Pika (NSS) - မတ် ၉

အမေရိကန်-မက္ကဆီကို နယ်စပ်တစ်လျှောက်တွင် ကင်းလှည့်တာဝန်ကျနေသော အမျိုးသားအစောင့်ရဟတ်ယာဉ်တစ်စီးသည် မတ်လ(၈)ရက်တွင် တက္ကဆက်ပြည်နယ်မှာ ပျက်ကျခဲ့ပြီး စစ်သား(၂)ဦးနှင့် အမေရိကန် နယ်ခြားစောင့်တပ်သားတစ်ဦး သေဆုံးခဲ့ကြောင်း စစ်ဘက်ဆိုင်ရာတာဝန်ရှိသူများကပြောကြားခဲ့သည်။

ထို့ပြင် ရဟတ်ယာဉ်ပျက်ကျမှုအတွင်း အခြားစစ်သားတစ်ဦးလည်း ထိခိုက်ဒဏ်ရာရရှိခဲ့ကြောင်းသိရသည်။UH-72 Lakota ရဟတ်ယာဉ်သည် မတ်လ (၈)ရက်၊ နေ့လည်(၂)နာရီ (၅၀)မိနစ်အချိန်တွင် တက္ကဆက်ပြည်နယ် Rio Grande မြို့အနီးမှာ ဝေဟင်စောင့်ကြည့်ရေးနှင့် ထောက်လှမ်းရေးလုပ်ငန်းများလုပ်ဆောင်နေစဉ် ပျက်ကျခဲ့ခြင်းဖြစ်ကြောင်း အမေရိကန်စစ်တပ်ဗိုလ်မှူး Ryan Wierzbicki ကပြောကြားခဲ့သည်။ အဆိုပါရဟတ်ယာဉ်ပျက်ကျရသည့် အကြောင်းအရင်းကို ဆက်လက်စုံစမ်းစစ်ဆေးနေဆဲဖြစ်ကြောင်း အမေရိကန်စစ်တပ်က ပြောကြားခဲ့သည်။ ထို့ပြင် သေဆုံးသူများနှင့် ထိခိုက်ဒဏ်ရာရရှိသူများ၏ နာမည်များကို ၎င်းတို့၏ဆွေမျိုးသားချင်းများထံ အကြောင်းကြားစာပေးပို့ခြင်းအား ဆိုင်းငံ့ထားကြောင်းလည်း သိရသည်။

အဆိုပါရဟတ်ယာဉ်ကို တက္ကဆက်ပြည်နယ် Fort Bliss စစ်တပ်စခန်းနှင့် ချိတ်ဆက်ထားသော Joint Task Force North နှင့် အနောက်တောင်နယ်စပ် ထောက်ပံ့ရေးမစ်ရှင်တွင် တာဝန်ပေးအပ်ထားခြင်းဖြစ်ကြောင်း Ryan Wierzbicki ကပြောကြားခဲ့သည်။ ထို့ပြင် အဆိုပါရဟတ်ယာဉ်သည် ၂၀၂၁ ခုနှစ်တွင် တက္ကဆက်ပြည်နယ် အုပ်ချုပ်ရေးမှူး Greg Abbott က စတင်ခဲ့သည့် နယ်ခြားစောင့်ကြည့်ရေးအစီအစဉ်ဖြစ်သည့်  Operation Lone Star ၏ တစ်စိတ်တစ်ပိုင်းမဟုတ်ကြောင်း နှင့်  တက္ကဆက်ပြည်နယ်အမျိုးသားအစောင့်တပ်များနှင့် တက္ကဆက်ပြည်နယ် ပြည်သူ့ဘေးကင်းရေးဌာနတို့တွင် အသုံးပြုသည့် ရဟတ်ယာဉ်ဖြစ်ကြောင်း Ryan Wierzbicki ကပြောကြားခဲ့သည်။