Pika (NSS) - ဇန်နဝါရီ ၃၁ 

ယီမင်အခြေစိုက်ဟူသီလက်နက်ကိုင်အဖွဲ့သည် အမေရိကန်၊ ဗြိတိန်နိုင်ငံတို့နှင့် ရေရှည်ထိပ်တိုက်တွေ့ဆုံမှုများ လုပ်ဆောင်ရန်အတွက် အသင့်ဖြစ်နေပြီဖြစ်ကြောင်း ဟူသီလက်နက်ကိုင်တပ်ဖွဲ့တပ်မှူး  Mohamed al-Atifi က ထုတ်ပြန်ပြောကြားခဲ့သည်။ 

"အာဏာရှင်တွေဖြစ်တဲ့ အမေရိကန်နဲ့ ဗြိတိန်တို့ရဲ့အင်အားစုတွေနဲ့ ရေရှည်ထိပ်တိုက်ရင်ဆိုင်မှုတွေအတွက် ကျွန်တော်တို့ပြင်ဆင်ထားပါတယ်။ အမေရိကန်နဲ့ဗြိတိန်တို့အပါအဝင် သူတို့ရဲ့မိတ်ဖက်နိုင်ငံတွေဟာ ကျွန်တော်တို့ ရဲ့အချုပ်အခြာအာဏာပိုင်ဆုံးဖြတ်ချက်ကို နားလည်မှာပါ။ ပြီးတော့ ဒီဆုံးဖြတ်ချက်နဲ့ပတ်သက်ပြီး အချေအတင် ဆွေးနွေးငြင်းခုံမှုတွေ မရှိပါဘူး" ဟု ပြောခဲ့သည်။

အစ္စရေးက ဂါဇာကမ်းမြောင်ဒေသကို ထိုးစစ်ဆင်မှုများလုပ်ဆောင်မှုနှင့်အတူ အီရန်ကျောထောက်နောက်ခံပြု ဟူသီလက်နက်ကိုင်အဖွဲ့က ပင်လယ်နီအတွင်းရှိ အမေရိကန် နှင့် အခြားပစ်မှတ်များကို တိုက်ခိုက်မှုများ လုပ်ဆောင်ခဲ့ခြင်းကြောင့် အရှေ့အလယ်ပိုင်းဒေသ တစ်ဝိုက်တွင် တင်းမာမှုများမှာ ပိုမိုမြင့်တက်လာခဲ့ခြင်းဖြစ် ကြောင်း သိရသည်။

ပြီးခဲ့သည့်သီတင်းပတ်များအတွင်း အမေရိကန် နှင့် ဗြိတိန်တို့၏တပ်ဖွဲ့များသည် ပင်လယ်နီအတွင်း သွားလာနေ သော သင်္ဘောများတိုက်ခိုက်ခံရမှုကို ကာကွယ်ရန်အတွက် ယီမင်အခြေစိုက်ဟူသီလက်နက်ကိုင်အဖွဲ့၏ ပစ်မှတ် များကို ပူးတွဲတိုက်ခိုက်မှုများ လုပ်ဆောင်ခဲ့ကြောင်းလည်း သိရသည်။ 

အမေရိကန် နှင့် ဗြိတိန်တပ်ဖွဲ့တို့၏ တိုက်ခိုက်မှုများရှိနေသော်လည်း ပင်လယ်နီအတွင်းရှိ ကုန်တင်သင်္ဘောများကို တိုက်ခိုက်မှုများအား ဆက်လက်တိုးမြှင့်လုပ်ဆောင်သွားမည်ဖြစ်ကြောင်း ဟူသီလက်နက်ကိုင်အဖွဲ့က ကတိပြု ပြောခဲ့သည်။ 

ဆီးရီးယားနိုင်ငံ နယ်စပ်အနီး ဂျော်ဒန်နိုင်ငံ အနောက်မြောက်ပိုင်းတွင်ရှိသော အမေရိကန်တပ်ဖွဲ့များကို အီရန် ကျောထောက်နောက်ခံပြုစစ်သွေးကြွအဖွဲ့များက တိုက်ခိုက်မှုများလုပ်ဆောင်ခဲ့ခြင်းကြောင့် တပ်ဖွဲ့ဝင် အနည်းဆုံး (၃)ဦး သေဆုံးကာ အခြားတပ်ဖွဲ့ဝင်(၃၄)ဦး ထိခိုက်ဒဏ်ရာရရှိခဲ့ကြောင်း အမေရိကန်အစိုးရတာဝန်ရှိသူများက ဇန်နဝါရီလ(၂၈)ရက်တွင် ထုတ်ဖော်ပြောခဲ့သည်။ ထို့အပြင် အီရန်ကျောထောက်နောက်ခံပြု စစ်သွေးကြွအဖွဲ့များ ကို လက်တုံ့ပြန်တိုက်ခိုက်မှုများ လုပ်ဆောင်သွားမည်ဟု အမေရိကန်စစ်တပ်က ကတိပြုခဲ့ကြောင်းလည်း သိရသည်။