ALynn (NSS) - ဖေဖော်ဝါရီ ၁၉ 

အမေရိကန်က ကွန်ဂိုဒီမိုကရက်တစ်သမ္မတနိုင်ငံ (DRC) တွင် တရိပ်ရိပ်တိုးပွားလာသော အကြမ်းဖက်မှုများကို ရှုတ်ချခဲ့ပြီး အိမ်နီးချင်း ရဝမ်ဒါမှ ကျောထောက်နောက်ခံပြုထားသည့်လက်နက်ကိုင်အဖွဲ့ကို ပြစ်တင်ရှုတ်ချခဲ့သည်။ မကြာသေးမီရက်များအတွင်း DRC အရှေ့ဘက်ခြမ်းတွင် M23 သူပုန်အဖွဲ့နှင့် အစိုးရတပ်ဖွဲ့များအကြား တိုက်ပွဲများ ဖြစ်ပွားခဲ့ပြီး စစ်သည်နှင့် အရပ်သားဒါဇင်ပေါင်းများစွာ သေဆုံးခဲ့ပြီး ဒဏ်ရာရသူများစွာလည်းရှိခဲ့သည်။ တိုက်ပွဲ ကြောင့် အရပ်သားထောင်ပေါင်းများစွာသည် Kivu ရေကန်နှင့် ရဝမ်ဒါနယ်စပ်ကြားရှိ ဂိုမာမြို့သို့ ထွက်ပြေးတိမ်း ရှောင်ကြရသည်။ 

အမေရိကန်နိုင်ငံခြားရေးဝန်ကြီးရုံး ပြောရေးဆိုခွင့်ရပုဂ္ဂိုလ် Matthew Miller က “တိုက်ပွဲသည် တဖြည်းဖြည်း အရှိန်ပြင်းထန်လာသောကြောင့် အရပ်သားများအနေဖြင့် လူအခွင့်အရေးဆိုင်ရာ ချိုးဖောက်ခံရမှု၊ ရွှေ့ပြောင်း နေထိုင်ရမှု၊ အစာရေစာပြတ်လပ်မှုအပြင် တိုက်ခိုက်ခံရမှု စသော အန္တရာယ်များနှင့် ရင်ဆိုင်ရနိုင်ကြောင်း” ထုတ်ပြန်ခဲ့သည်။ 

ထို့ပြင် ယင်းထုတ်ပြန်ချက်၌ “ရဝမ်ဒါ အစိုးရအနေဖြင့် M23 လက်နက်ကိုင်များကို ထောက်ပံ့နေခြင်းအား ရှုတ်ချကြောင်းနှင့် DRC ရှိ ရဝမ်ဒါ ကာကွယ်ရေးတပ်များနှင့် ဝေဟင်ဒုံးစနစ်များသည် အရပ်သားများ၊ UN နှင့် အခြားဒေသတွင်း ငြိမ်းချမ်းရေးထိန်းသိမ်းတပ်ဖွဲ့ဝင်များ၊ လူသားချင်းစာနာထောက်ထားရေး အကူအညီပေးသူများ ၊ စီးပွားရေးဆိုင်ရာလေကြောင်းလိုင်းများကို ခြိမ်းခြောက်နေသောကြောင့် ချက်ချင်း ရုတ်သိမ်းပေးရန်” တောင်းဆို ထားပါသည်။ ဖေဖော်ဝါရီလ ၁၇ ရက်တွင် DRC အစိုးရက ဂိုမာမြို့ရှိ လေဆိပ်တွင် အရပ်သားလေယာဉ်တစ်စင်းကို ထိခိုက်ပျက်စီးစေသည့် ဒရုန်းတိုက်ခိုက်မှုကို ရဝမ်ဒါက လုပ်ဆောင်ခဲ့ကြောင်း စွပ်စွဲခဲ့သည်။ 

ရဝမ်ဒါသည် DRC ရှိ ပေါကြွယ်ဝသော တွင်းထွက်သယံဇာတများကို ထိန်းချုပ်ရန်အတွက် သူပုန်များကို ကျောထောက်နောက်ခံပြုပေးထားကြောင်း DRC အစိုးရ၊ ကုလသမဂ္ဂနှင့် အနောက်နိုင်ငံများက စွပ်စွဲခဲ့ကြသည်။ တောင်အာဖရိကနိုင်ငံက DRC တပ်ဖွဲ့များကို ထောက်ပံ့ဖို့ တပ်ဖွဲ့ဝင် ၂၉ဝဝ စေလွှတ်မည်ဖြစ်ကြောင်း ဖေဖော်ဝါရီလ ၁၄ ရက်က ပြောကြားခဲ့သည်။ 

ရဝမ်ဒါ လူမျိုးသုဥ်းသတ်ဖြတ်မှုအပြီးတွင် DRC သည် ၎င်း၏ သယံဇာတကြွယ်ဝသော အရှေ့ပိုင်းဒေသတွင် ပေါ်ပေါက်လာသည့် သူပုန်အဖွဲ့များစွာနှင့် ဆယ်စုနှစ်များစွာ တိုက်ပွဲဆင်နွှဲနေရသည်။ ၂ဝ၁၂ ခုနှစ် တွင် DRC စစ်တပ်မှ ခွဲထွက်သွားသော M23 သူပုန်များသည် လူမျိုးရေးခွဲခြားဆက်ဆံခံနေရသော တူစီမျိုးနွယ်စုတို့ကို ကာကွယ်ရန်အတွက် တိုက်ပွဲဝင်နေသည်ဟု ဆိုသည်။