ဂျန်ဇက်၊ ကျော် (NSS) - ဇန်နဝါရီ ၁၂

တပ်မတော်နှင့်မြောက်ပိုင်းမဟာမိတ်(၃)ဖွဲ့တို့ တွေ့ဆုံဆွေးနွေးမှုများပြုလုပ်ပြီးနောက် ယာယီပစ်ခတ်တိုက်ခိုက်မှုရပ်စဲရေးအတွက် သဘောတူညီခဲ့ကြကြောင်း နစက ပြောခွင့်ရ ဗိုလ်ချုပ်ဇော်မင်းထွန်းကပြောသည်။

ယာယီပစ်ခတ်တိုက်ခိုက်မှုရပ်စဲရေးသဘောတူညီမှုနှင့်ပတ်သက်၍ ဗိုလ်ချုပ်ဇော်မင်းထွန်းက ယနေ့ (ဇန်နဝါရီလ ၁၂ ရက်)တွင် မီဒီယာများအားရှင်းလင်းပြောကြားခဲ့ခြင်းဖြစ်သည်။

"တရုတ်နိုင်ငံရဲ့ ညှိနှိုင်းဆောင်ရွက်ပေးမှုနဲ့ မြောက်ပိုင်း(၃)ဖွဲ့နဲ့မြန်မာနိုင်ငံက ငြိမ်းချမ်းရေးညှိနှိုင်းမှုဆွေးနွေးရေးအဖွဲ့တို့ ကူမင်းမြို့မှာတွေ့ဆုံခဲ့ပါတယ်"ဟု ဗိုလ်ချုပ်ဇော်မင်းထွန်းကပြောသည်။

ထိုသို့ တွေ့ဆုံညှိနှိုင်းဆွေးနွေးပြီးနောက် ယာယီပစ်ခတ်တိုက်ခိုက်မှုရပ်စဲရေးသဘောတူညီချက်ရရှိခဲ့ကာ ပစ်ခတ်တိုက်ခိုက်မှုရပ်စဲရေးအား  ခိုင်မာစေရန်အတွက်လည်း ဆက်လက်ဆောင်ရွက်သွားမည်ဖြစ်ကြောင်း ဗိုလ်ချုပ်ဇော်မင်းထွန်းကပြောသည်။

တရုတ်နိုင်ငံ၏ ကြားဝင်စေ့စပ်မှုများကို အရှိန်မြှင့်လုပ် ဆောင်ပေးမှုများကြောင့် မြန်မာတပ်မတော်ကိုယ်စားလှယ်များ နှင့် မြန်မာနိုင်ငံမြောက်ပိုင်းတိုင်းရင်းသားလက်နက်ကိုင်အဖွဲ့များကြား အပစ်ခတ်ရပ်စဲရန် သဘောတူညီမှုရရှိခဲ့ကြောင်း တရုတ်နိုင်ငံခြားရေးဝန်ကြီးဌာန၊ ပြောရေးဆိုခွင့်ရှိသူ မာအိုနင်ကလည်း ယနေ့ (ဇန်နဝါရီလ ၁၂ ရက်)က ပြုလုပ်သော ပုံမှန်သတင်းစာရှင်းလင်းပွဲတွင် ပြောသည်။

မာအိုနင်က " မြန်မာတပ်မတော်ကိုယ်စားလှယ်တွေ နဲ့ မြန်မာနိုင်ငံ မြောက်ပိုင်းတိုင်းရင်းသား လက်နက်အဖွဲ့သုံးဖွဲ့ရဲ့ကိုယ်စားလှယ်တွေဟာ ချက်ချင်းအပစ်ခတ်ရပ်စဲဖို့၊ ရန်လိုမှုတွေ အဆုံးသတ်ဖို့၊  အငြင်းပွားမှုတွေကို တွေ့ဆုံဆွေးနွေးမှုတွေကတဆင့် ငြိမ်းချမ်းစွာ ဆွေးနွေးဖြေရှင်းဖို့ သဘောတူညီခဲ့တယ်။ ဒါ့ပြင် နှစ်ဖက်စလုံးဟာ နယ်စပ်ဒေသမှာနေထိုင်နေသူတွေအပြင် မြန်မာနိုင်ငံရှိ တရုတ်နိုင်ငံရဲ့စီမံကိန်းတွေနဲ့ တရုတ်နိုင်ငံသားတွေ ဘေးကင်းရေးအတွက် လုပ်ဆောင်ပေးဖို့ ကတိပြုခဲ့တယ်"ဟု ပြောသည်။

မြန်မာနိုင်ငံမြောက်ပိုင်းနှင့်ပတ်သက်ပြီး အပစ်ခတ်ရပ်စဲရေးရယူနိုင်ခြင်း နှင့် ငြိမ်းချမ်းရေးဆွေးနွေးနိုင်ခြင်းသည် မြန်မာနိုင်ငံရှိ အဖွဲ့စည်းအားလုံးနှင့်ပတ်သက်သော အကျိုးစီးပွားကိုလုပ်ဆောင်နိုင်ခြင်းဖြစ်သကဲ့သို့ တရုတ်နှင့် မြန်မာနိုင်ငံနယ်စပ်ဒေသငြိမ်းချမ်းရေး နှင့် တည်ငြိမ်ရေးတို့ကိုလည်း ထိန်းသိမ်းရန်အတွက် ကူညီပေးနိုင်မည်ဖြစ်ကြောင်း တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မာနင်အိုက ဆက်လက်ပြောကြားခဲ့သည်။ 

ထို့ပြင် ကုန်စည်စီးဆင်းမှုများမြန်ဆန်စေရန် နယ်စပ်ဒေသရှိ ကုန်သွယ်ရေးဂိတ်များ ပြန်လည်ဖွင့်လှစ်နိုင်ရေး တရုတ်-မြန်မာ နှစ်နိုင်ငံဆက်လက်ညှိနှိုင်းဆောင်ရွက်သွားရန် ဆွေးနွေးခဲ့ကြောင်း နစကပြောခွင့်ရ ဗိုလ်ချုပ်ဇော်မင်းထွန်းက ပြောကြားခဲ့သည်။

နစက ၏ ငြိမ်းချမ်းရေးညှိနှိုင်းမှုဆွေးနွေးရေးအဖွဲ့နှင့် မြောက်ပိုင်း(၃)ဖွဲ့ဖြစ်သည့် MNDAA၊ TNLA နှင့် AA အဖွဲ့တို့မှတာဝန်ရှိသူများသည် တရုတ်နိုင်ငံ၊ ကူမင်းမြို့၌ ဇန်နဝါရီလ ၁၀ ရက် နှင့် ၁၁ ရက်တို့က ညှိနှိုင်းဆွေးနွေးမှုများပြုလုပ်ခဲ့ကြကြောင်း သိရသည်။