ယွန်း (NSS) - မတ် ၂၄ 

လုံခြုံရေးအခြေအနေအရ မီတာဖတ်ရှုခြင်းနှင့် ဘေလ်ပေးဝေရန်ခက်ခဲနေသည့် ဓာတ်အားခပေး ဆောင်ခြင်း မရှိသော စစ်ကိုင်းမြို့နယ်အတွင်းမှ ကျေးရွာ(၁၀)ရွာကို ဓာတ်အားဖြတ်တောက်ထားကြောင်း နစကမှ ထုတ်ပြန်ထားသည်။

စစ်ကိုင်းမြို့နယ်တွင် မြို့ပေါ်ရပ်ကွက်(၂၃)ရပ်ကွက်နှင့်ကျေးရွာ(၈၂)ရွာရှိပြီး မီးသုံးသူဦးရေ (၄၃၉၄၇) ဦး ရှိရာ မြို့ပေါ်ရပ်ကွက်(၂၂)ရပ်ကွက်ရှိ မီးသုံးသူဦးရေ (၁၇၈၈၃) ဦးကို လစဉ်မီတာဖတ်ရှု၍ မီတာဘေလ် ပေးဝေခြင်းကို ဆောင်ရွက်လျက်ရှိကြောင်းသိရသည်။ သို့သော် ကျန်ရှိသည့် ပဲကတိုးရပ်ကွက်ရှိ မီးသုံးသူဦးရေ (၄၁၀)ဦးနှင့် ကျေးရွာ (၈၂)ရွာရှိ မီးသုံးသူဦးရေ (၂၅၆၅၄)ဦး စုစုပေါင်း (၂၆၀၆၄)ဦးကို နယ်မြေလုံခြုံရေး အခြေအနေအရ ကျေးရွာများသို့ မီတာဖတ်ရှုခြင်းနှင့် ဘေလ်ပေးဝေခြင်းများကို ဆောင်ရွက်ရန် အခက်အခဲများရှိနေကြောင်း နစကမှ ဆိုထားသည်။

ထို့ကြောင့် ဓာတ်အားခပေးဆောင်နိုင်ခြင်းမရှိသော ကျေးရွာ(၁၀)ရွာကို ဓာတ်အားဖြတ်တောက်ထားကြောင်း နစကမှထုတ်ပြန်ထားသည်။ ထို့ပြင် စစ်ကိုင်းမြို့နယ် လျှပ်စစ်အင်ဂျင်နီယာရုံးအနေဖြင့် ဓာတ်အား ခငွေ လက်ခံ ကောင်တာများကို ပိတ်ရက်မရှိဘဲ ဖွင့်လှစ်ထားပြီး ဝန်ထမ်း(၂၉)ဦးဖြင့် အလှည့်ကျတာဝန်ယူ၍ ဓာတ်အားခငွေများ ကောက်ခံလျက်ရှိရာ နေ့စဉ် မီးသုံးသူဦးရေ(၁၂၀ဝ)ဦးခန့် မီတာဘေလ်များ ပေးဆောင် လျက်ရှိကြောင်း သိရသည်။

အလားတူ စစ်ကိုင်းမြို့နယ်အတွင်းရှိ မီးသုံး သူများအနေဖြင့် Mobile Application များဖြစ်သည့် ပြည်တွင်း ဘဏ်များမှတစ်ဆင့် ဓာတ်အားခများကို အလွယ်တကူပေးဆောင်နိုင်ရေး သက်ဆိုင်ရာဘဏ်များဖြင့် ဆောင်ရွက် ထားကြောင်း နစကမှ ဆိုထားသည်။ တပ်မတော်က နိုင်ငံတော်အာဏာရယူခဲ့သည့် ၂၀၂၁ ခုနှစ် ဖေဖော်ဝါရီလ နောက်ပိုင်းမှစ၍ ၂၀၂၂ ခုနှစ် မေလအထိ လျှပ်စစ်မီတာခ မပေးဆောင်မှုများကြောင့် မီတာခကြွေးကျန် ငွေကျပ် (၅၁၀ ဒသမ ၄၅၅)ဘီလျံရှိခဲ့ကြောင်း သိရသည်။

ထို့ကြောင့် လိုက်လံကောက်ခံမှုများဆောင်ရွက်ခဲ့ရာ ငွေကျပ် (၂၆၅)ဘီလျံသာရရှိခဲ့ပြီး ၂၀၂၃ ခုနှစ်၊ ဇူလိုင် လအထိ ဆက်လက်တောင်းခံရန် ကျန်ရှိနေသည့် လျှပ်စစ်မီတာခကြွေးကျန်သည် ငွေကျပ်(၂၄၄ ဒသမ ၆၁၉) ဘီလျံရှိခဲ့ရာ လက်ရှိအချိန်၌ (၉၆) ရာခိုင်နှုန်းအထိ ကောက်ခံပြီးဖြစ်ကြောင်း သိရသည်။