ဂျန်ဇက် (NSS) - ဇန်နဝါရီ ၂၂ 

အစ္စရေးဝန်ကြီးချုပ်နေတန်ရာဟုဟာ ဂါဇာစစ်ပွဲရပ်တန့်ဖို့ နဲ့ ပြန်ပေးဆွဲခံထားရသူတွေ ပြန်လွှတ်မြောက်စေဖို့ ဟားမက်စ်အဖွဲ့ရဲ့ထပ်မံအဆိုပြုချက်တွေကို ငြင်းဆန်ပယ်ချလိုက်ကြောင်း သိရပါတယ်။ 

ဂါဇာစစ်ပွဲ အဆုံးသတ်စေဖို့ ရည်ရွယ်ချက်နဲ့ ဟားမက်စ်အဖွဲ့တောင်းဆိုတဲ့ တောင်းဆိုချက်တွေထဲမှာ ဂါဇာဒေသ အတွင်းက အစ္စရေးတပ်ဖွဲ့ဝင်တွေပြန်ရုတ်သိမ်းဖို့၊ သေဆုံးသူတွေရဲ့ရုပ်အလောင်းတွေကို ပြန်လွှဲပြောင်းပေးဖို့ စတဲ့ အချက်တွေကို ပါဝင်ခဲ့ကြောင်း သိရပါတယ်။ 

အစ္စရေးဝန်ကြီးချုပ်က "ဖမ်းဆီးခံထားရသူတွေ ပြန်လွှတ်ပေးမယ်၊ အပြန်အလှန်အနေနဲ့ စစ်ပွဲကို အဆုံးသတ်ဖို့ ဟားမက်စ်အုပ်စုက တောင်းဆိုထားတယ်။ ဒါ့အပြင် ဟားမက်စ်အဖွဲ့ဟာ ဂါဇာဒေသထဲကနေ အစ္စရေးတပ်ဖွဲ့တွေ ပြန်ရုတ်သိမ်းဖို့ နဲ့ သေဆုံးခဲ့တဲ့ ပါလက်စတိုင်းရုပ်အလောင်းတွေကို ပြန်လွှဲပြောင်းပေးဖို့ တောင်းဆိုထားတယ်။ ကျွန်တော်ကတော့ ဟားမက်စ်အဖွဲ့တောင်းဆိုချက်တွေကို ငြင်းဆန်ပယ်ချထားတယ်" လို့ ပြောပါတယ်။ 

ဟားမက်စ်နဲ့ အစ္စရေးနိုင်ငံကြားဖြစ်ပွားနေတဲ့စစ်ပွဲအဆုံးသတ်စေဖို့ ရည်ရွယ်ချက်နဲ့ အမေရိကန်၊ ကာတာ နဲ့ အီဂျစ်နိုင်ငံတို့ဟာ ကြားဝင်စေ့စပ်ပေးနေကြောင်း သိရပါတယ်။ အစ္စရေး နဲ့ ဟားမက်စ်လက်နက်ကိုင်အဖွဲ့ကြား စစ်ပွဲဖြစ်လာခဲ့ပြီးနောက်ပိုင်း ဖမ်းဆီးထားသူတွေ အပြန်အလှန်လွှတ်ပေးခဲ့ပေမယ့် ဒီဇင်ဘာလအစောပိုင်းမှာ တိုက်ပွဲတွေ ထပ်မံဖြစ်ပွားခဲ့ကြောင်း သိရပါတယ်။

ဟားမက်စ်အဖွဲ့ရဲ့တိုက်ခိုက်မှုတွေအတွင်း ဖမ်းဆီးခံထားရသူ လူပေါင်း ၂၄ဝ ကျော်ထဲက လူပေါင်း ၁၁ဝ ကျော် ပြန်လွတ်မြောက်ခဲ့ပေမယ့် လူပေါင်း ၁၃၆ ဦး ဖမ်းဆီးခံထားရဆဲဖြစ်ကြောင်း သိရပါတယ်။ အစ္စရေး နဲ့ ဟားမက်စ် လက်နက်ကိုင်အဖွဲ့ကြားဖြစ်ပွားနေတဲ့စစ်ပွဲဟာ ရက်ပေါင်း ၁ဝဝ ကျော်ကြာနေပြီး စစ်ပွဲအဆုံးသတ်ဖို့ ကုလသမဂ္ဂ အပါအဝင် နိုင်ငံတကာအဖွဲ့အစည်းတွေက တောင်းဆိုထားကြောင်း သိရပါတယ်။ 

ဒါပေမယ့် အစ္စရေးအစိုးရဟာ ဟားမက်စ်အဖွဲ့ကိုအမြစ်ပြတ်ချေမှုန်းနိုင်ဖို့ ရည်ရွယ်ချက်နဲ့ စစ်ပွဲကို ဆက်လက်တိုက်ခိုက်နေဆဲဖြစ်ကြောင်း သိရပါတယ်။