ယွန်း (NSS) - မတ် ၇

၂၀၂၄ ခုနှစ်၊ ဖေဖော်ဝါရီလအတွင်း ငွေကျပ် ၄၇ သန်းကျော် တန်ဖိုးရှိ တရားမဝင်စက်သုံးဆီများ ဖမ်းဆီးရမိခဲ့ကြောင်း ကုန် သွယ်မှု နှင့် ကုန်စည်စီးဆင်းမှုများ မှန်ကန်မြန်ဆန်စေရေးဗဟိုကော်မတီဥက္ကဋ္ဌက အသိပေးပြောကြားထားသည်။

ကုန်သွယ်မှုနှင့်ကုန်စည်စီးဆင်းမှုများ မှန်ကန်မြန်ဆန်စေရေးဗဟိုကော်မတီဥက္ကဋ္ဌ၊ ဗိုလ်ချုပ်ကြီး မြထွန်းဦးက ပြီးခဲ့သည့် ရက်ပိုင်းတွင် အဆိုပါကော်မတီ၌ ကျင်းပခဲ့သည့် လုပ်ငန်းညှိနှိုင်းအစည်းအဝေးတွင် အထက်ပါကဲ့သို့ ပြောကြားခဲ့ခြင်းဖြစ်သည်။

ကော်မတီအနေဖြင့် တရားမဝင်စက်သုံးဆီများ ရောင်းချမှုမရှိစေရေးကို ကြပ်မတ်ဆောင်ရွက်လျက်ရှိပြီး တိုင်းဒေသကြီး/ပြည် နယ်များတွင် ၂၀၂၄ ခုနှစ်၊ ဖေဖော်ဝါရီလအတွင်း ခန့်မှန်းငွေကျပ် (၄၇ ဒသမ ၉၉၂)သန်း တန်ဖိုးရှိသည့် တရားမဝင် စက်သုံးဆီစုစုပေါင်း (၁၄ ဒသမ ၂၇၄)တန် ဖမ်းဆီးရမိခဲ့ကြောင်း သိရသည်။

အဆိုပါဖမ်းဆီးရမိသော စက်သုံးဆီများအနက် တနင်္သာရီတိုင်းတွင် ငွေကျပ်(၁၂)သန်းတန်ဖိုးရှိသည့် စက်သုံးဆီ(၃ ဒသမ ၈၁၀) တန်နှင့် မကွေးတိုင်းတွင် ခန့်မှန်းငွေကျပ်(၃၅ ဒသမ ၉၉၂)သန်း တန်ဖိုးရှိ စက်သုံးဆီ (၁၀ ဒသမ ၄၆၄)တန်ဖမ်းဆီးရမိခဲ့ကြောင်း ဗိုလ်ချုပ်ကြီးမြထွန်းဦးက ပြောကြားထားသည်။

စက်သုံးဆီဆိုင်များ အဆင်ပြေစွာ ရောင်းချနေမှုအား အချိန်နှင့်တပြေးညီသိရှိစေရန် ပြီးခဲ့သည့် ၂၀၂၃ ခုနှစ်၊ နိုဝင်ဘာ ၁၄ ရက်မှ ၂၀၂၄ ခုနှစ်၊ ဖေဖော်ဝါရီ ၂၉ ရက်အထိ နေပြည်တော် အပါအဝင် တိုင်းဒေသကြီးနှင့် ပြည်နယ်များရှိ စက်သုံးဆီ Terminal များနှင့် စက်သုံးဆီအရောင်းဆိုင်များအား CCTV Link ချိတ်ဆက်ပြီးစီးမှုအနေဖြင့် စုစုပေါင်း Terminal (၈) ခုနှင့် စက်သုံးဆီဆိုင် (၅၉၁) ဆိုင်အား ချိတ်ဆက်ဆောင်ရွက်ထားကြောင်း သိရသည်။

ထို့ပြင် ဆီဘောက်ဆာယာဥ်များ ဖြတ်သန်းသွားလာမှုအခြေ အနေများကိုသိရှိရန် နေပြည်တော်အပါအဝင် တိုင်းဒေသကြီးနှင့် ပြည်နယ်များရှိ Toll Gate များတွင် CCTV Camera များတပ်ဆင်ထားပြီး Toll Gate ပေါင်း(၅၂)ခု နှင့် CCTV အရေအတွက် (၅၄၂)ခု တပ်ဆင်ထားကြောင်း သိရသည်။ ပြီးခဲ့သည့်ရက်ပိုင်းတွင် ရန်ကုန်မြို့ရှိ အချို့သောစက်သုံးဆီဆိုင်များ၌ ကားအများအပြား တန်းစီစောင့်ဆိုင်းကာ ဝယ်ယူနေရသည့် ဖြစ်စဉ်များရှိနေသကဲ့သို့ အချို့ဆီဆိုင်များတွင်လည်း ဆီပြတ်လပ်မှုဖြစ်စဉ်များဖြစ်ပေါ်ခဲ့သည်။