ကျော် (NSS) - ဇန်နဝါရီ ၉

နိုင်ငံပေါင်း (၁၅)နိုင်ငံမှ ရဟန်း၊ သီလရှင် နှင့် လူပုဂ္ဂိုလ်များဝင်ရောက်ဖြေဆိုသည့် အပြည်ပြည်ဆိုင်ရာထေရဝါဒဗုဒ္ဓသာသနာပြုတက္ကသိုလ်၏ ၂၀၂၄-၂ဝ၂၅ ပညာသင်နှစ် ဒီပလိုမာ (ဗုဒ္ဓဓမ္မ)သင်တန်းဝင်ခွင့်ရေးဖြေစာမေးပွဲအား ကျင်းပခဲ့ကြောင်း သိရသည်။

အဆိုပါ စာမေးပွဲအား ရန်ကုန်တိုင်း၊ မရမ်းကုန်းမြို့နယ်၊ ဓမ္မပါလကုန်းမြေရှိ အပြည်ပြည်ဆိုင်ရာထေရဝါဒဗုဒ္ဓသာသနာပြုတက္ကသိုလ်၏ စာသင်ခန်းများအတွင်း၌ ယနေ့ (ဇန်နဝါရီလ ၉ ရက်)မှစတင်ကာ ကျင်းပခဲ့ခြင်းဖြစ်သည်။

စာမေးပွဲအား မြန်မာနိုင်ငံမှ ရဟန်း၊ သီလရှင်၊ လူပုဂ္ဂိုလ်များက ကိုယ်တိုင်လာရောက်ဖြေဆိုခဲ့ကြပြီး အခြားသောနိုင်ငံပေါင်း (၁၄)နိုင်ငံမှ ရဟန်း၊ သီလရှင် နှင့် လူပုဂ္ဂိုလ်များက Virtual Zoom Meeting Online System တို့ဖြင့်ဝင်ရောက်ဖြေဆိုခဲ့ကြကာ ဖြေဆိုသူပေါင်း (၁၇၈)ပါး/ဦး ရှိခဲ့ကြောင်း သိရသည်။

အဆိုပါ ရေးဖြေစာမေးပွဲဖြေဆိုပြီးပါက မနက်ဖြန် (ဇန်နဝါရီလ ၁၀ ရက်)တွင် လူတွေ့နှုတ်ဖြေစာမေးပွဲအား ဆက်လက်ဖြေဆိုရမည်ဖြစ်ကြောင်း သိရသည်။

၂၀၂၃-၂၀၂၄ ပညာသင်နှစ်အတွက် ဒီပလိုမာ(ဗုဒ္ဓဓမ္မ) သင်တန်းအသီးသီးကို မြန်မာနိုင်ငံ အပါအဝင်   ပြည် တွင်း၊ ပြည်ပ ၁၈ နိုင်ငံမှ သင်တန်းသား ရဟန်း၊ သီလရှင်၊ လူပုဂ္ဂိုလ် စုစုပေါင်း ၃၁၁ ပါး/ဦးတို့က တက်ရောက်သင်ယူလျက်ရှိကြောင်း သိရသည်။

အပြည်ပြည်ဆိုင်ရာ   ထေရဝါဒဗုဒ္ဓသာသနာပြု တက္ကသိုလ်ကို ၁၉၉၈ ခုနှစ်တွင် စတင်တည်ထောင် ဖွင့်လှစ်ခဲ့ကြောင်း သိရသည်။

တက္ကသိုလ်တွင် ထေရဝါဒ ဗုဒ္ဓသာသနာတော် ကမ္ဘာတစ်ဝန်းလုံးတွင် ပြန့်ပွားစေရန်၊ ထေရဝါဒပိဋကတ်တော်များကို မူရင်းအတိုင်း လေ့လာသင်ယူလိုသည့် ပြည်တွင်း၊ ပြည်ပသင်တန်းသားများအား    လေ့ကျင့်သင်ကြားပေးနိုင်ရန်၊ ထေရဝါဒဗုဒ္ဓသာသနာ ပြန့်ပွားရေးအတွက် ပြည်တွင်း၊ ပြည်ပရှိ ဗုဒ္ဓဘာသာဆိုင်ရာ တက္ကသိုလ်များ၊ တက္ကသိုလ်၏ ရည်မှန်းချက်ကို အထောက်အကူပြုစေမည့် အခြားတက္ကသိုလ်များနှင့်အပြန်အလှန်ပူးပေါင်း ဆောင်ရွက်နိုင်စေရန်၊ ထေရဝါဒဗုဒ္ဓသာသနာ ပြန့်ပွားထွန်းကားရေးအတွက် နိုင်ငံတကာသို့ သာသနာပြုစေလွှတ်နိုင်ရန် အစရှိသော ရည်ရွယ်ချက်များဖြင့် ထေရဝါဒဗုဒ္ဓသာသနာပြုသင်တန်း အသီးသီးကို ဖွင့်လှစ်သင်ကြားလျက်ရှိကြောင်း သိရသည်။