Pika (NSS) - ဖေဖော်ဝါရီ ၁၂

ယူကရိန်းနိုင်ငံ ပြိုကွဲပါက နောက်ထပ်ဒုက္ခသည်(၁၀)သန်းခန့် ဂျာမနီနိုင်ငံအတွင်းသို့ ထွက်ပြေးလာနိုင်ကြောင်း တာဝန်ရှိသူများ၏ ပြောကြားချက်ကို ကိုးကားပြီး Welt am Sonntag သတင်းစာက ဖော်ပြခဲ့သည်။

ရုရှား နှင့် ပဋိပက္ခအတွင်း ယူကရိန်း၏အခြေအနေများမှာ ဆိုးရွားနေသော်လည်း နောက်ထပ်အဆိုးဆုံးအခြေအနေ များမှာ ယခုနှစ်အတွင်း ဖြစ်လာနိုင်ဖွယ်မရှိဟု ဂျာမနီအစိုးရက ယုံကြည်နေကြောင်း Welt am Sonntag က ဖော်ပြခဲ့သည်။

ရုရှားနှင့်ယူကရိန်းကြား စစ်ပွဲဖြစ်ပွားပြီးနောက်ပိုင်းကတည်းက ယူကရိန်းနိုင်ငံသား(၁ ဒသမ ၁) သန်းခန့် ဂျာမနီ နိုင်ငံအတွင်းသို့ ထွက်ပြေးလာခဲ့ကြကြောင်း ဂျာမနီပြည်ထဲရေးဝန်ကြီးက ပြောကြားခဲ့သည်။ ၂ဝ၂၃ ခုနှစ်တွင် လူပေါင်း(၃)သိန်းခွဲကျော်သည် ဂျာမနီနိုင်ငံတွင် ခိုလှုံခွင့်ရရန် လျှောက်ထားခဲ့ကြပြီး ၂ဝ၁၆ ခုနှစ်နောက်ပိုင်း အမြင့်ဆုံး ကိန်းဂဏန်းဖြစ်ကြောင်း ဖယ်ဒရယ်ရွှေ့ပြောင်းရေး နှင့် ဒုက္ခသည်များဆိုင်ရာရုံး (BAMF) က ပြီးခဲ့သည့် လတွင် သတင်းထုတ်ပြန်ခဲ့သည်။

ယူကရိန်းနိုင်ငံ ပြိုကွဲပါက နိုင်ငံသား(၁ဝ)သန်းခန့်သည် ဂျာမနီနိုင်ငံတွင်းသို့ ထွက်ပြေးလာနိုင်ဖွယ်ရှိသည်ဟု ဂျာမနီ အစိုးရက ခန့်မှန်းထားကြောင်း အမည်မဖော်လိုသောလုံခြုံရေးအရာရှိများ နှင့် လွှတ်တော်အမတ်များ၏ ပြောကြား ချက်ကို ကိုးကားပြီး  Die Welt သတင်းစာက ဖော်ပြခဲ့သည်။

အဆိုပါလူအများစုသည် ဂျာမနီနိုင်ငံသို့ရောက်ရှိရန် မျှော်လင့်ချက်ဖြင့် အနောက်ဘက်သို့ ဦးတည်သွားလိမ့်မည်ဖြစ် ကြောင်း  Die Welt က ဖော်ပြခဲ့သည်။ အတိုက်အခံ ခရစ်ယာန်ဒီမိုကရက်တစ်ပါတီမှ လွှတ်တော်အမတ် Roderich Kiesewetter က "ယူကရိန်းကို ထောက်ပံ့မှုနဲ့ပတ်သက်ပြီး ကျွန်တော်တို့ရဲ့မဟာဗျူဟာကို မပြောင်းလဲဘူးဆိုရင် ယူကရိန်းနိုင်ငံကနေ အစုလိုက်အပြုံလိုက် ထွက်ခွာမှုနဲ့ နေတိုးအဖွဲ့ဝင်နိုင်ငံတွေဆီကို စစ်ပွဲပျံ့နှံ့လာမှု အဆိုးရွားဆုံး အခြေအနေတွေဖြစ်လာနိုင်ပါတယ်။ ဒီအဆိုးဆုံးအခြေအနေတွေမှာ ဒုက္ခသည်(၁ဝ)သန်း ယူကရိန်းနိုင်ငံတွင်းက ထွက်ခွာမယ်ဆိုတာက အနိမ့်ဆုံး ခန့်မှန်းချက်တစ်ခုဖြစ်ပါတယ်" ဟု ပြောခဲ့သည်။