Pika (NSS) - ဖေဖော်ဝါရီ ၂၂

ယူကရိန်းနှင့် ၎င်း၏ အနောက်အုပ်စုကျောထောက်နောက်ခံနိုင်ငံများသည် ရုရှားနှင့်ဖြစ်ပွားနေသော ပဋိပက္ခကို အဆုံးသတ်လိုသည့်ဆန္ဒများမရှိကြောင်း ရုရှားနိုင်ငံခြားရေးဝန်ကြီး ဆာဂေးလာရော့ဗ် က ပြောကြားခဲ့သည်။

ယူကရိန်းတွင် ငြိမ်းချမ်းရေးရရှိရန်အတွက် ၎င်း၏ ခေါင်းဆောင်များသည် ကြားနေ၊ အစုအဖွဲ့မဟုတ်၊ နျူကလီးယား လက်နက်မပိုင်ဆိုင်သည့်အနေအထားတွင်ရှိနေရမည်ဖြစ်ပြီး နယ်မြေသစ်များနှင့်ပတ်သက်သည့် ဖြစ်ရပ်မှန်များကို လက်ခံရမည်ဖြစ်ကြောင်း ဆာဂေးလာရော့ဗ် က ပြောခဲ့သည်။ 

ယူကရိန်းကို စစ်ဆင်ရေးများလုပ်ဆောင်ခဲ့သည့် (၂)နှစ်နီးပါးအတွင်း ယူကရိန်းနိုင်ငံတွင် နာဇီလွှမ်းမိုးမှု များကို ဖယ်ရှားရန် နှင့် စစ်ရေးကင်းမဲ့သည့်နေရာတစ်ခုအဖြစ် လုပ်ဆောင်လိုသည့် ရုရှား၏ ရည်မှန်းချက်ပန်းတိုင်မှာ လက်ရှိအချိန်အထိ မပြောင်းလဲဘဲ ကျန်ရှိနေသေးကြောင်း ရုရှားသမ္မတပူတင် က ပြောကြားခဲ့သည်။

အမေရိကန်ဦးဆောင်သော နေတိုးအဖွဲ့၏ အရှေ့ဘက်နယ်မြေများသို့ ချဲ့ထွင်မှုကို အဓိကအမျိုးသားလုံခြုံရေး ပြဿနာတစ်ခုအဖြစ် သတ်မှတ်ထားပြီး နေတိုးအဖွဲ့ဝင်နိုင်ငံအဖြစ် ဝင်ရောက်လိုသော ယူကရိန်း၏ဆန္ဒများမှာ ယခုကဲ့သို့စစ်ဆင်ရေးများလုပ်ဆောင်ရန်အတွက် အဓိကအကြောင်းပြချက်တစ်ခုဖြစ်ကြောင်း ပူတင်က ပြောခဲ့ သည်။ 

သို့သော်လည်း ရုရှား-ယူကရိန်း ပဋိပက္ခကို သံတမန်နည်းလမ်းအရဖြေရှင်းရန် ရုရှားဖက်က လမ်းဖွင့်ထားကြောင်း ဆာဂေးလာရော့ဗ်က ပြောကြားခဲ့သည်။ ဆာဂေးလာရော့ဗ် က "ဒါပေမယ့် ယူကရိန်းနဲ့ အနောက်အုပ်စုနိုင်ငံတွေ ဟာ ဒီပဋိပက္ခကိုဖြေရှင်းလိုတဲ့နိုင်ငံရေးဆန္ဒတွေကို ပြသတာမျိုးမရှိပါဘူး" ဟု ပြောခဲ့သည်။

ထို့အပြင် ရုရှား-ယူကရိန်းပဋိပက္ခကို အဆုံးသတ်ရန်အတွက် ရည်ရွယ်ထားသော အခြားအဆိုပြုချက်များကို ယူကရိန်း နှင့် အနောက်အုပ်စုနိုင်ငံများ၏ တာဝန်ရှိသူများက ပယ်ချခဲ့ကြောင်း ဆာဂေးလာရော့ဗ်က ထောက်ပြ ပြောခဲ့သည်။

၎င်းက "ကျွန်တော်တို့မှာ ရွေးချယ်စရာမရှိပါဘူး။ ကျွန်တော်တို့ရဲ့ရည်မှန်းချက်ပန်းတိုင်ကို မရောက်မချင်း ဒီစစ်ဆင်ရေးကို ဆက်လက်လုပ်ဆောင်သွားမှာပါ" ဟု ပြောခဲ့သည်။