သုတကျော် (NSS) - ဧပြီ ၈

မြန်မာနိုင်ငံတွင် လူအချင်းချင်းကြား ယုံကြည်မှု ကျဆင်းနေပြီး ရန်ကုန်မြို့တွင် နေထိုင်သူများ၌ အခြားတိုင်း ဒေသကြီးနှင့် ပြည်နယ်များထက် ပိုမိုကျဆင်းနေကြောင်း အဖွဲ့အစည်းတစ်ခုက ပြုလုပ်သည့် စစ်တမ်းတွင် ဖော်ပြထားသော အချက်အလက်များအရ သိရသည်။

အဆိုပါ စစ်တမ်းကို ပြည်တွင်းအရပ်ဘက် အဖွဲ့အစည်းတစ်ခုဖြစ်သည်ဟု Blue Shirt Initiative ကကောက်ယူပြီး ယခုလ (၂၀၂၄ ခုနှစ် မတ်လ)တွင် ထုတ်ပြန်ခဲ့ခြင်းဖြစ်ကာ မြို့နယ် ပေါင်း ၂၃၃ မြို့မှ လူပေါင်း ၂၈၉၂ ဦးကို မေးမြန်းခဲ့ခြင်းဖြစ်ကြောင်း သိရသည်။ အဆိုပါ စစ်တမ်းအတွင်း လူအချင်းချင်းကြား ယုံကြည်မှုဆိုသော ယုံကြည်မှုခေါင်းစဉ်အောက်မှထည့်သွင်း မေးမြန်းခဲ့ရာ စစ်တမ်းဖြေဆိုသူ ၈၄ ရာခိုင်နှုန်းက လူအများစုအပေါ် မယုံကြည်ဟု ဖြေကြားခဲ့ကာ ယခု စစ်တမ်းပါရရှိသော အချက်အလက်အရ ယခုကဲ့သို့ ယုံကြည်မှု ကျဆင်းနေခြင်းမှာ လူ့အဖွဲ့အစည်းအတွင်း လူမှုအရင်းအမြစ် ခိုင်မာအားကောင်းလာရေးအတွက် စိုးရိမ်စရာတစ်ခုအဖြစ် သတိပြုသင့်ကြောင်းလည်း ဖော်ပြထားသည်။  

အဆိုပါ စစ်တမ်းအရ ပထဝီနယ်မြေများကို ခွဲခြားမည်ဆိုပါက တိုင်းဒေသကြီးများတွင် ဖြေဆိုသူ အားလုံး၏ ၈၅ ရာခိုင်နှုန်းက မယုံကြည်ဟုဖော်ပြကာ ပြည်နယ်များတွင် ၈၃ ရာခိုင်နှုန်းက မယုံကြည်ဟု ဖော်ပြကာ ရန်ကုန်မြို့တွင်မူ ၈၆ ရာခိုင်နှုန်းက မယုံ ကြည်ဟု ဖော်ပြခဲ့ပြီး ရန်ကုန်မြို့က အများဆုံးဖြစ်နေသည်ကိုတွေ့ရသည်။ 

ကျား နှင့် မ အချိုးအစားတွင်မူ အမျိုးသမီးများက အများဆုံး မယုံကြည်ကြခြင်းဖြစ်ကြောင်းသိရကာ ကျား၊ မ အသက်အရွယ်အလိုက် မယုံကြည်မှုဆိုပါက အသက်အရွယ်အားလုံးက မယုံကြည်ခြင်းဖြစ်နေကြောင်းလည်း သိရသည်။ 

ပြည်တွင်း အရပ်ဘက်အဖွဲ့အစည်းတစ်ခုဖြစ်သည့်  PACE အဖွဲ့က ၂၀၁၅ - ၂၀၂၀ ပြည့်နှစ်အတွင်း ဖော်ပြသော စစ်တမ်းနှင့် နှိုင်းယှဉ်ပါက ယခုရရှိခဲ့သော အခြေအနေသည် ပိုမိုကျဆင်းနေသည်ကို တွေ့ရကြောင်းလည်း ဖော်ပြထားသည်။

ယုံကြည်မှုဆိုသည်မှာ လူပုဂ္ဂိုလ်တစ်ဦးက အခြားသူတစ်ဦးဦးကို သတ်မှတ်ဆုံးဖြတ်ပေးသော စံနှုန်းတစ်ခုဖြစ်ပြီး စစ်တမ်းတွင်ပါဝင်သည့် ယုံကြည်မှုတွင် မိမိအနားသို့ဖြစ်စေ၊ မိမိအနီးမှဖြစ်စေ လူပုဂ္ဂိုလ်တစ်ဦးဦးအပေါ် ယုံကြည်စိတ်ချစွာ စကား လက်ခံပြောဆိုခြင်း၊ ဆွေးနွေးတိုင်ပင်ခြင်း၊ လုပ်ငန်းတူ လုပ်ကိုင်ခြင်း အစရှိသည့် နှီးနွှယ်ပတ်သက်မှုများကို အဓိကရည်ရွယ်ထား ပုံရသည်။ လက်ရှိ မြန်မာနိုင်ငံ၏အခြေအနေသည် အရောင်ဝါဒနှင့် လူပုဂ္ဂိုလ်အပေါ် အခြေခံသော နိုင်ငံရေးရပ်တည် ချက်များကြောင့် မိသားစုဝင်အချင်းချင်းဖြစ်စေ၊ သားအမိ သားအဖချင်းပင်ဖြစ်စေ စိတ်ဝမ်းကွဲပြား နေသော အနေအထားမျိုးတွင်ရှိနေသည့်အတွက် မိသားစုမဟုတ်သော အခြားသူတစ်ဦးဦးအပေါ် ယုံကြည်မှုကျဆင်းခြင်းမှာ မတည်မငြိမ်ဖြစ်နေသော တိုင်းပြည်တိုင်းလိုလိုတွင် ဖြစ်ပွားလေ့ရှိသည်။ ပညာရည်နိမ့်ပါးလာခြင်း သို့မဟုတ် ပညာတတ်သော်လည်း စာသာတတ်ပြီး ကိုယ်ချင်းစာတရားနှင့် စာနာ ထောက်ထားမှု ဆင်ခြင်တုံတရားကင်းမဲ့ လာသော ခေတ်အခြေအနေမျိုးတွင် ယင်းကဲ့သို့ နိုင်ငံသားအချင်းချင်း ယုံကြည်မှုများလည်း ကျဆင်းတတ်သည်ဟု စစ်တမ်းအချို့ကဆိုသည်။