ယွန်း (NSS) - မတ် ၁

မောင်းပြန်ရိုင်ဖယ်သေနတ်အချို့နှင့်အတူ ဥပဒေဘောင်အတွင်း ဝင်ရောက်လာသည့် PDF အဖွဲ့ဝင်(၁၂)ဦးကို ငွေကျပ်သိန်း(၃၀၀)ကျော် ထောက်ပံ့ခဲ့ကြောင်း နစကမှ ဖေဖော်ဝါရီ(၂၉)ရက်  ညပိုင်းတွင် ထုတ်ပြန်ထားသည်။

ဥပဒေဘောင်အတွင်း ပြန်လည်ဝင်ရောက်လာသူများမှာ စစ်ကိုင်းတိုင်း‌ဒေသကြီး တမူးမြို့၊ ခန္တီးမြို့၊ ဖောင်းပြင်မြို့၊ ကလေးမြို့၊ မုံရွာမြို့နှင့် မကွေးတိုင်း ဒေသကြီး၊ ပခုက္ကူမြို့တို့မှ PDF အဖွဲ့ဝင် အမျိုးသား ၁၀ ဦးနှင့် အမျိုးသမီး ၂ ဦး တို့ဖြစ်ကြောင်း ထုတ်ပြန်ချက်အရ သိရသည်။

၎င်း PDF အဖွဲ့ဝင် (၁၂)ဦး ပြန်လည်လက်ခံခြင်းအခမ်းအနားကို အထက်ပါမြို့များရှိ နယ်မြေခံတပ်နယ်ခန်းမများ၌ ပြုလုပ်ခဲ့ပြီး မိဘအုပ်ထိန်းသူများထံ ပြန်လည်အပ်နှံခဲ့ကြောင်း သိရသည်။

ဥပဒေဘောင်အတွင်းပြန်လည်ဝင်ရောက်လာသူများမှာ ၎င်းတို့နှင့်အတူပါလာသည့် MK-12 အမျိုးအစား မောင်းပြန် ရိုင်ဖယ်တစ်လက်၊ Stalliom PA-100 Short Gun အမျိုးအစား မောင်းပြန်ရိုင်ဖယ်တစ်လက် နှင့်  KUZAY-GN 19 အမျိုးအစား ပစ္စတိုတစ်လက်တို့ကိုလည်း အပ်နှံခဲ့ကြောင်း သိရသည်။

ထိုသို့အပ်နှံခဲ့ရာ MK-12 အမျိုးအစား မောင်းပြန်ရိုင်ဖယ်တစ်လက်အတွက် ဆုကြေးငွေကျပ်သိန်း ၄၀၊ Stalliom PA-100 Short Gun အမျိုးအစား မောင်းပြန် ရိုင်ဖယ်တစ်လက်အတွက် ဆုကြေးငွေကျပ်သိန်း ၄၀၊ KUZAY-GN 19 အမျိုးအစားပစ္စတိုတစ်လက်အတွက် ငွေကျပ်သိန်း(၂၀) နှင့် အလင်းဝင်ရောက်လာသူ ၁၂ ဦးအတွက် တစ်ဦးလျှင် ဆုကြေးငွေကျပ်သိန်း ၂၀ စုစုပေါင်းငွေကျပ်သိန်း ၃၄၀ ပေးအပ်ခဲ့ကြောင်း နစကမှ ထုတ်ပြန်ထားသည်။