Htay Oung (NSS) - ဖေဖော်ဝါရီ ၂၃

ဒါကာရဲ့ အရင်းနှီးဆုံး မိတ်ဆွေနိုင်ငံဖြစ်သူ ရုရှားက ပယ်ချလျက်ရှိတဲ့ ကိယက်ဗ်ရဲ့ငြိမ်းချမ်းရေး ဖော်နည်းမှာ ပါ၀င် အကောင်အထည်ဖော်ဖို့အတွက် ယူကရိန်းက ဘင်္ဂလားဒေ့ရ်ှနိုင်ငံကို ဖိတ်ခေါ်လိုက်ပါတယ်။ စနေနေ့ ဂျာမနီနိုင်ငံ မြူးနစ်လုံခြုံရေးညီလာခံကျင်းပစဉ် အစည်းအဝေးပြင်ပမှာ သမ္မတဗိုလိုဒီမြာဇီလင်စကီးနဲ့ ၀န်ကြီးချုပ် ရှိတ်ဟာစီနာ တို့တွေ့ဆုံခြင်းဟာ ပထမဆုံးအကြိမ်ဖြစ်တယ်လို့ ဒါကာထရီဗြွန်းက ယမန်နေ့ ရေးသားပါတယ်။

ကမ္ဘာ့ငြိမ်းချမ်းရေး ထိပ်သီးအစည်းအဝေးဖွင့်ပွဲအခမ်းအနားကို တက်ရောက်ဖို့ကိုလည်း ဘင်္ဂလားဒေ့ရှ်ကို ဖိတ် ကြား ဖိတ်ကြားခဲ့ပါတယ်။ ဒါပေမယ့် ဘင်္ဂလားဒေ့ရှ်ဟာ အားလုံးနဲ့ ချစ်ကြည်ရင်းနှီးမှုအခြေခံ နိုင်ငံခြားရေးမူဝါဒကို ကျင့်သုံးနေတဲ့နိုင်ငံဖြစ်ကြောင်း၊ ဘယ်သူ့ကိုမှ မလိုမုန်းထားမှုမျိုး မပါ၀င်ပဲ စစ်ပွဲများရပ်တန့်ရန် အားလုံးကို တောင်းဆိုပါကြောင်း ရှိတ်ဟာစီနာက ပြန်လည်ဖြေဆိုပါတယ်။ 

ယူကရိန်းရဲ့အချုပ်အခြာအာဏာနဲ့ နယ်မြေပိုင်ဆိုင်မှုကို အထူးသဖြင့် ကုလသမဂ္ဂနဲ့အတူ ထောက်ခံအားပေးမှု အတွက် ဘင်္ဂလားဒေ့ရှ်ဝန်ကြီးချုပ်ကို ကျေးဇူးတင်ရှိကြောင်း၊ ယူကရိန်းလုပ်ဆောင်မှုများမှာ ဘင်္ဂလားဒေ့ရှ်ရဲ့ ပံ့ပိုး ကူညီမှုများက အရေးပါပုံကို အလေးပေးပြောကြားခဲ့တယ်လို့ ကိယက်ဗ်သမ္မတရုံးက သတင်းထုတ်ပြန်ပါ တယ်။

စစ်ပွဲရဲ့မြေပြင်အခြေအနေနဲ့ တရားမျှတမှုကို အခြေခံထားတဲ့ ငြိမ်းချမ်းရေးအတွက် ချဉ်းကပ်ဆောင်ရွက်ရေး ယူကရိန်းရဲ့အမြင်ကို ရုရှားကျူးကျော်မှုကို တွန်းလှန်တိုက်ဖျက်နေတဲ့ သမ္မတဇီလင်စကီးက ရှိတ်ဟာစီနာကို ရှင်းပြခဲ့ကြောင်း၊ စစ်ပွဲငြိမ်းချမ်းရေးအတွက် ယူကရိန်းရဲ့ပုံသေနည်းကိုအကောင်အထည်ဖော်ရာမှာ ပါဝင်ဖို့၊  ဘင်္ဂလားဒေ့ရှ်ပြည်သူ့သမ္မတနိုင်ငံကို ဖိတ်ကြားပြီး ကမ္ဘာ့ငြိမ်းချမ်းရေး ထိပ်သီးအစည်းအဝေး ဖွင့်ပွဲအခန်းအနားမှာ တက်ရောက်ဖို့  သမ္မတဇီလင်စကီးက ဖိတ်ကြားခဲ့ကြောင်း ယူကရိန်းသမ္မတရုံး သတင်းထုတ်ပြန်ချက်မှာ ဖော်ပြ ထားပါတယ်။ 

ပင်လယ်နက်ရေပြင်မှာ  သီးနှံကုန်စည်သယ်ပို့ရေး စင်္ကြံဖန်တီးရန်၊ ပင်လယ်နက်ဒေသ ငြိမ်းချမ်းစွာ ရေကြောင်း သွားလာမှုပျက်ပြားရအောင် ရုရှားရဲ့လုပ်ရပ်များကို တားဆီးနေတဲ့ ယူကရိန်းရဲ့အားထုတ်မှုများကို သတင်းပေးခဲ့ ကြောင်း၊ ကုန်သွယ်ရေးနဲ့ စီးပွားရေးနယ်ပယ်တို့မှာ ပူးပေါင်းဆောင်ရွက်မှု အထူးသဖြင့်  ယူကရိန်းလယ်ယာထွက် ကုန်တွေ ဘင်္ဂလားဒေ့ရှ်ထံ တင်ပို့နိုင်ရေး အလားအလာများကို နှစ်နိုင်ငံခေါင်းဆောင်တို့က ဆွေးနွေးခဲ့ကြတယ်လို့ ကိယက်ဗ်သမ္မတရုံး သတင်းထုတ်ပြန်ရာမှာ ပါဝင်ပါတယ်။

ဒါပေမယ့် အဲဒီအစည်းအဝေးနဲ့ပတ်သက်ပြီး ဒါကာနဲ့ မော်စကိုတို့အကြား ဆက်ဆံရေးက အရိပ်ထိုးနေလိမ့်မယ်လို့ ထင်ကြေးပေးမှုများ ရှိခဲ့ပါတယ်။ ဇီလင်စကီးနဲ့ ရှိတ်ဟာစီနာတို့တွေ့ဆုံမှုကြောင့် ဘင်္ဂလားဒေ့ရှ်နဲ့ နှစ်နိုင်ငံ ဆက်ဆံရေးအပေါ် တစ်စုံတစ်ရာ သက်ရောက်မှု မရှိကြောင်း ဒါကာအခြေစိုက်ရုရှားသံအမတ်ကြီးက ပြောပါတယ်။ ယူကရိန်းတင်ပြနေတဲ့ငြိမ်းချမ်းရေးဖော်မြူလာကို ရုရှားက ပယ်ချကြောင်း၊ ဘင်္ဂလားဒေ့ရှ်-ရုရှားဆက်ဆံရေး တိုးတက်ကောင်းမွန်လာမယ်လို့ မျှော်လင့်ကြောင်း သံအမတ်ကြီးက ဆိုပါတယ်။

ဇီလင်စကီးရဲ့ငြိမ်းချမ်းရေးဖော်မြူလာဟာ ချို့ယွင်းချက်များ၊ အရေခြုံမှုများ ပြည့်နှက်နေပြီး  လက်တွေနဲ့ ဆက်စပ်မှုမရှိဘူးလို့ ရုရှားက အစဉ်တစိုက် ဝေဖန်ခဲ့ပါတယ်။ ရှိတ်ဟာစီနာကတော့ ဇီလင်စကီးနဲ့ တွေ့ဆုံရာမှာ စစ်ပွဲအဆုံးသတ်ရေး နည်းလမ်းရှာဖွေဖို့ကိုသာ ပြောဆိုခဲ့ပါတယ်။ 

ဘင်္ဂလားဒေ့ရှ်ဟာ သဏ္ဍာန်အမျိုးမျိုးနဲ့ စစ်ပွဲဟူသရွေ့ကို ဆန့်ကျင်ကြောင်း၊ ယူကရိန်းသမ္မတနဲ့တွေ့ဆုံစဉ် စစ်ပွဲကို ဘယ်လို ရပ်တန့်နိုင်မလဲဆိုတာကိုလည်း ၀န်ကြီးချုပ်က ဆွေးနွေးခဲ့ကြောင်း နိုင်ငံခြားရေးဝန်ကြီး ဒေါက်တာ ဟာဆန်မာမွတ်က နောက်ပိုင်းမှာ ပြောင်း ပြောဆိုပါတယ်။ 

ဂါဇာကမ်းမြောင်ဒေသ အပြစ်မဲ့ အမျိုးသား၊ အမျိုးသမီးတို့အပေါ် တိုက်ခိုက်မှုများကို ဘယ်လိုရပ်တန့်နိုင် မယ် ဆိုတာ ခေါင်းဆောင်နှစ်ဦးတို့ဆွေးနွေးခဲ့ကြကြောင်း၊ စစ်ပွဲဟာ ဘယ်သူတစ်ဦးတစ်ယောက်အတွက်မျှ သုခချမ်း သာအမှန်ကို ဖြစ်ထွန်းစေမှာ မဟုတ်ပဲ ဆန့်ကျင်ဘက် ရလဒ်များသာ ဖြစ်ပေါ်လာနိုင်တယ်လို့ ဝန်ကြီးချုပ်က နှိုးဆော်ခဲ့ကြောင်း၊ အဲဒီကိစ္စနဲ့ပတ်သက်ပြီး ဘင်္ဂလားဒေ့ရှ်ပြည်သူများအတိ ဒုက္ခရောက်ခဲ့ရတဲ့ ၁၉၇၁ ခုနှစ် လွတ်မြောက်ရေးစစ်ပွဲကာလ ခါးသီးမှုများနဲ့ ရှိတ်ဟာစီနာကိုယ်တိုင် ခါးစည်းခံခဲ့ရပုံတို့ကို ပြန်လည်အမှတ်ရစေခဲ့ ကြောင်း၊ စစ်ပွဲအတွင်း ပါကစ္စတန် သိမ်းပိုက်ရေးတပ်များက ဝိုင်းပတ်ပ်ိတ်ဆို့ထားစဉ် ရှိတ်ဟာစီနာဟာ တစ်ဦးတည်း သောသားဖြစ်သူ ဆာဂျစ်_ဝါဇက်ဂျွိုင်းကို မွေးဖွားခဲ့ရကြောင်း ကိုယ်တိုင် လူမဆန်စွာ ခံစားခဲ့ရပုံတို့ကို ပြောပြခဲ့ကြောင်း၊ ဘင်္ဂလားဒေ့ရ်ှရဲ့နိုင်ငံခြားရေးမူဝါဒဟာ တိုင်းပြည်အားလုံးနဲ့ကောင်းမွန်စွာ ဆက်ဆံရေးဖြစ် တယ်လို့ တွေ့ဆုံစဉ်ပြောပြခဲ့တယ်လို့ ဟာဆန်မာမွတ်က ရှင်းပြပါတယ်။ (ရှိတ်ဟာစီနာမှာ သားတစ်ဦး၊ သမီးတစ်ဦး ထွန်းကားပါတယ်။  ။သတင်းဘာသာပြန်သူ) 

ယူကရိန်းသမ္မတနဲ့တွေ့ဆုံတဲ့အတွက် ရုရှားနဲ့ ဆက်ဆံရေးမှာ လုံးဝ အဟန့်အတားဖြစ်စရာ မရှိကြောင်း သ တင်းထောက်တစ်ဦးရဲ့မေးခွန်းကို နိုင်ငံခြားရေးဝန်ကြီးက ပြန်လည်ဖြေဆိုပါတယ်။ ရုရှားနဲ့ ဘင်္ဂလားဒေ့ရှ် တို့ရဲ့ ဆက်ဆံရေးဟာ အလွန်အမင်း နွေးထွေးကြောင်း။ ရုရှားနိုင်ငံဟာ လွတ်မြောက်ရေးစစ်ပွဲအတွင်း ဘင်္ဂလားဒေ့ရှ် ပြည်သူတို့နဲ့အတူ ရပ်တည်ခဲ့ပြီး စစ်ပွဲအပြီး ဘင်္ဂလားဒေ့ရှ်နိုင်ငံ ပြန်လည်တည်ဆောက်ရာမှာ အဓိက အခန်းကဏ္ဍ ကနေ ပါဝင်ခဲ့တယ်လို့ နိုင်ငံခြားရေး၀န်ကြီး ဟာဆန်မာမွတ်က ပြောပါတယ်။

ဝန်ကြီးချုပ် ရှိတ်ဟာစီနာဟာ ဂျာမနီနိုင်ငံ မြူးနစ်လုံခြုံရေးညီလာခံသို့ တက်ရောက်ရန် သုံးရက်ကြာ တရားဝင်ခရီး စဉ်အဖြစ် ဖေဖော်ဝါရီ ၁၅ ရက်မှာ ဒါကာမှ ထွက်ခွာခဲ့ပါတယ်။ မနက်ဖန် ၁၉ရက်နေ့မှာ ပြန်လည်ရောက်ရှိ ပါလိမ့်မယ်။ ဇန်နဝါရီလ ၇ ရက် အထွေထွေရွေးကောက်ပွဲအပြီး ၀န်ကြီးချုပ် စတုတ္ထသက်တမ်းအတွက် ထပ်မံ တင်မြှောက်ခံရပြီးနောက် ရှိတ်ဟာစီနာရဲ့ ပထမဆုံး တရားဝင်ခရီးစဉ်လည်း ဖြစ်ပါတယ်။

(ဘင်္ဂလားဒေ့ရ်ှတပ်မတော်ရဲ့မြေပြင် အဓိက လက်နက်ငယ်ဟာ Type-81 အမှတ် ၈၁ ပုံစံအမျိုးအစား ချေ မှုန်းရေး ရိုင်ဖယ်ဖြစ်ပါတယ်။ ၇.၆၂ x ၃၉ မီလီမီတာ ကျည်သုံး တရုတ်လုပ်ဖြစ်ပြီး အဲ့ဒီလက်နက်ကိုပဲ မြန်မာ နိုင်ငံ ကချင်ပြည်နယ် လိုင်ဇာက K2 ချေမှုန်းရေးရိုင်ဖယ်အဖြစ် တုပ ထုတ်လုပ်ထားပါတယ်။  KIA နဲ့ မြောက်ပိုင်း မဟာမိတ် ၃-ဖွဲ့အပြင် PDFs အချို့မှာလည်း အသုံးပြုနေပါတယ်။ 

ဒီအတွက် လက်ရှိမြန်မာနိုင်ငံ စစ်ရေးပဋိပက္ခမှာ အထူးသဖြင့် AA ရက္ခိုင်တပ်ကို ဘင်္ဂလားဒေ့ရှ်က ကျည်-လက်နက် ကူညီကောင်း ကူညီလိမ့်မယ်လို့ ထင်ကြေးပေးမှုများ ရှိနေပါတယ်။ ဒါပေမယ့် လက်ရှိ AA တို့ အသုံးပြူနေတဲ့ လက်နက်များမှာ မြန်မာ့တပ်မတော်က အစုအပုံလိုက်ဆုံးရှုံးခဲ့ရတဲ့ လက်နက်များမှ တစ်ပါး KIA ထုတ်သာလျှင် ဖြစ်ကြောင်း သိရှိရပြီး ဘင်္ဂလားဒေ့ရ်ှနဲ့ ဆက်နွယ်မှုမရှိကြောင်း ကြားသိရပါတယ်။ ယခင် NLD အစိုးရ လက်ထက် တပ်မတော်နဲ့ AA တို့ နယ်စပ်အနီး တိုက်ပွဲဖြစ်ပွားစဉ် သူတို့ဘက်မှာ ကျည်ကျရောက်တယ်လို့ ကုလသမဂ္ဂနဲ့ နိုင်ငံတကာသိ ကန့်ကွက်ခဲ့တဲ့ ဘင်္ဂလားဒေ့ရှ်ဟာ ဒီတစ်ကြိမ်မှာ နှုတ်ဆိတ်နေပါတယ်။ တပ်မတော် လေတပ်က သူတို့ရဲ့ဝေဟင်ပိုင်နက်ကို ကျူးကျော်တယ်လို့ မြန်မာသံအမတ်ကြီးကို ခေါ်ယူသတိပေးခဲ့ပေမယ့် နေပြည်တော်နဲ့ ဆွေးနွေးညှိနိုင်းပြီး သူတို့ဘက်ရောက် မြန်မာလုံခြုံရေးတပ်သားများနဲ့ မှီခိုသူများကို ပြန်ပို့ပေးနေပါတယ်။ 

ဘင်္ဂလားဒေ့ရှ်ရဲ့နယ်ခြားရာနှုန်းအများစု ၂၅၄၅ မိုင်ကို အိန္ဒိယက “ဂငယ်ပုံ” ဝိုင်းပတ်ထားပါတယ်။ ဂငယ်ရဲ့ ယာဘက် အောက်ခြေ ကျန်နယ်ခြား ၁၆၈-မိုင်ဟာ မြန်မာနဲ့ထိစပ်နေပါတယ်။ ဘင်္ဂလားဒေ့ရှ်အတွက် နယ်နိမိတ် ချင်းထိစပ်နေတဲ့အိမ်နီးချင်းနိုင်ငံ ၂ နိုင်ငံသာရှိတယ်လို့ ဆိုရပါလိမ့်မယ်။

၁၉၄၇-ခုနှစ် ဗြိတိသျှ ကိုလိုနီထမ်းပိုးအောက်မှ လွတ်မြောက်စဉ် မောင့်ဘက်တန် နှပ်ကြောင်းပေးလိုက်တဲ့ အတိုင်း ဟိန္ဒူ- မွတ်စလင်အဖြစ် ဘာသာရေးအရ နိုင်ငံများ ပိုင်းခြားလွတ်လပ်ရေး ရယူခဲ့ရာ အနောက်ပါကစ္စတန် (ယခုပါကစ္စတန်) နဲ့ အရှေ့ပါကစ္စတန် ( ယခုဘင်္ဂလားဒေ့ရှ်) တို့ဟာ အလယ်မှာ အိန္ဒိယတစ်ပြည်လုံး မိုင် ၈ဝဝ ကျော်ခြားပြီး ထူးဆန်းစွာ နိုင်ငံဖြစ်ပေါ်လာပါတယ်။    

တစ်ချိန်က အိန္ဒိယတိုက်ငယ်ရဲ့ အရှေ့ဘင်္ဂလားဖြစ်တဲ့ ယခု ဘင်္ဂလားဒေ့ရ်ှဟာ ပါကစ္စတန်တို့နဲ့ အစ္စလာမ်ဘာ သာ ကိုးကွယ်မှု တူညီပုံကလွဲလျှင် ဘာသာစကား၊ ရေမြေ ရာသီဥတုသဘာ၀၊ သမိုင်း ယဉ်ကျေးမှုနောက်ခံတို့ မှာ အကြီးအကျယ် ကွဲလွဲပါတယ်။ ဘင်္ဂါလီဘာသာစကားပြော အရှေ့ပါကစ္စတန်မှာ အမျိုးသားရေးနိုးကြားလာခြင်းနဲ့ အတူ အူရဒူဘာသာစကားပြော အနောက်ပါကစ္စတန်မှ ခွဲထွက်ရေး ၁၉၇၁ ခုနှစ် လွတ်မြောက်ရေးစစ်ပွဲကို ဦးတည် သွားခဲ့ပါတယ်။

၈ လကျော်ကြာမြင့်တဲ အဲဒီစစ်ပွဲမှာ ပါကစ္စတန်ဘက်က တရုတ်၊ အမေရိကန်တို့က ထောက်ပံ့ပေးခဲ့ပြီး ဘင်္ဂ လားဒေ့ရှ်ဘက်မှ ရုရှားနဲ့ အိန္ဒိယတို့က ကူညီထောက်ပံ့ခဲ့ကြပါတယ်။ ပါကစ္စတန်စစ်တပ်အပြင် ပါကစ္စတန်လိုလား တဲ့ ပြည်သူ့စစ်များ လက်ချက်နဲ့ ဘင်္ဂါလီ ၃-သိန်းမှ ၃-သန်းနီး အသတ်ခံခဲ့ရပြီး ဘင်္ဂါလီအမျိုးသမီးပေါင်း ၄ သိန်း နီးပါးဟာ စနစ်တကျ မုဒိန်းကျင့် ခံခဲ့ရပါတယ်။

ဘင်္ဂလားလွတ်မြောက်ရေးစစ်ပွဲကို ကူညီတဲ့ အိန္ဒိယဟာ ပါကစ္စတန်နဲ့ တတိယအကြိမ်မြောက် အတိအလင်း စစ်ခင်း ခဲ့ရပါတယ်။ စစ်ပြီးခေတ် ဘင်္ဂလားဒေ့ရှ်နိုင်ငံ ပြန်လည်ထူထောင်ရေးကို အိန္ဒိယအပြင် ရုရှားတို့က အများဆုံး တည်ဆောက်ပေးခဲ့ကြပေမယ့် စစ်ပွဲကာလ ပါကစ္စတန်စစ်တပ်ရဲ့လူမျိုးသုဥ်းပြုမှုကို အမေရိကန်က ဖုံးကွယ်ပေးခဲ့ ကြောင်း တွေ့ရှိရပါတယ်။ ဘင်္ဂလားဒေ့ရှ်ဟာ အိန္ဒိယရဲ့သမိုင်းကြောင်း ထပ်တူကျမှုအရ ပေါ်ထွန်းလာခဲ့ပြီး အမျိုးသားကာကွယ်ရေးလုံခြုံရေးသာမက နိုင်ငံခြားရေးမှာပါ အလွန်နီးစပ်တဲ့တိုင်းပြည်ဖြစ်ပါတယ်။ 

အလားတူ ရုရှားနိုင်ငံဟာ ဘင်္ဂလားဒေ့ရှ်ရဲ့အခိုင်မာဆုံးနဲ့ အရင်းနှီးဆုံးမဟာမိတ်ဖြစ်ကြောင်း မော်စကိုက လက်ရှိ တည်ဆောက်ပေးနေတဲ့ ရွတ်ပူး နျူကလီယာဓါတ်အားပေးစက်ရုံကြီးက သက်သေပြနေပါတယ်။

မြန်မာပြည်တွင်း ရခိုင်၊ ချင်း၊ နာဂသူပုန်များဟာ တရုတ်ရဲ့ ကိုယ်စားပြု ပရောက်ဆီများအဖြစ် လူသိများတဲ့ KIA က မွေးထုတ်ပေးခဲ့ခြင်းဖြစ်ပါတယ်။ အထူးသဖြင့် သူတို့ နယ်စပ်တလျှောက် လှုပ်ရှားနေတဲ့ ချင်း၊ နာဂ သူပုန်များဟာ အိန္ဒိယနဲ့ ဘင်္ဂလားဒေ့ရ်ှအစိုးရကိုလည်း သီးခြားခွဲထွက်ရေး ဆန့်ကျင်ပုန်ကန်နေကြပါတယ်။ ဒါပေမယ့် ချင်းနဲ့ နာဂတို့ဟာ ကချင်သူပုန် KIA နဲ့ စစ်ရေးအမြင် အကျိုးစီးပွား ထပ်တူကျခြင်း မရှိပါ။ 

မြန်မာ၊ ဘင်္ဂလားဒေ့ရှ်၊ အိန္ဒိယ ၃ နိုင်ငံဆုံရာအနီး ပလက်ဝမြိုကို AA နဲ့ CNF ချင်းသူပုန်တို့ သိမ်းပိုက်လိုက်ခြင်း ဟာ နယူးဒေလီနဲ့ ဒါကာအတွက် တကယ့်ကို သတိပေးခေါင်းလောင်းသံ ထိုးနှက်လိုက်သလိုပါပဲ။ မြန်မာနိုင်ငံ ကချင် ပြည်နယ်အနောက်ပိုင်းနဲ့ ထိစပ်နေတဲ့ အာရူနာချယ် ပရာဒက်ရှ်ပြည်နယ် အစိတ်အပိုင်းအေတ်ာများများဟာ သူတို့ပိုင် တောင်တိဗက်ဒေသဖြစ်တယ်လို့ ပေကျင်းက အခိုင်အမာပြောဆိုနေပြီး အငြင်းပွား မက်မဟွန် မျဉ်း တစ်လျှောက် တရုတ်နဲ့ အိန္ဒိယစစ်တပ်တို့ တစ်ဖက်နဲ့တစ်ဖက် ရန်စောင်နေပါတယ်။

အခြားတစ်ဖက်မှာလည်း ဒုတိယကမ္ဘာစစ်အတွင်း အနောက်မဟာမိတ်များက ဂျပန်ကို ခုခံတိုက်ခိုက်နေတဲ့ ချန်ကေရှိတ် တရုတ်ထံ ထောက်ပံ့စစ်ကူပေးခဲ့ဖူးတဲ့ လီဒိုလမ်းမကြီးဟာ ပေကျင်းအတွက် စိတ်၀င်စားစရာဖြစ် နေပါ တယ်။ အိန္ဒိယနဲ့ တရုတ်တို့အကြား အာသံပြည်နယ် လီဒိုမြို့မှ ကချင်ပြည်နယ် ရှင်ဗွေယန်၊ မြစ်ကြီးနားနဲ့  ဗန်းမော်မြို့များကို ဖြတ် သန်းပြီး မိုင်ပေါင်း ၁၀၇၂ မိုင် ရှိတဲ့ ကုန်းလမ်းဆက်သွယ်နိုင်ပါတယ်။

နယူးဒေလီမှ သွားလာဆက်သွယ်ရေးခက်ခဲတဲ့ အရှေ့ဖျားပြည်နယ်များအတွက်  မြန်မာနိုင်ငံ ကုလားတန်ရေ ကြောင်း စီမံကိန်းဟာ အထူးအရေးပါပြီး ပလက်ဝမြို့ဟာ ကုန်းတွင် ဆိပ်ခံဖြစ်နေပါတယ်။ သူတို့ရဲ့ ဇာတိမြေ အဖြစ် ချင်းအများစု မှတ်ယူထားကြတဲ့ ပလက်ဝမြို့ကို ရခိုင် AA တို့က ရာနှုန်းအများစု ချုပ်ကိုင်လာခြင်းအပေါ် ချင်းတို့ အတွက် မနှစ်မြို့စရာဖြစ်လာကြောင်း  အိန္ဒိယမီဒီယာအချို့က ရေးပါတယ်။

မြန်မာနိုင်ငံဘက်မှာရော အိန္ဒိယဘက်မှာပါ ချင်းမျိုးနွယ်စုများအနေနဲ့ကတော့ ကုလားတန်စီမံကိန်းဟာ သူတို့ရဲ့ ဒေသတွင်း ဖွံ့ဖြိုးမှုနဲ့ စီးပွားရေးတိုးတက်မှုကို ဆောင်ကျဉ်းပေးနိုင်လိမ့်မယ်လို့ မှတ်ယူရာမှာ တူညီသူများ ဖြစ်ကြောင်း အိံန္ဒိယအမျိုးသားရေးမီဒီယာများက ဖော်ပြကြပါတယ်။   ။သတင်းဘာသာပြန်သူ)) 

#ယူကရိန်းနှင့်ဘင်္ဂလားဒေ့ရှ် #မြူးနစ်လုံခြုံရေးညီလာခံ #ရုရှား #အိန္ဒိယ #တရုတ် #ကုလားတန်စီမံကိန်း

(Dhaka Tribune., 17 February 2024,” Zelensky invites Bangladesh to join Ukraine formula that Russia rejects” ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။)