မြူနစ် (NSS) - မတ်  ၂ 

ကရင်ပြည်နယ်နယ်ခြားစောင့်တပ် (BGF)  ကို KNA အဖြစ် အမည်ပြောင်းကာ ပြောင်းလဲရပ်တည်သွားမည်ဖြစ်ကြောင်း သိရသည်။

နယ်ခြားစောင့်တပ် (BGF) ကို ကရင်အမျိုးသားတပ်မတော် (Karen National Army-KNA)အဖြစ် အမည် ပြောင်းကာ ပြောင်းလဲရပ်တည်ရန် ဆုံးဖြတ်ထားပြီးဖြစ်ကြောင်း အဆိုပါ BGF အသိုင်းအဝိုင်းထံမှ သိရသည်။

“ ဟုတ်တယ်လို့ သိရတယ်။ KIC သတင်း ဌာနတို့၊ ဘာတို့မှာလည်း တရားဝင်ထုတ်ပြောတာတွေ တွေ့ရတယ်။ ပြီးတော့ မြဝတီတောင်တက်လမ်း ထို့ကော်ကိုးလမ်းဘက်ကနေပြီးတော့မှ ထွက်တဲ့တောင်တက်လမ်းမှာ ခရီးသွားလမ်းညွှန် အဲဒီဂိတ်တွေမှာလည်း တရားဝင် ရဲဘော်သစ်လက်ခံတယ်ဆိုတဲ့ဟာလေးတွေလည်း ဘုတ်တင်ထားတာ တွေ့ရတယ်။ တရားဝင်ထုတ်ပြောတာတော့ သိရတယ်”ဟု BGF အဖွဲ့ဝင်ဟောင်းဖြစ်ခဲ့သော သတင်းအရင်းအမြစ်က NSS ကို ပြောသည်။ ကရင် ပြည်နယ်၊ နယ်ခြားစောင့်တပ် (BGF)သည် တပ်မတော်ထံမှ လစာနှင့်ရိက္ခာများကို ရယူခဲ့သော အဖွဲ့အစည်း တစ်ရပ်ဖြစ်ပြီး၎င်းတို့တွင် တပ်ရင်း (၁၃)ရင်းအထိ ရှိကြောင်းလည်း သိရသည်။

“ကျွန်တော့်အထင် ပြောရရင်တော့ သူတို့ က KNA ဖွဲ့စည်းလိုက်တဲ့သဘောကတော့ ကရင်အမျိုးသားချင်းလည်း မတိုက်ချင်တော့ဘူး။ ကရင်လက်နက်ကိုင်အဖွဲ့အစည်းချင်းလည်း စည်းလုံးညီညွတ်ရမယ်ဆိုတဲ့သဘော အဲဒီ သဘောပေါ့နော်။ တပ်မတော်နဲ့လည်း သူ့လမ်းသူသွား၊ ကိုယ့်လမ်း ကိုယ်သွား ကြားနေဝါဒပေါ့နော်။ ဒေသတွင်း ငြိမ်းချမ်းအောင် ဆောင်ရွက်မယ်ဆိုတဲ့သဘော။ နောက်ပြီးတော့ KNU နဲ့လည်း တိုက်တဲ့ခိုက်တဲ့အလုပ် မလုပ်ချင်တော့ဘူးဆိုတဲ့သဘော။ သီးခြားရပ်တည်ပြီးတော့ အလယ်အလတ်လမ်းစဉ်ကို သွားမယ်လို့ မြင်တယ်ဗျ”ဟု အထက်ပါသတင်းအရင်းအမြစ်က ပြောသည်။

 နယ်ခြားစောင့်တပ် (BGF)ကို တပ်မတော်လက်အောက်မှ ခွဲထွက်ကာ ပြောင်းလဲရပ်တည်သွားမည်ဖြစ်ကြောင်း ပြီးခဲ့သော ကာလများ၌ BGF အဖွဲ့မှ ဗိုလ်မှူးကြီးစောချစ်သူက မီဒီယာများကို ထုတ်ဖော်ပြောဆိုခဲ့ဖူးသည်။ အဆိုပါကိစ္စနှင့် ပတ်သက်၍ လွန်ခဲ့သောကာလများအတွင်း၌  BGF နှင့်ဒုတိယတပ်မတော်ကာကွယ်ရေးဦးစီးချုပ် ဒုတိယဗိုလ် ချုပ်မှူးကြီးစိုးဝင်းတို့သည် မြဝတီမြို့တွင် တွေ့ဆုံညှိနှိုင်းမှုများ ပြုလုပ်ခဲ့ဖူးကြောင်း သိရသည်။

 “ကျွန်တော်လည်း သူများပြောပြလို့ ကြား နေရပါတယ်။ စောချစ်သူက သူတို့လည်း ဖြတ်သန်းမှုအများကြီး ရှိနေတဲ့အပေါ်မှာတော့ ဆိုးယုတ်တဲ့အခြေအနေမျိုးတော့ ဆောင်ရွက်လိမ့်မယ် မထင်ဘူး။ ကျွန်တော် မြင်တာပေါ့လေ”ဟု KNU ကော့ကရိတ်ခရိုင်ဥက္ကဋ္ဌ ပဒိုစောရွှေမောင်းက NSS ကို ပြောသည်။

သို့သော် ကရင်ပြည်နယ်၊ နယ်ခြားစောင့်တပ်(BGF)သည် KNA အမည်ဖြင့် ပြောင်းလဲ ရပ်တည်မည့် အကြောင်းကို လက်ရှိချိန်ထိ တရားဝင်ထုတ်ပြန်ကြေညာခြင်းမျိုး မရှိသေးပေ။ ထိုသို့ KNAအမည်ဖြင့် တရားဝင်ပြောင်းလဲရပ်တည်မည်ဆိုပါက ကရင်ပြည်နယ်အတွင်း၌ KNU/KNLA၊DKBA၊ KNU/KNLA-PC၊ KNA ဟူ၍ လက်နက်ကိုင်(၄)ဖွဲ့အထိ ရှိလာမည်ဖြစ်သည်။