခရီးသွားပြည်သူများအနေဖြင့်  ကမ်းခြေများသို့ အများဆုံးအပန်းဖြေခရီးထွက်ရန် စီစဉ်နေကြရာ ကမ်းခြေသို့ ရောက်လျှင် ပင်လယ်သတ္တဝါများကို အလွယ်တကူထိတွေ့ရာတွင်  အန္တရာယ်ရှိနိုင်သည့်အတွက် ၎င်းက အထက်ပါအတိုင်းအကြံပြုပြောကြားခဲ့ခြင်းဖြစ်သည်။

“ကျွန်တော်တို့က ဘာတွေအများဆုံးတွေ့ရလဲဆိုတော့ ပင်လယ်ကမ်းခြေကကောင်တွေကို ဘာမျိုးစိတ်လဲဆိုတာမသိဘဲ ကိုင်ကြတာကတော့ တွေ့ရများတယ်။ ကမ်းခြေမှာ တစ်ချို့အဆိပ်ပြင်းအကောင်လေးတွေ၊ ရေဒန်းလို့ခေါ်တဲ့အကောင်လေးတွေရှိတယ်။ အဲဒီအကောင်လေးတွေဆိုရင် အပြာရောင်ဝိုင်းဝိုင်းလေးတွေ၊ အဲဒါကြောင့် လူတွေက ချစ်ဖို့ကောင်းလို့ ကိုင်တတ်ကြတယ်။ သောင်ပြင်မှာ သူတို့က တင်နေတယ်။ လူတွေက ကောက်ကိုင်ကြတယ်။ အဆိပ်ရှိတဲ့အကောင်တွေမျိုးဖြစ်နေမယ်ဆိုရင် ဒီအဆိပ်တွေက လူကိုထိခိုက်စေမယ်ပေါ့။ အဲဒီခါမှာ မလိုလားအပ်တဲ့ပြဿနာတွေ ဖြစ်သွားနိုင်တယ်။ ကျွန်တော်တို့အနေနေဲ့ အကြံပြုချင်တာက ပင်လယ်ကမ်းခြေရောက်တယ်ဆိုရင် လျှောက်ပြီးတော့ မကိုင်ကြဖို့ ၊ ကိုယ်သိတဲ့ အန္တရာယ်ကင်းတယ်လို့ သိတဲ့အ‌ကောင်တွေ ခရုတို့၊ ဂဏန်းတို့ အဲဒီလိုအကောင်တွေက လွဲရင် ကျန်တဲ့ဟာလေးတွေကို မကိုင်ကြဖို့ပေါ့။ ကိုင်ပြီဆိုရင် မြွေတင်မကဘူး တခြား ပင်လယ်ရေခူတွေမှာလည်း အဆိပ်ပြင်းတဲ့ ရေခူမျိုးတွေရှိတယ်။ အဲဒီအခါမှာ လူကိုထိခိုက်စေနိုင်တယ်”ဟု ၎င်းက ပြောသည်။

ပင်လယ်သတ္တဝါများထဲတွင်  ပင်လယ်မြွေ၊ ဂျပ်မြွေ၊ ဂျပ်ပြားမြွေ နှင့် ဂျပ်လုံးမြွေတို့သည် ရေထဲတွင်သာ နေသော်လည်း အစာချက်ရန် ၊ ဥဥရန် နှင့် နေရောင်ခြည်ဓာတ်ကို စုပ်ယူရန် စသည်တို့အတွက် ကမ်းခြေသို့ တက်လာကြကြောင်း သိရသည်။

“ဂျပ်မြွေက လူတွေထင်သလိုမျိုး စွာတဲ့ပုံစံမျိုးတော့မရှိဘူး။ ကိုက်ခဲတယ်။ တော်ယုံတန်ယုံဆို ကိုင်လို့ရတဲ့ထိ ဖြစ်တယ်။ ကိုင်လို့ရတယ်ဆိုပြီး ကိုင်ကြတယ်။ တစ်ချို့ဒေသမှာဆို ဘုရားမြွေပဲ အဆိပ်မရှိဘူးဆိုပြီးတော့‌တွေးကြတယ်။ အဲဒီလိုတော့မဟုတ်ဘူး သူ့ရဲ့အဆိပ်ကပြင်းတယ်။ အဲဒီအဆိပ်က လူတွေရဲ့ အာရုံကြောစနစ်ကိုပျက်စီးစေနိုင်တယ်။ ဂျပ်မြွေအကိုက်ခံရပြီဆိုရင် လူကအိပ်ချင်လာတယ်။ ပြီးရင် အိပ်ချင်လာပြီးတော့ အာရုံကြောကိုတိုက်ခိုက်ခံရတော့ မလှုပ်မရှားနိုင်တွေဖြစ်တယ်။ အဲဒါကြောင့်မို့ နောက်ဆက်တွဲလက္ခဏာတွေဖြစ်တတ်တယ်ပေါ့။ အသက်ရှူစက်ရှိတဲ့ ဆေးရုံကိုသွားပြီးတော့ အမြန်ဆုံးကုသမှုခံယူစေဖို့ လိုအပ်တယ်”ဟု ၎င်းကဆက်လက်ပြောသည်။

ဂျပ်မြွေအကိုက်ခံရပါက နာကျင်ပူလောင်မှုမရှိသော်လည်း ပါးစပ်တွင် ချွဲပျစ်‌‌စေးကပ်လျက် မျက်စိမှုန်ဝေကာ စကားလည်း မပြောနိုင်ဘဲ အိပ်ချင်လာပြီး အိပ်ပျော်သွားရာမှ တဖြည်း ဖြည်း အသက်ရှူရပ်သွားတတ်ကြောင်း သိရသည်။