Pika (NSS) - ဖေဖော်ဝါရီ ၂၈ 

လက်ဘနွန်နိုင်ငံ ဘေရွတ်မြို့မြောက်ဘက်ရှိ ဟစ်ဘိုလာလက်နက်ကိုင်အဖွဲ့၏ တည်နေရာများကို ပစ်မှတ်ထားကာ လေကြောင်းမှတိုက်ခိုက်မှုများလုပ်ဆောင်ခဲ့ကြောင်း အစ္စရေးစစ်တပ်က ထုတ်ဖော်ပြောခဲ့သည်။ 

အစ္စရေးတပ်ဖွဲ့များ၏ တိုက်ခိုက်မှုများကို လက်ဘနွန်အခြေစိုက် ဟစ်ဘိုလာလက်နက်ကိုင်အဖွဲ့က ဒုံးကျည်များဖြင့် ပြန်လည်လက်တုံ့ပြန်တိုက်ခိုက်ခဲ့ကြောင်းလည်း သိရသည်။ ဖေဖော်ဝါရီလ(၂၆)ရက်တွင် လက်ဘနွန်နိုင်ငံတွင်းရှိ ဟစ်ဘိုလာလက်နက်ကိုင်အဖွဲ့အပေါ် လေကြောင်းမှတိုက်ခိုက်မှု အများအပြားလုပ်ဆောင်ခဲ့ခြင်းဖြစ်ကြောင်း အစ္စရေးတပ်ဖွဲ့ ထုတ်ပြန်ကြေညာခဲ့သည်။

အစ္စရေးလေယာဉ်များသည် လက်ဘနွန်နိုင်ငံ အရှေ့မြောက်ပိုင်း Bekaa ချိုင့်ဝှမ်းတစ်ဝိုက်ရှိ ဟစ်ဘိုလာလက်နက် ကိုင်အဖွဲ့၏နေရာများကို ဗုံးကြဲတိုက်ခိုက်ခဲ့ခြင်းဖြစ်ကြောင်းလည်း သိရသည်။ အစ္စရေးတပ်ဖွဲ့များ၏ တိုက်ခိုက်မှု (၃)ကြိမ်သည် ဘေရွတ်မြို့ အရှေ့မြောက်ဖက် (၅၅)ကီလိုမီတာ အကွာတွင်ရှိသော ဘူဒေးရွာကို ထိမှန်ခဲ့ပြီး ဟစ်ဘိုလာလက်နက်ကိုင်အဖွဲ့၏ ထရပ်ကားကို ပစ်မှတ်ထားတိုက်ခိုက်ခဲ့ခြင်းဖြစ်ကြောင်း အမည်မဖော်လိုသော လက်ဘနွန်လုံခြုံရေးသတင်းရင်းမြစ်က အေပီသတင်းဌာနသို့ ပြောကြားခဲ့သည်။

အဆိုပါတိုက်ခိုက်မှုအတွင်း ဟစ်ဘိုလာလက်နက်ကိုင်အဖွဲ့ဝင် အနည်းဆုံး(၂)ဦးသေဆုံးခဲ့ကြောင်း အမည်မဖော်လို သော ဟစ်ဘိုလာလက်နက်ကိုင်အဖွဲ့အရာရှိတစ်ဦးက ပြောကြားခဲ့သည်။ ထို့အပြင် အစ္စရေး၏ လေကြောင်းမှ တိုက်ခိုက်မှုများသည် အရပ်ဘက်ဆိုင်ရာရည်ရွယ်ချက်များအတွက် အသုံးပြုနေသော ရိက္ခာသိုလှောင်သည့် ဂိုဒေါင် တစ်ခုကို ထိမှန်ခဲ့ကြောင်းလည်း ၎င်းက ပြောကြားခဲ့သည်။

အစ္စရေး၏ လေကြောင်းမှတိုက်ခိုက်မှုများအတွင်း လက်ဘနွန်စစ်သားတစ်ဦးလည်း ပြင်းပြင်းထန်ထန် ထိခိုက် ဒဏ်ရာရရှိခဲ့သလို ၎င်း၏သားဖြစ်သူလည်း ထိခိုက်ဒဏ်ရာအနည်းငယ်ရရှိခဲ့ကြောင်း နောက်ထပ်လက်ဘနွန် အရာရှိတစ်ဦးက ပြောကြားခဲ့သည်။ အဆိုပါတိုက်ခိုက်မှုများကို လက်တုံ့ပြန်သည့်အနေဖြင့် Golan တောင်ကုန်းရှိ အစ္စရေးစစ်တပ်ကွပ်ကဲမှုစင်တာကို Katyusha ဒုံးကျည် အစင်းရေ(၆၀)ဖြင့် ပစ်မှတ်ထားတိုက်ခိုက်ခဲ့ကြောင်း ဟစ်ဘိုလာလက်နက်ကိုင်အဖွဲ့က နောက်ပိုင်းတွင် ထုတ်ပြန်ပြောကြားခဲ့သည်။

အစ္စရေး နှင့် ဟစ်ဘိုလာလက်နက်ကိုင်အဖွဲ့တို့သည် အစ္စရေး-ဟားမက်စစ်ပွဲ စတင်ဖြစ်ပွားပြီးနောက်ပိုင်းတည်းက အပြန်အလှန်ပစ်ခတ်တိုက်ခိုက်မှုများကို နေ့စဉ်နီးပါး လုပ်ဆောင်ခဲ့ကြခြင်းဖြစ်ကြောင်း သိရသည်။