Pika (NSS) - ဇန်နဝါရီ ၇

ရုရှားနှင့် ပဋိပက္ခအတွင်း ယူကရိန်းသို့ ပြည်ပနိုင်ငံများက ကူညီထောက်ပံ့ပေးခဲ့သောအကူအညီများ၏ အသေးစိတ် အချက်အလက်များကို ရုရှားကာကွယ်ရေးဝန်ကြီးဌာနက ထုတ်ပြန်ပြောဆိုခဲ့ကြောင်း သိရသည်။

ယူကရိန်း၏ ကျောထောက်နောက်ခံနိုင်ငံများသည် သမ္မတဇီလန်စကီးကို ကူညီရန်အတွက် အမေရိကန်ဒေါ်လာ (၂ဝ၃)ဘီလျံကျော် သုံးစွဲခဲ့ကြောင်း ရုရှားကာကွယ်ရေးဝန်ကြီးဌာန၏ အချက်အလက်များအရ သိရသည်။

ရုရှားနှင့် တိုက်ပွဲများအတွင်း ယူကရိန်းတပ်ဖွဲ့များကို နိုင်ငံပေါင်း(၅၄)နိုင်ငံက အကူအညီများထောက်ပံ့ပေးခဲ့ ကြောင်း ရုရှားကာကွယ်ရေးဝန်ကြီးဌာနက ပြောကြားခဲ့သည်။ ထို့အပြင် အမေရိကန် နှင့် နေတိုးတို့၏ အာကာသ ယာဉ် (၅ဝဝ)ကျော်သည် ယူကရိန်း၏ လိုအပ်ချက်များအတွက် အလုပ်လုပ်ဆောင်ပေးလျက်ရှိကြောင်း အဆိုပါ ထုတ်ပြန်ချက်တွင် ဖော်ပြထားသည်။

အဆိုပါအကူအညီများထဲတွင် စစ်ဘက်ဆိုင်ရာ စောင့်ကြည့်ရေးဂြိုလ်တု(၇ဝ)ကျော် ပါဝင်ကြောင်း ရုရှားကာကွယ် ရေးဝန်ကြီးဌာနက ပြောထားသည်။ ယူကရိန်းတပ်ဖွဲ့များသည် SpaceX ကုမ္ပဏီပိုင်ရှင်ဖြစ်သည့် ကမ္ဘာကျော် ဘီလျံနာသူဋ္ဌေးကြီး အီလွန်မတ်ထံမှ Starlink ဂြိုလ်တုပေါင်း(၂ဝဝဝဝ)ကျော်အပေါ် မှီခိုနေရကြောင်း အဆိုပါ အချက်အလက်များအရ သိရသည်။

ယူကရိန်းအစိုးရသည် ၎င်း၏ ကျောထောက်နောက်ခံနိုင်ငံများထံမှ ဒုံးကျည်နှင့် အမြောက်လက်နက် (၁၆ဝဝ)ကျော်၊ လေကြောင်းရန်ကာကွယ်ရေးစနစ်(၂ဝဝ)ကျော်၊ တင့်ကား နှင့် သံချပ်ကာယာဉ်(၅၂၂ဝ) စီး နှင့် ဒရုန်းပေါင်း(၂၃ဝဝဝ)ကျော်တို့ကို ရရှိခဲ့ကြောင်း ရုရှားကာကွယ်ရေးဝန်ကြီးဌာနက ပြောခဲ့သည်။

ထို့အပြင် ရုရှားနှင့်စစ်ပွဲတွင် ယူကရိန်းဖက်မှ ပါဝင်တိုက်ခိုက်ရန်အတွက် နိုင်ငံခြားကြေးစားစစ်သား(၁၃၅ဝဝ)ကျော် ယူကရိန်းသို့လာရောက်ခဲ့ကြောင်း ရုရှားစစ်တပ်က ခန့်မှန်းပြောခဲ့သည်။ ယူကရိန်းသို့လာရောက်ခဲ့သည့် နိုင်ငံခြား ကြေးစားစစ်သားများထဲတွင် ဥရောပတိုက်မှ လူ(၈၅ဝဝ)ကျော်၊ တောင်အမေရိက နှင့် မြောက်အမေရိကတိုက်မှ လူ(၂၇ဝဝ)ကျော် နှင့် အခြားလူများမှာ အာရှ နှင့် အာဖရိကတို့မှ ဖြစ်ကြောင်း ရုရှားစစ်တပ်က ပြောခဲ့သည်။

ရုရှားနှင့်တိုက်ပွဲများအတွင်း ယူကရိန်းဖက်မှတိုက်ခိုက်ပေးခဲ့သည့် နိုင်ငံခြားကြေးစားစစ်သား (၅၆ဝဝ)ကျော် သေဆုံးခဲ့ပြီး အခြားလူ(၅၆ဝဝ) မှာ စစ်မြေပြင်မှ ထွက်ပြေးသွားခဲ့ကြကြောင်း ရုရှားအစိုးရတာဝန်ရှိသူများက ခန့်မှန်းပြောဆိုခဲ့သည်။ 

လက်ရှိအချိန်တွင် ယူကရိန်းစစ်တပ်မှာ နိုင်ငံခြားကြေးစားစစ်သား (၁၉ဝဝ) ကျော်သာ ကျန်ရှိတော့ကြောင်း ရုရှားဖက်က ထပ်မံခန့်မှန်းပြောထားသည်။