Alynn (NSS) - ဖေဖော်ဝါရီ ၁၉ 

ရုရှားစစ်သင်္ဘော Caesar Kunikov သည် ၂၀၀၈ ခုနှစ်တွင် ဆင်နွှဲခဲ့သော ရုရှား၏ ဂျော်ဂျီယာ စစ်ဆင်ရေး အပါအဝင် ဆီးရီးယားကမ်းလွန်အထိပါ ပဋိပက္ခအများစုတွင် တာဝန်ထမ်းဆောင် ခဲ့ဖူးသည်။ သို့သော် ဖေဖော်ဝါရီလ ၁၄ ရက်က ထိုစစ်သင်္ဘောသည် ခရိုင်းမီးယားကျွန်းဆွယ်၌ ရေအနက် ၁၁၂ မီတာသို့ နစ်မြှုပ်သွားပြီဖြစ်ကြောင်း ယူကရိန်းစစ်တပ်က ကြေညာခဲ့သည်။ ထို့ပြင် ၎င်းစစ်သင်္ဘောပေါ်တွင် မီးလောင်ပေါက်ကွဲမှုဖြစ်ခဲ့ကြောင်း ယူကရိန်းထောက်လှမ်းရေးက ဗီဒီယိုဖြင့် သက်သေပြခဲ့သည်။ ထိုစစ်သင်္ဘောနစ်မြှုပ်မှုသည် ယူကရိန်း၏ ပထမဆုံးစစ်ရေး အောင်မြင်မှုမဟုတ်သော်လည်း  မြေပြင်တွင် နှစ်ဖက်အကြား အသည်းအသန်ထိုးစစ်ဆင်နေချိန်၌ ထိုသို့ ဖြစ်ပွားခြင်းသည် ယူကရိန်းအတွက် ရေကြောင်းစစ်ဆင်ရေးအရ အသာစီးရယူနိုင်ခဲ့ကြောင်း ပြသနေသည်။ 

ရုရှားသည် ယူကရိန်းတွင် အထူးစစ်ဆင်ရေးစတင်ဆင်နွှဲသည့် ၂၀၂၂ ခုနှစ်မှစတင်၍ ယူကရိန်း နယ်မြေအများစုကို သိမ်းပိုက်ထားနိုင်ခဲ့သည်။ ရုရှား ပင်လယ်နက်သင်္ဘောအုပ်စုသည် ယူကရိန်းဆိပ်ကမ်းများကို ပိတ်ဆို့ထားနိုင်ခဲ့ပြီး အရေးပါသည့် မြွေကျွန်းကိုလည်း အရယူနိုင်ခဲ့သောကြောင့် ယူကရိန်းအား ကမ္ဘာကြီးနှင့် အဆက်အသွယ်ဖြတ် တောက်လိုက်သလိုဖြစ်နေသည်။

သို့သော် ယူကရိန်းသည် တဖြည်းဖြည်းနှင့် ရုရှားရေတပ်၏ ထိန်းချုပ်မှုမှ လွတ်မြောက်ရန် ကြိုးပမ်းခဲ့သည်။ ပထမခြေလှမ်းအနေဖြင့် ရုရှား၏ Moskva စစ်သင်္ဘောကို ၂၀၂၂ ခုနှစ်၊ ဧပြီလက နစ်မြှုပ် ပစ်နိုင်ခဲ့သည်။ ထို့နောက် ၂၀၂၂ ခုနှစ်၊ ဇူလိုင်တွင် မြွေကျွန်းကို ပြန်လည်သိမ်းယူနိုင်ခဲ့ပြီး ရုရှား စစ်သင်္ဘောများ၊ ထောက်ပံ့ရေယာဉ်များကို ပုံမှန်တိုက်ခိုက်ခဲ့သည်။ ၂၀၂၃ ခုနှစ်၊ ဇူလိုင်တွင် ရုရှား နိုင်ငံနှင့် ခရိုင်းမီးယားကျွန်းဆွယ်ကို ဆက်သွယ်ထားသော Kerch တံတားကို ဖျက်ဆီးပစ်ခဲ့သည်။ 

၂၀၂၃ ခုနှစ်၊ အောက်တိုဘာတွင် ရုရှားက ၎င်း၏စစ်သင်္ဘောအုပ်စုကို Sevastopol မှ ဆုတ်ခွာခိုင်း ခဲ့ရသည်။ သို့တိုင်အောင် ယူကရိန်းသည် Novorossiysk ဆိပ်ကမ်းရှိ ရုရှားကမ်းတက်ရေယာဉ်ကို  ဆိုးဆိုးရွားရွားပျက်စီး ဆုံးရှုံးအောင်ပြုလုပ်ခဲ့သည်။ CSIS ၏ အချက်အလက်များအရ စစ်ဖြစ်ချိန်မှစ၍ ရုရှားသည် ၎င်း၏ ပင်လယ်နက် သင်္ဘောအုပ်စုမှ ၄၀ ရာခိုင်နှုန်းခန့် ဆုံးရှုံးသွားပြီဖြစ်ကြောင်း သိရသည်။ 

ထိုကဲ့သို့ အောင်မြင်မှုများရရှိရန် ယူကရိန်းသည် ပြည်တွင်းထုတ်လက်နက်များအပြင် အနောက် မဟာမိတ်များက ထောက်ပံ့သော လက်နက်များကိုပါ အသုံးပြုခဲ့သည်။ ယူကရိန်းရေတပ်သုံး ဒရုန်းများသည် သေးငယ်ပြီး ထောက်လှမ်းရန် ခက်ခဲသည်။ ထို့ပြင် လိုအပ်လျှင် ပစ်မှတ်များကို ပြောင်းလဲတိုက်ခိုက်နိုင်သည်။ ထိုကဲ့သို့ အစွမ်းထက်သော Magura V5 ဒရုန်းများကို ယူကရိန်းက အမြောက်အများထုတ်လုပ်လျက်ရှိနေပြီး ကာကွယ်ရန် ခက်ခဲသောကြောင့် ရုရှားရေတပ်အတွက် စိန်ခေါ်မှုဖြစ်လာခဲ့သည်။ သို့သော် ယူကရိန်းအနေဖြင့် ပင်လယ်နက်တွင် အသာစီးရမှုသည် စစ်ပွဲတွင် အောင်မြင်မှုရနေသည်ဟု မဆိုသာပေ။ မြေပြင်တိုက်ပွဲများတွင် အပြင်းအထန်ခံစစ်ဖြင့် ရုရှားတပ်များကို တွန်းလှန်နေရသည့်အပြင် အနောက်မဟာမိတ်များ၏ လက်နက်ထောက်ပံ့မှုများအပေါ် အကြီးအကျယ်မှီခိုနေရသောကြောင့် ယူကရိန်းသည် စစ်အောင်နိုင်ရေးနှင့် အလှမ်းဝေးနေဦးမည်ဖြစ်သည်။