Pika (NSS) - ဇန်နဝါရီ ၂၂ 

ထိုင်ဝမ်ကျွန်းမြောက်ဘက်လေပိုင်နက်ကို တရုတ်၏ မိုးပျံပူဖောင်း(၆)လုံး  ဖြတ်ကျော်ပျံသန်းဝင်ရောက်လာခဲ့ကြောင်း ထိုင်ဝမ်အစိုးရက ဇန်နဝါရီလ(၂၂)ရက်တွင် ထုတ်ဖော်ပြောဆိုခဲ့သည်။

ထို့အပြင် တရုတ်စစ်လေယာဉ်များ နှင့် ရေတပ်သင်္ဘောများကိုလည်း အဆိုပါဧရိယာအတွင်းတွင် တွေ့ရှိခဲ့ကြောင်း ထိုင်ဝမ်အစိုးရက ထပ်မံပြောကြားခဲ့သည်။ တရုတ်အစိုးရသည် ပစိဖိတ်သမုဒ္ဒရာအတွင်းတွင် ပျောက်ကွယ်သွား သော အဆိုပါမိုးပျံပူဖောင်းများ စေလွှတ်နေရခြင်း၏ ရည်ရွယ်ချက်ကို လူသိရှင်ကြား ထုတ်ပြန်ကြေညာခြင်းမျိုး မရှိသော်လည်း ထိုင်ဝမ်ပိုက်နက်အတွင်းသို့ တရုတ်မိုးပျံပူဖောင်းများ ဖြတ်ကျော်ဝင်ရောက်လာသည့် အကြိမ်အရေ အတွက်မှာ ပိုမိုမြင့်တက်လာခဲ့ကြောင်း သိရသည်။

ထိုင်ဝမ်အနီးတစ်ဝိုက်ရှိ ရေပိုင်နက်နှင့် လေပိုင်နက်အတွင်း တရုတ်၏စစ်ရေးလှုပ်ရှားမှုတစ်စိတ်တစ်ပိုင်းအဖြစ် မိုးပျံပူဖောင်းများစေလွှတ်နေခြင်းကို ထိုင်ဝမ်ကာကွယ်ရေးဝန်ကြီးဌာနက မှတ်ချက်ပြုပြောဆိုခဲ့ကြောင်းလည်း သိရသည်။ မိုးပျံပူဖောင်းတစ်လုံးသည် တောင်ဘက်ရှိ Pingtung မြို့အနီးကို ဖြတ်သန်းသွားခဲ့ပြီး အခြားမိုးပျံ ပူဖောင်းများမှာ Keelung ဆိပ်ကမ်း၏ မြောက်ဘက်သို့ ပျံသန်းသွားခဲ့ကြောင်း  ထိုင်ဝမ်ကာကွယ်ရေးဝန်ကြီးဌာန က ပြောကြားခဲ့သည်။

Keelung ဆိပ်ကမ်းသည် ထိုင်ဝမ်၏ အရေးပါသော ရေတပ်အခြေစိုက်စခန်း ရှိသည့်နေရာဖြစ်ကြောင်းလည်း သိရသည်။ အဆိုပါ မိုးပျံပူဖောင်းများတွင် တိကျပြတ်သားသော စစ်ရေးလုပ်ဆောင်မှု ရှိ/မရှိ ဆိုသည့်အချက်ကို လက်ရှိအချိန်အထိ ရှင်းရှင်းလင်းလင်းမသိရှိရသေးကြောင်းလည်း သိရသည်။

သို့သော်လည်း မိုးပျံပူဖောင်းများ စေလွှတ်ခြင်းမှာ ထိုင်ဝမ်နှင့်ပြန်လည်ပေါင်းစည်းရန်အတွက် လိုအပ်ပါက အင်အားသုံးသွားမည်ဖြစ်ကြောင်း ပြောဆိုထားသည့် တရုတ်နိုင်ငံ၏ စစ်ရေးလှုပ်ရှားမှု၏ တစ်စိတ်တစ်ပိုင်းဖြစ်ပုံ ပေါ်ကြောင်း ထိုင်ဝမ်ကာကွယ်ရေးဝန်ကြီးဌာနက ပြောကြားခဲ့သည်။ ထိုင်ဝမ်တွင် သမ္မတရွေးကောက်ပွဲကို ယခုလ အစောပိုင်းတွင်ကျင်းပကာ သမ္မတအသစ်ကိုရွေးချယ်ပြီးနောက် တရုတ်သည် ထိုင်ဝမ်ကျွန်းအပေါ် စစ်ရေး နှင့် နိုင်ငံရေးအရ ဖိအားပေးမှုများကို ပိုမိုအရှိန်မြှင့်လုပ်ဆောင်လာခဲ့ကြောင်းလည်း သိရသည်။