Pika (NSS) - ဇန်နဝါရီ ၃၁ 

ပြီးခဲ့သည့်နှစ်က ပီရူးနိုင်ငံ လီမာမြို့၏ရင်ပြင်တွင် ၎င်း၏ ရည်းစားဟောင်းမိန်းကလေးကို အရှင်လတ်လတ် မီးရှို့ခဲ့သည်ဟု စွပ်စွဲခံထားရသော ဗင်နီဇွဲလားနိုင်ငံသားကို ပီရူးနိုင်ငံသို့ လွှဲပြောင်းပေးလိုက်ပြီဖြစ်ကြောင်း အာဏာပိုင်များက ဇန်နဝါရီလ(၃ဝ)ရက်တွင် ထုတ်ဖော်ပြောခဲ့သည်။

၂ဝ၂၃ ခုနှစ် မတ်လတွင် Sergio Tarache Parra ဟု အမည်ရသော အမျိုးသားသည် (၁၈)နှစ်အရွယ် ကတ်သရင်း ဂိုးမက်ဇ်ဆိုသည့် မိန်းကလေးငယ်ကို လီမာမြို့ရှိ ဗဟိုရင်ပြင်တွင် ဓါတ်ဆီဖြင့်လောင်းကာ အရှင်လတ်လတ် မီးရှို့ခဲ့ သည်ဟု စွပ်စွဲခံခဲ့ရကြောင်းလည်း သိရသည်။ 

ကတ်သရင်းဂိုးမက်ဇ်သည် အဆိုပါနေ့အစောပိုင်းတွင် Sergio Tarache Parra နှင့် လမ်းခွဲခဲ့ခြင်းဖြစ်ကြောင်း သိရသည်။ အဆိုပါဖြစ်ရပ်များဖြစ်ပွားပြီးနောက် တစ်လအကြာတွင် Sergio Tarache Parra ကို ကိုလံဘီယာနိုင်ငံ တွင် ခြေရာခံမိခဲ့ပြီး ဖမ်းဆီးခဲ့ခြင်းဖြစ်ကြောင်း သိရသည်။ လုံခြုံရေးကင်မရာများသည် အခင်းဖြစ်ပွားရာနေရာမှ ထွက်ပြေးသွားသော Sergio Tarache Parra ကို ဖမ်းယူနိုင်ခဲ့ခြင်းဖြစ်ကြောင်းလည်း သိရသည်။ 

ထို့အပြင် Sergio Tarache Parra ကို ဖမ်းမိစေရန်အတွက် သတင်းပေးသူများကို အမေရိကန်ဒေါ်လာ (၁၂၅ဝဝ) နှင့် ညီမျှသော ဆုငွေပေးအပ်သွားမည်ဖြစ်ကြောင်း ပီရူးရဲတပ်ဖွဲ့က ထုတ်ပြန်ကြေညာခဲ့သည်။ အဆိုပါဖြစ်ရပ် ဖြစ်ပွားပြီးနောက် ကတ်သရင်းဂိုးမက်ဇ်သည် ၎င်း၏ ခန္ဓာကိုယ်(၆ဝ) ရာခိုင်နှုန်းခန့်အထိ မီးလောင်ဒဏ်ရာများ ရရှိခဲ့ ကာ ဆေးရုံတင်ထားခဲ့ရပြီးနောက် (၆)ရက်အကြာတွင် သေဆုံးသွားခဲ့ကြောင်း သိရသည်။

ယင်းကိစ္စနှင့်ပတ်သက်ပြီး Sergio Tarache Parra ကို ထောင်ဒဏ်တစ်သက်တစ်ကျွန်း ချမှတ်ရန် အစိုးရရှေ့နေ များက တောင်းဆိုနေကြကြောင်းလည်း သိရသည်။ ထို့အပြင် ပီရူးနိုင်ငံ လီမာမြို့တွင် ကတ်သရင်းဂိုးမက်ဇ်နှင့် ဆင်တူသည့် ရာဇဝတ်မှုတစ်ခုလည်း ၂ဝ၁၈ ခုနှစ်က ဖြစ်ပွားခဲ့ကြောင်း သိရသည်။ 

အဆိုပါဖြစ်ရပ်တွင် အမျိုးသားတစ်ဦးသည် ဘတ်စ်ကားပေါ်သို့တက်လာတာ ၎င်း၏ ရည်းစားဟောင်းမိန်းကလေး အီဗာအေဂရီဒါကို ဓါတ်ဆီဖြင့် လောင်းခဲ့ပြီး အရှင်လတ်လတ်မီးရှို့ခဲ့ကြောင်း သိရသည်။ ထို့အပြင် အီဗာအေဂရီဒါ သည်လည်း မီးလောင်ဒဏ်ရာများဖြင့် ရက်ပိုင်းအကြာတွင် သေဆုံးခဲ့ကြောင်း သိရသည်။