Htay Oung (NSS) - ဖေဖော်ဝါရီ ၃

လက်ကျန်အာလူးစျေးနှုန်းကို ထိန်းသိမ်းထားနိုင်ဖို့အတွက် ဘင်္ဂလားဒေ့ရှ်အစိုးရဟာ အိန္ဒိယမှ အာလူးတန်ချိန် ၃၄၀၀၀ ကို ဟီလီနယ်စပ်ကုန်သွယ်ဂိတ်မှတဆင့် တင်သွင်းရန် ခွင့်ပြုလိုက်ပြီလို့ ဒါကာထရီဗြွန်းသတင်းစာက ယမန်နေ့ (ဖေဖော်ဝါရီလ ၂ ရက်)မှာရေးသားပါတယ်။

ဟင်းသီး ဟင်းရွက်စျေးနှုန်း မြင့်တက်မလာစေဖို့အတွက် အစိုးရက အာလူးတင်သွင်းရန် ဆုံးဖြတ်ထား တယ်လို့ ဟီလီနယ်စပ်ဂိတ် အလုပ်ရုံညစ်ညမ်းမှုထိန်းချုပ်ရေးဌာနမှ လက်ထောက်အရာရှိတစ်ဦးက အတည်ပြုပါတယ်။ ကုန်သည် ၄၉ ဦးတို့က စနေ သို့မဟုတ် တနင်္ဂနွေနေ့လောက်မှာ အာလူးတွေကို စတင်တင်သွင်းနိုင်လိမ့်မယ်လို့ ဆိုပါတယ်။

လောလောဆယ် အာလူးလက်လီစျေးဟာ တစ်ကီလိုဂရမ်လျှင် တာကာငွေ ၄၀-၄၅ (အမေရိကန်ဒေါ်လာ ၀.၃၆-၀.၄၁) နဲ့ ရောင်းချနေကြပြီး ယခုနှစ်အတွက် ပုံမှန်ထက် မြင့်မားနေသေးကြောင်း၊ လက်ရှိ အခြေအနေအရ စဉ်းစားကြည့်လျှင် သွင်းကုန်များကို ရမ်ဇာန်ဥပုသ်လမတိုင်မီ စျေးနှုန်းထိန်းချုပ်မှု အချို့ပြုလုပ်ရန် အစိုးရက ဆုံးဖြတ်လိုက်ပုံရတယ်လို့ ခွင့်ပြုချက်ရ ကုန်သည်တစ်ဦးက ပြောပါတယ်။ အိန္ဒိယမှ အာလူးတွေ ဈေးကွက်ထဲရောက်သည်နှင့်အမျှ အာလူးဈေးကျဆင်းလာလိမ့်မယ်လို့လည်း မျှော်လင့်နေပါတယ်။

ဒီအတောအတွင်း ဘင်္ဂလားဒေ့ရှ်နိုင်ငံ ၀န်ကြီးချုပ် ရှိတ်ဟာစီနာအနေနဲ့ ဟနွိုင်းမြို့ကို လာရောက် လည်ပတ်ရန် ဗီယက်နမ်နိုင်ငံက တရား၀င် ဖိတ်ကြားလိုက်ကြောင်း ယနေ့(ဖေဖော်ဝါရီလ ၃ ရက်) ဒါကာထရီဗြွန်းရဲ့ အခြားသတင်းတစ်ပုဒ်မှာ တွေ့ရှိရပါတယ်။

ဘယ်လ်ဂျီယမ်နိုင်ငံ ဘရပ်ဆဲလ်မြို့၌ တတိယအကြိမ်မြောက် အီးယူ အင်ဒို-ပစိဖိတ် ၀န်ကြီးများအဆင့် ဖိုရမ်ကျင်းပစဉ် အစည်းအဝေးပြင်ပမှာ ယခုလို ဖိတ်ကြားခြင်းဖြစ်ကြောင်း၊ နှစ်နိုင်ငံအကြား ၅-နှစ်ကြာ ချစ်ကြည်ရင်းနှီးမှုကို ပိုမိုခိုင်မာစေရန်အတွက် ဟနွိုင်းရဲ့ တရား၀င် ဖိတ်ကြားချက်ကို ဗီယက်နမ် နိုင်ငံခြားရေး၀န်ကြီးက ဘင်္ဂလားဒေ့ရှ် နိုင်ငံခြားရေး၀န်ကြီး ဒေါက်တာ ဟာဆန်မာမွတ်ထံ ကမ်းလှမ်းလိုက်ခြင်းဖြစ်တယ်လို့ ဒါကာနိုင်ငံခြားရေး၀န်ကြီးရုံးက ပြောပါတယ်။

၀န်ကြီးများ တွေ့ဆုံစဉ် နှစ်နိုင်ငံ အကျိုးစီးပွားနဲ့ သက်ဆိုင်တဲ့ ကိစ္စရပ် အသီးသီးအပြင် ကုန်သွယ်မှု၊ ရင်းနှီးမြှုပ်နှံမှုနဲ့ ပူးပေါင်းဆောင်ရွက်မှု တိုးချဲ့ရန် နည်းလမ်းများကိုလည်း ဆွေးနွေးခဲ့ကြတယ်လို့ သိရှိရပါတယ်။

(Reuters., 2 February 2024,” 34,000 tons of potatoes to be imported from India” ကို ဆီလျော်အောက်ကောက်နှုတ်ဘာသာပြန်ဆိုသည်။)