Pika (NSS) - ဖေဖော်ဝါရီ ၂၈ 

ဆွီဒင်နိုင်ငံကို နေတိုးအဖွဲ့ဝင်နိုင်ငံအဖြစ် ပါဝင်ခွင့်ပြုရန် ဟန်ဂေရီလွှတ်တော်တွင် မဲခွဲဆုံးဖြတ်မှုများ လုပ်ဆောင်ခဲ့ ကြောင်း သိရသည်။

နောက်ဆုံးရလဒ်အနေဖြင့် ဆွီဒင်နိုင်ငံ၏ နေတိုးအဖွဲ့ဝင်ဖြစ်ခွင့်ကို ဟန်ဂေရီက အတည်ပြုပေးခဲ့သည်။ ဆွီဒင်ဝန်ကြီးချုပ် Ulf Kristersson သည် ဟန်ဂေရီဝန်ကြီးချုပ် ဗစ်တာအော်ဗန် နှင့်တွေ့ဆုံရန် ဖေဖော်ဝါရီလ (၂၃)ရက်တွင် ဘူဒါပတ်စ်မြို့သို့ သွားရောက်လည်ပတ်ခဲ့ပြီးနောက် ဖေဖော်ဝါရီလ(၂၆)ရက်တွင် အဆိုပါမဲခွဲ ဆုံးဖြတ်မှုကို လုပ်ဆောင်ခဲ့ခြင်းဖြစ်ကြောင်းသိရသည်။မဲခွဲဆုံးဖြတ်မှုတွင် ဆွီဒင်နိုင်ငံ၏ နေတိုးအဖွဲ့ဝင်ဖြစ်ခွင့်ကို လွှတ်တော်အမတ်(၁၈၈)ဦးက ထောက်ခံခဲ့ပြီး ခြောက်ဦးက ဆန့်ကျင်ကန့်ကွက်ခဲ့ကြောင်း သိရသည်။ 

ရုရှားက ယူကရိန်းကို ကျူးကျော်တိုက်ခိုက်မှုများ လုပ်ဆောင်ပြီးနောက် ရုရှား၏ ခြိမ်းခြောက်မှုများ ရှိလာနိုင်ခြေနှင့် ပတ်သက်ပြီး ၂ဝ၂၂ ခုနှစ်တွင် ဆွီဒင်နှင့်ဖင်လန်နိုင်ငံတို့သည် နေတိုးအဖွဲ့ဝင်နိုင်ငံဖြစ်ခွင့်ရရန် လျှောက်ထားခဲ့ကြခြင်းဖြစ်ကြောင်း သိရသည်။ 

နေတိုးအဖွဲ့ဝင်နိုင်ငံ အများစုသည် ဆွီဒင်နှင့် ဖင်လန်နိုင်ငံတို့၏ လျှောက်ထားမှုကို အတည်ပြုပေးခဲ့ကြသော်လည်း ဟန်ဂေရီနှင့် တူရကီတို့က ချက်ချင်းအတည်ပြုပေးခြင်းမျိုးမရှိခဲ့ကြောင်း သိရသည်။ ဟန်ဂေရီနိုင်ငံသည် ဖင်လန် နိုင်ငံ၏ နေတိုးအဖွဲ့ဝင်ဖြစ်ခွင့်ကို ပြီးခဲ့သည့်နှစ်က အတည်ပြုပေးခဲ့သော်လည်း ဆွီဒင်နိုင်ငံဝန်ကြီးချုပ် Ulf Kristersson အနေဖြင့် ဟန်ဂေရီဝန်ကြီးချုပ်ဗစ်တာအော်ဗန်နှင့်တွေ့ဆုံရန် လာရောက်လည်ပတ်ခြင်းမျိုးမရှိပါက နေတိုးအဖွဲ့ဝင်ဖြစ်ခွင့်ကို အတည်ပြုပေးမည်မဟုတ်ကြောင်း ဗစ်တာအော်ဗန်၏ပါတီ Fidesz က ပြီးခဲ့သည့်ရက်ပိုင်း တွင် ထုတ်ဖော်ပြောခဲ့ဖူးသည်။ 

သို့သော်လည်း ဆွီဒင်ဝန်ကြီးချုပ် Ulf Kristersson နှင့် ဟန်ဂေရီဝန်ကြီးချုပ် ဗစ်တာအော်ဗန်တို့ တွေ့ဆုံမှု လုပ်ဆောင်ခဲ့ပြီးနောက် ဆွီဒင်၏ နေတိုးအဖွဲ့ဝင်နိုင်ငံဖြစ်ခွင့်ကို ယခုကဲ့သို့အတည်ပြုပေးခဲ့ခြင်းဖြစ်ကြောင်း သိရသည်။ နေတိုးအဖွဲ့၏ ၎င်း၏အရှေ့ဖက်ခြမ်းသို့ချဲ့ထွင်မှုကို ရုရှားအစိုးရက အကြိမ်ကြိမ်ပြစ်တင်ရှုတ်ချခဲ့ ကြောင်းလည်း သိရသည်။

ထို့အပြင် အမေရိကန်နိုင်ငံသည် ရုရှားနှင့် ထိပ်တိုက်ရင်ဆိုင်ရန် ရည်ရွယ်ချက်ဖြင့် ကြားနေနိုင်ငံများကို နေတိုးအဖွဲ့ ထဲသို့ ဆွဲသွင်းနေခြင်းဖြစ်ကြောင်း ရုရှားနိုင်ငံခြားရေးဝန်ကြီးဆာဂေးလာရော့ဗ်က ပြီးခဲ့သည့်လတွင် စွပ်စွဲခဲ့သည်။