Pearl (NSS) - ဇန်နဝါရီ ၄

ဆရာတော်ကြီးများနှင့် လူပုဂ္ဂိုလ် စုစုပေါင်း (၅၀၀)ကျော်ကို နစကမှ သာသနာတော်ဆိုင်ရာ ဘွဲ့တံဆိပ်တော်များ လှူဒါန်းပေးအပ်ခဲ့ကြောင်း သတင်းရရှိသည်။ 

နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ယနေ့(ဇန်နဝါရီလ ၄ ရက်) တွင် ဆရာတော်ကြီးများ၊ ဂန္ထဓုရပရိယတ္တိဝန်‌‌ဆောင် စာချဆရာတော်များ၊ ဝိပဿနာဓုရပဋိပတ္တိ ဝန်ဆောင် ကမ္ဗဌာန်းနည်းပြဆရာတော်များ၊ နယ်လှည့်ဓမ္မကထိက၊ ပြည်တွင်း၊ ပြည်ပသာသနာပြုပုဂ္ဂိုလ်များ နှင့် ဗုဒ္ဓသာသနာတော်ကို ပစ္စည်းလေးပါးတို့ဖြင့် ထူးခြားစွာထောက်ပံ့လှူဒါန်းနေကြသည့် ပုဂ္ဂိုလ်များအား သာသနာတော်ဆိုင်ရာ ဘွဲ့တံဆိပ်တော်များကို ဆက်ကပ်လှူဒါန်းအပ်နှင်းခဲ့သည်။

ထိုသို့ ဆပ်ကပ်လှူဒါန်းအပ်နှင်းခဲ့ရာ  အဘိဓဇမဟာရဋ္ဌဂုရုဘွဲ့တံဆိပ်တော်အား  တနင်္သာရီတိုင်း၊  ထားဝယ်မြို့ ၊  ဇေယျဝတီ ကျောင်းတိုက်တွင် သီတင်းသုံးသော ဘဒ္ဒန္တသူရိယ အပါအဝင် ဆရာတော်ကြီး (၇)ပါးအား ဆက်ကပ် လှူဒါန်းအပ်နှင်းခဲ့ကြောင်း သိရသည်။

အဂ္ဂမဟာပဏ္ဍိတဘွဲ့တံဆိပ်တော်အားလည်း ကရင်ပြည်နယ်၊  အမှတ် (၉)ရပ်ကွက် ၊ ခေမာရာမစာသင်တိုက် မှ ဘဒ္ဒန္တ သောပါက နှင့် ပြည်ပဘွဲ့ခံဆရာတော်ကြီး (၃)ပါးအပါအဝင်  စုစုပေါင်း(၂၁)ပါးကို  လှူဒါန်းအပ်နှင်းခဲ့ကြောင်း သိရသည်။

အလားတူ အဂ္ဂမဟာဂန္ထဝါစကပဏ္ဍိတဘွဲ့တံဆိပ်တော်အား ဆရာတော်ကြီး (၂၅)ပါး နှင့် သီလရှင်ဆရာကြီး (၂)ပါးကို လည်းကောင်း၊ မဟာဂန္ထဝါစကပဏ္ဍိတဘွဲ့တံဆိပ်တော်အား   ဆရာတော်ကြီး  (၅၀)ပါး နှင့် သီလရှင်ဆရာကြီး (၇)ပါးကို လည်းကောင်း၊ ဂန္ထဝါစကပဏ္ဍိတဘွဲ့တံဆိပ်တော်အား   ဆရာတော်ကြီး  (၅၃)ပါး နှင့် သီလရှင်ဆရာကြီး (၂၀)ပါးတို့ကို အပ် နှင်းခဲ့သည်။ 

ထို့ပြင် မဟာ ဓမ္မာကထိကဗဟုဇနဟိတဓရဘွဲ့တံဆိပ်တော်အား   ဆရာ တော်ကြီး (၂)ပါးနှင့် ဓမ္မာကထိက ဗဟုဇနဟိတဓရဘွဲ့တံဆိပ်တော်အား   ဆရာတော်ကြီး (၄)ပါးတို့ကို လည်းကောင်း၊ အဘိဓဇအဂ္ဂမဟာသဒ္ဓမ္မ ဇောတိကဓဇ ဘွဲ့တံဆိပ်တော်အား ဆရာတော်ကြီး(၇)ပါးကိုလည်းကောင်း၊  အဂ္ဂမဟာသဒ္ဓမ္မ ဇောတိကဓဇဘွဲ့တံဆိပ်တော်အား  ဆရာတော်ကြီး(၄၇)ပါး၊  ပြည်ပဘွဲ့ခံဆရာတော်ကြီး(၃)ပါးတို့ကိုလည်းကောင်း၊ မဟာ သဒ္ဓမ္မဇောတိကဓဇဘွဲ့တံဆိပ်တော် အား ဆရာတော်ကြီး (၈၉)ပါး၊ ပြည်ပဘွဲ့ခံဆရာတော်ကြီး (၄)ပါး ၊  သီလရှင် ဆရာကြီး (၇)ပါး နှင့် လူပုဂ္ဂိုလ် (၅) ဦးကိုလည်းကောင်း၊ သဒ္ဓမ္မဇောတိကဓဇဘွဲ့တံဆိပ်တော်အား  ဆရာတော်ကြီး  (၇၄) ပါး၊ ပြည်ပဘွဲ့ခံ ဆရာတော်ကြီး (၁)ပါး ၊  သီလရှင်ဆရာကြီး (၅)ပါးနှင့် လူပုဂ္ဂိုလ် (၁) ဦး၊ ပြည်ပဘွဲ့ခံလူပုဂ္ဂိုလ် (၁) ဦးတို့ကို အပ်နှင်းခဲ့ကြောင်း သိရသည်။ 

အဂ္ဂမဟာကမ္မဋ္ဌာနာစရိယဘွဲ့တံဆိပ်တော်အား ဆရာတော်ကြီး(၇)ပါး၊ ပြည်ပဘွဲ့ခံဆရာတော်ကြီး (၁)ပါး နှင့် မဟာ ကမ္မဋ္ဌာနာ စရိယ ဘွဲ့တံဆိပ်တော်အား ဆရာတော်ကြီး  (၉) ပါး၊ ကမ္မဋ္ဌာနာစရိယ ဘွဲ့တံဆိပ်တော်အားဆရာတော်ကြီး  (၁၇) ပါး တို့ကိုလည်း အပ်နှင်းခဲ့သည်။ 

ထို့နောက် အဂ္ဂမဟာသီရိသုဓမ္မမဏိဇောတဓရဘွဲ့တံဆိပ်တော်အား ရန်ကုန်တိုင်း၊ ကမာရွတ်မြို့နယ်နေ ဒေါက်တာ မောင်မောင်ဦး ကို လည်းကောင်း၊  အဂ္ဂမဟာသီရိသုဓမ္မသိင်္ဂီ ဘွဲ့တံဆိပ်တော်အား မန္တလေးတိုင်း၊ မဟာအောင်မြေ မြို့နယ်နေ ဒေါ်စန်းစန်းဝေ  နှင့် ရန်ကုန်တိုင်း၊ ဒဂုံမြို့သစ်(မ)နေ ဒေါ်နုနုဝေတို့ကို အပ်နှင်းခဲ့ကြောင်း သိရသည်။ 

အလားတူ သီရိသုဓမ္မမဏိဇောတဓရဘွဲ့တံဆိပ်တော်အား မန္တလေးတိုင်း၊ သပိတ်ကျင်းမြို့နယ်နေ ဦးမန်းစိန်၊ ချမ်းမြသာစည်မြို့နယ်နေ ဦးဝမ်ရှင်းရွှေ နှင့်  ရန်ကုန်တိုင်း၊ သာကေတမြို့နယ်နေ ဦးအောင်ကိုဇော် တို့ကို လည်း ကောင်း၊  သီရိသုဓမ္မသိင်္ဂီဘွဲ့တံဆိပ်တော်ကို ကချင်ပြည်နယ်၊ မိုးညှင်းမြို့နယ်နေ ဒေါ်တင်ညွန့် အပါအဝင် (၆)ဦးတို့ကို အပ်နှင်းခဲ့သည်။ 

ထို့ပြင် သီဟသုဓမ္မမဏိဇောတဓရဘွဲ့တံဆိပ်တော်အား ပြည်ပဘွဲ့ခံလူပုဂ္ဂိုလ်တစ်ဦး အပါအဝင် (၅)ဦး ၊ သီဟ  သုဓမ္မသိင်္ဂီဘွဲ့တံဆိပ်တော်အား လူပုဂ္ဂိုလ် (၄)ဦး နှင့် သုဓမ္မမဏိဇောတဓရဘွဲ့တံဆိပ်တော်အား လူပုဂ္ဂိုလ် (၄)ဦး ၊ သုဓမ္မသိင်္ဂီ   ဘွဲ့တံဆိပ်တော်အား လူပုဂ္ဂိုလ် (၁၄)ဦး တို့ကို အပ်နှင်းခဲ့ကြောင်း သိရသည်။

ထို့ကြောင့် ယနေ့(ဇန်နဝါရီ ၄ ရက်) ၊ (၇၆)နှစ်မြောက်လွတ်လပ်ရေးနေ့၌ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်အနေဖြင့် ဆရာတော်ကြီးများနှင့် လူပုဂ္ဂိုလ် (၅၀၈)ဦးကို  သာသနာတော်ဆိုင်ရာ ဘွဲ့တံဆိပ်တော်များ ပေးအပ်ခဲ့ကြောင်း သိရသည်။