မြူနစ် (NSS) - ဖေဖော်ဝါရီ ၁၇

စစ်မှုမထမ်းမနေရ အမိန့်ထုတ်ပြီးနောက် ပြည်ပသို့ တရားမဝင် ထွက်ခွာမှုများရှိနေပြီး ၎င်းကဲ့သို့ လုပ်ရပ်များသည် လူကုန်ကူးခံရနိုင်ခြေမြင့်မားကြောင်း သုံးသပ်မှုများရှိနေသည်။

နိုင်ငံတော်စီမံအုပ်ချုပ်ရေးကောင်စီသည် ဖေဖော်ဝါရီလ ၁၀ ရက်တွင် ပြည်သူ့စစ်မှုထမ်းဥပဒေကို အာဏာတည်ကြောင်းအမိန့် ထုတ်ပြန်ခဲ့သည်။

ယင်းကဲ့သို့ ထုတ်ပြန်ပြီးခဲ့နောက်ပိုင်းတွင် နိုင်ငံအတွင်း၌ ကောလာဟလမျိုးစုံထွက်ပေါ်လျက်ရှိပြီး ပြည်ပသို့သွားရောက် အလုပ်လုပ်ကိုင်ရန်အတွက် နယ်စပ်ဒေသများမှတစ်ဆင့် တရားမဝင်ထွက်ခွာမှုများလည်း ဖြစ်ပေါ်နေလျက်ရှိသည်။

ထိုသို့ တရားမဝင်ထွက်ခွာနေမှုများနှင့်ပတ်သက်၍ လူကုန်ကူးမှုတားဆီးနှိမ်နင်းရေးရဲတပ်ဖွဲ့မှ အငြိမ်းစားအရာရှိတစ်ဦးက “အခုဟာက လူကုန်ကူးတွေ အကြိုက်ဖြစ်သွားမှာပေါ့။ ဘာဖြစ်လို့လဲဆိုတော့ အဲဒီလို တရားမဝင်သွားဖို့အတွက် နည်းလမ်းမျိုးစုံနဲ့ လုပ်တယ်ဆိုတာက လူတွေကို ခေါင်းပုံ ဖြတ်ဖို့ စောင့်နေတဲ့သူတွေအတွက် အခွင့်အလမ်းဖြစ်သွားပြီလေ။ အဲဒီတော့ သေချာပေါက် ခေါင်းပုံဖြတ်ခံရဖို့ များပါတယ်”ဟု NSS ကို သုံးသပ်ပြောကြားသည်။

လူကုန်ကူးမှုဖြစ်စဉ်များတွင် လုပ်အားခေါင်းပုံဖြတ်ခြင်း၊ လိင်ခေါင်းပုံဖြတ်ခြင်းများသည် အဓိကဖြစ်ပွားနေလျက်ရှိပြီး လိင်ဖျော်ဖြေရေးလုပ်ငန်း၊ အိမ်ဖော်လုပ်ငန်းများတွင်လည်း ရောင်းစားခံရသည့်ဖြစ်စဉ်များ ဖြစ်ပွားလျက်ရှိကြောင်း သိရသည်။

“လူကုန်ကူးတယ်ဆိုတာ လုပ်အားခေါင်းပုံဖြတ်တာ။ လိင်ခေါင်းပုံဖြတ်တာတွေက အဓိကပေါ့နော်။ အဲဒီတော့ ခေါ်သွားမယ်၊ စက်ရုံမှာ လုပ်ရမယ်ပြောမယ်။ ပြီးရင် တစ်ခြားနေရာမှာ ရောင်းစားမယ်။ စက်ရုံထဲမှာ လုပ်အားခေါင်းပုံဖြတ်ခံရမယ် ဒါတွေပေါ့။ နောက်အမျိုးသမီးတွေဆိုရင်တော လိင်ဖျော်ဖြေရေးနေရာတွေမှာ ရောင်းစားတာတို့၊ အိမ်ဖော်တွေအနေနဲ့ ကျွန်တွေ အနေနဲ့ ရောင်းစားတာမျိုး အဲဒါတွေလည်း ဖြစ်နိုင်တာပေါ့”ဟု အငြိမ်းစားအရာရှိက ပြောသည်။

လတ်တလောကာလအတွင်း၌ မြန်မာနိုင်ငံ၏ အိမ်နီးချင်းနိုင်ငံဖြစ်သော ထိုင်းနိုင်ငံသို့ တရားမဝင် ဝင်ရောက်သော မြန်မာနိုင်ငံသားများ ဖမ်းဆီးခံခဲ့ရသည့်ဖြစ်စဉ် ဖြစ်ပွားခဲ့ဖူးသည်။

“အစိုးရပိုင်းရဲ့ ဝါဒဖြန့်ချိရေးယန္တရားကတော့ တော်တော်လေးအားနည်းတာပေါ့။ အခုချိန်ဆိုရင် လူတွေကြားထဲမှာ၊ ရပ်ကွက်တွေမှာ လက်ကမ်းကြော်ငြာတွေ ဝေရမယ်။ စာတွေဝေရမယ်။ ဘာမှ စိုးရိမ်စရာမရှိတဲ့အကြောင်းကို သေချာလေး ရှင်းပြဖို့လိုတယ်။ အဲဒီလိုနားရှင်းအောင် လုပ်ရမယ်။ အခုဟာက ဒီအစိုးရကို ဆန့်ကျင်နေတဲ့ အဖွဲ့အစည်းတွေရဲ့ ဝါဒဖြန့်ချိရေးက ပိုပြီးအားကောင်းနေပြီးတော့ အစိုးရပိုင်းက အားနည်းနေတာကြောင့် အဲဒီလိုဖြစ်တာပေါ့” ဟုလည်း ၎င်းက ထပ်မံသုံးသပ်ထားသည်။

ပြည်ပနိုင်ငံများသို့ လူကုန်းကူးခံရသည့်ဖြစ်စဉ်များထဲတွင် (၅၀)ရာခိုင်နှုန်းခန့်သည် အမျိုးသမီးနှင့် ကလေးငယ်များသာဖြစ်ကြောင်း နစက၏ ပြည်ထဲရေးဝန်ကြီးဌာနက ပြောဆိုထားဖူးသည်။