Pika (NSS) - ဖေဖော်ဝါရီ ၇

ပင်လယ်နီအတွင်းရှိ မည်သည့်သင်္ဘောက ပိုမိုအကျိုးအမြတ်များသည့် ပစ်မှတ်ဖြစ်သည်ဆိုသောအချက်ကို ဆုံးဖြတ်နိုင်ရန်အတွက် ဟူသီလက်နက်ကိုင်အဖွဲ့ကို အီရန်နိုင်ငံက ကူညီပေးနေကြောင်း အမေရိကန်အကြီးတန်း သံတမန်တစ်ဦးက ပြောကြားခဲ့သည်။ 

ယီမင်နိုင်ငံဆိုင်ရာ အမေရိကန်အထူးသံတမန် တင်မ်လန်ဒါကင်းက "အီရန်နိုင်ငံဟာ ဟူသီလက်နက်ကိုင်အဖွဲ့ကို အကူအညီတွေ၊ ထောက်လှမ်းရေးသတင်းအချက်အလက်တွေ၊ ဘယ်သင်္ဘောက ပိုမိုအကျိုးအမြတ်ရှိတဲ့ ပစ်မှတ်ဆို တာတွေကို ဆုံးဖြတ်ဖို့တွေ ကူညီပေးနေတယ်လို့ ကျွန်တော်တို့ ထင်ပါတယ်" ဟု ပြောခဲ့သည်။

ဟူသီလက်နက်ကိုင်အဖွဲ့သည် ၂ဝ၂၃ ခုနှစ် နိုဝင်ဘာလ(၁၉)ရက်ကတည်းက နိုင်ငံတကာနှင့် ကုန်သွယ်ရေး သင်္ဘောလမ်းကြောင်းများကို အကြိမ်(၄ဝ)ကျော် တိုက်ခိုက်ခဲ့ကြောင်း ပင်တဂွန်စစ်ဌာနချုပ်က ပြောကြားခဲ့သည်။ 

ဂါဇာကမ်းမြောင်ဒေသရှိ ပါလက်စတိုင်းလူမျိုးများကို ထောက်ခံသည့်အနေဖြင့် အစ္စရေးသို့သွားမည့် သင်္ဘောများ (သို့မဟုတ်) အစ္စရေးနှင့်ဆက်နွယ်နေသော သင်္ဘောများကိုသာ ပစ်မှတ်ထားတိုက်ခိုက်နေခြင်းဖြစ်ကြောင်း ဟူသီ လက်နက်ကိုင်အဖွဲ့က ပြောကြားခဲ့သည်။

သို့သော်လည်း ဟူသီလက်နက်ကိုင်အဖွဲ့သည် ဒေသတွင်းတွင် အစ္စရေးနှင့်ဆက်နွယ်ခြင်းမရှိသော သင်္ဘောများ အပြင် အမေရိကန် နှင့် ဗြိတိန်တို့၏ စစ်သင်္ဘောများကိုလည်း ပစ်မှတ်ထားတိုက်ခိုက်မှုများ လုပ်ဆောင်ခဲ့ကြောင်း သိရသည်။ 

တင်မ်လန်ဒါကင်းသည် ပင်လယ်နီအတွင်းရှိ သင်္ဘောများကို အီရန်ကျောထောက်နောက်ခံပြု ဟူသီလက်နက် ကိုင်အဖွဲ့၏ တိုက်ခိုက်မှုများအား ရပ်တန့်စေမည့် နည်းလမ်းများကိုရှာဖွေရန်အတွက် ယခုသီတင်းပတ်အတွင်း ပင်လယ်ကွေ့ဒေသသို့ သွားရောက်လည်ပတ်ခဲ့ကြောင်း အမေရိကန်နိုင်ငံခြားရေးဝန်ကြီးဌာနက ယခင်က ပြောခဲ့သည်။

တင်မ်လန်ဒါကင်းသည် ဒေသအတွင်းတွင် တင်းမာမှုအရှိန်များလျှော့ချရန်၊ ဟူသီလက်နက်ကိုင်အဖွဲ့၏ တိုက်ခိုက်မှု များကို ရပ်တန့်ရန် နှင့် ယီမင်နိုင်ငံရှိ ပြည်သူများအတွက် ရေရှည်တည်တံ့သော ငြိမ်းချမ်းရေးကို ရရှိစေရန်နှင့် ပတ်သက်ပြီး အာရုံစိုက်မှုများကို ပြန်လည်လုပ်ဆောင်ရန်အတွက် ဒေသဆိုင်ရာသံတမန်များနှင့် တွေ့ဆုံကာ ဆွေးနွေးမှုများ လုပ်ဆောင်သွားမည်ဖြစ်ကြောင်းလည်း သိရသည်။

ထို့အပြင် ဟူသီလက်နက်ကိုင်အဖွဲ့၏ လုပ်ရပ်များသည် ယီမင်ပြည်သူများကို ထိခိုက်စေရုံသာမက နိုင်ငံ၏ ငြိမ်းချမ်းရေးကိုလည်း ထိခိုက်စေကြောင်း  တင်မ်လန်ဒါကင်းက ထပ်မံပြောကြားခဲ့သည်။ ၎င်းက "ဒီလိုလုပ်ရပ် တွေက ဒေသတွင်းမှာ အကူအညီပေးနေတဲ့သူတွေကို မောင်းထုတ်လိုက်တာနဲ့ တူတူပါပဲ" ဟု ပြောခဲ့သည်။