Pika (NSS) - ဖေဖော်ဝါရီ ၂၉

ရုရှားနိုင်ငံသား စီးပွားရေးလုပ်ငန်းရှင် ဖီးလစ်ဒီမင်းသည် ပင်လယ်ရေမျက်နှာပြင်အထက်(၁၅၀)မီတာမြင့်သော အင်ဒိုနီးရှားနိုင်ငံ ဘာလီကျွန်းရှိ ချောက်ကမ်းပါးတစ်ခုပေါ်တွင် Boeing 737 လေယာဉ်ကို Private Jet ဇိမ်ခံ အပန်းဖြေစံအိမ်တစ်ခုအဖြစ် ပြောင်းလဲတည်ဆောက်ခဲ့ကြောင်း သိရသည်။

အသုံးမပြုတော့သောလေယာဉ်များကို နေအိမ်များ၊စားသောက်ဆိုင်များနှင့် ပြတိုက်များအဖြစ် ပြောင်းလဲထား သည်ကို ယခင်တည်းကမြင်တွေ့ခဲ့ရသော်လည်း ဖီးလစ်ဒီမင်း၏ Boeing 737 လေယာဉ်ကို Private Jet ဇိမ်ခံ အပန်းဖြေစံအိမ်အဖြစ် ပြောင်းလဲတည်ဆောက်နိုင်ခဲ့ခြင်းမှာ အံ့ဩဖွယ်ကောင်းသည့်လုပ်ရပ်တစ်ခုအဖြစ် ပြောဆိုမှု များလည်းရှိနေသည်။

ဖီးလစ်ဒီမင်းသည် Boeing 737 လေယာဉ်ကို ဘာလီကမ်းရိုးတန်းရှိ ချောက်ကမ်းပါးတစ်ခုပေါ်တွင် အိပ်ခန်း နှစ်ခန်း ပါသောအပန်းဖြေစံအိမ်အဖြစ် ပြောင်းလဲတည်ဆောက်နိုင်ခဲ့ခြင်းဖြစ်သည်။ အဆိုပါပရောဂျက်ကို အချိန်(၃)နှစ် ကြာအောင်ပြုလုပ်ခဲ့ရပြီး Boeing 737 လေယာဉ်ကိုသယ်ယူမှု အပါအဝင် စိန်ခေါ်မှုများစွာကို ရင်ဆိုင်ခဲ့ရကြောင်း လည်း သိရသည်။

ဖီးလစ်ဒီမင်းသည် ယင်းအခက်အခဲများ အားလုံးကိုကျော်ဖြတ်ကာ ပြောင်းလဲတည်ဆောက်မှုများ လုပ်ဆောင်နိုင်ခဲ့ ပြီးနောက် Private Jet ဇိမ်ခံအပန်းဖြေစံအိမ်သည် ဘာလီကျွန်းပေါ်တွင် အထင်ရှားဆုံး တည်းခိုခန်းများထဲမှ တစ်ခု ဖြစ်လာခဲ့ကြောင်းသိရသည်။

ဖီးလစ်ဒီမင်းက "ဒီ Boeing 737 လေယာဉ်ကို ထူးခြားတဲ့အရာတစ်ခုအဖြစ် ပြောင်းလဲနိုင်မယ်လို့ ထင်ခဲ့တာကြောင့် ဇိမ်ခံအပန်းဖြေစံအိမ်အဖြစ် ပြောင်းလဲတည်ဆောက်ဖို့ ဆုံးဖြတ်ခဲ့တာပါ။ လူတွေကို ဒီလိုထူးခြားတဲ့ ဇိမ်ခံ အပန်းဖြေ စံအိမ်မှာ စက္ကန့်တိုင်း အံ့ဩမှုတွေကို ခံစားစေချင်တာပါ" ဟု ပြောခဲ့သည်။ 

ဖီးလစ်ဒီမင်းသည် လက်ရှိအချိန်တွင် ဆက်လက်လည်ပတ်ခြင်းမရှိတော့သော Mandala လေကြောင်းလိုင်းတွင် အသုံးပြုခဲ့သည့် Boeing 737 လေယာဉ်ကို အင်ဒိုနီးရှားရင်းနှီးမြှုပ်နှံသူတစ်ဦးထံမှ ဝယ်ယူခဲ့ခြင်းဖြစ်ကြောင်းလည်း သိရသည်။ 

အဆိုပါ Boeing 737 လေယာဉ်သည် ဖီးလစ်ဒီမင်းဝယ်ယူစဉ်အချိန်က ဘာလီကျွန်းပေါ်တွင် ရှိနေသော်လည်း လက်ရှိနေရာဖြစ်သည့် ချောက်ကမ်းပါးပေါ်သို့ ပြောင်းရွှေ့ရန်အတွက် စီစဉ်မှုများမှာ အချိန်(၂)လကျော် ကြာမြင့်ခဲ့ကြောင်း သိရသည်။ ထို့နောက် ဖီးလစ်ဒီမင်း၏ အဖွဲ့သည် Boeing 737 လေယာဉ်ကို တစ်ပိုင်းတစ်စီဆီ ဖြုတ်ယူကာ သယ်ဆောင်မှုများ လုပ်ဆောင်ရန် ဆုံးဖြတ်ခဲ့ကြကြောင်း သိရသည်။

၎င်းက "ကျွန်တော်တို့အဖွဲ့တွေနဲ့တိုင်ပင်ပြီးတော့ Boeing 737 လေယာဉ်ကိုတစ်စစီဖြုတ်ယူပြီး သယ်ဆောင်ဖို့ ဆုံးဖြတ်ခဲ့ပါတယ်။ မူလီ(၅)သောင်းနီးပါးကို ကျွန်တော်တို့ ဖြုတ်ခဲ့ရပါတယ်" ဟု ပြောခဲ့သည်။ 

ဖီးလစ်ဒီမင်းသည် Boeing 737 လေယာဉ်ခေါင်းခန်းကို သမုဒ္ဒရာနှင့် ကောင်းကင်ကို ကြည့်ရှုနိုင်မည့် ရေချိုးခန်း အဖြစ် ပြောင်းလဲခဲ့ပြီး လေယာဉ်တောင်ပံတစ်ခုကို မှန်များဖြင့် ကာထားသော လျှောက်လမ်းတစ်ခုအဖြစ် ပြောင်းလဲခဲ့ကြောင်း သိရသည်။ Private Jet ဇိမ်ခံအပန်းဖြေစံအိမ်၏ လက်ရှိတည်နေရာကြောင့် ဘေးကင်းရေးနှင့် ပတ်သက်သည့်စိုးရိမ်မှုများရှိနေသော်လည်း လေယာဉ်သည် စစ်ဆေးမှုအများအပြားကို လုပ်ဆောင်ထားပြီး ဘေးကင်းရေးစည်းမျဉ်းများနှင့်လည်း ကိုက်ညီကြောင်း ၎င်းက ပြောခဲ့သည်။ Private Jet ဇိမ်ခံအပန်းဖြေစံအိမ်၏ ဈေးနှုန်းများသည် တစ်ညလျှင် အမေရိကန်ဒေါ်လာ(၁၆၀၀)မှ စတင်ကာ အမျိုးမျိုးရှိသည်ဟု သိရပြီး ပက်ကေ့ချ်များသည် အမေရိကန်ဒေါ်လာ(၇၀၀၀)အထိ ရှိကြောင်းသိရသည်။