မြူနစ် (NSS) - ဒီဇင်ဘာ ၃၀

၈၈ မျိုးဆက်ကျောင်းသားခေါင်းဆောင် ဦးကိုကိုကြီး ဦးဆောင်သော ပြည်သူ့ပါတီ(PP) မှတ်ပုံတင်လျှောက်ထားပြီးနောက် (၉)လကျော်အကြာ၌ UEC က မှတ်ပုံတင်ခွင့်ပြုပေးခဲ့သည်။

နစက၏ ပြည်ထောင်စုရွေးကောက်ပွဲကော်မရှင်(UEC)က ပြည်သူ့ပါတီကို ယမန်နေ့ (ဒီဇင်ဘာလ ၂၉ ရက်)မှစ၍ နိုင်ငံရေးပါတီများမှတ်ပုံတင်ခြင်းဥပဒေ ပုဒ်မ ၉ နှင့်အညီ မှတ်ပုံတင်ခွင့်ပြုကြောင်း ကြေညာခဲ့သည်။

ဦးကိုကိုကြီး ဦးဆောင်သော ပြည်သူ့ပါတီ၏ မှတ်ပုံတင်အမှတ်သည် (၄၇)ဖြစ်ကြောင်းလည်း ကော်မရှင်က ကြေညာထားသည်။

နစကအစိုးရက နိုင်ငံရေးပါတီများမှတ်ပုံတင်ခြင်းဥပဒေကို ပြဋ္ဌာန်းခဲ့ပြီးနောက်ပိုင်း ပြီးခဲ့သော မတ်လ ၂၄ ရက်တွင် ပြည်သူ့ပါတီသည် နိုင်ငံတစ်ဝန်းစည်းရုံးမည့်ပါတီအဖြစ် ရွေးကောက်ပွဲကော်မရှင်ထံ၌ မှတ်ပုံတင်ပြန်လည် လျှောက်ထားခဲ့သည်။

“ဒါကတော့ ပြည်ထောင်စုရွေးကောက်ပွဲကော်မရှင်က ကျွန်တော်တို့ ပါတီတည်ထောင်ခွင့် လျှောက်ထားတဲ့ ပါတီတည်ထောင်လိုသူတွေအားလုံးကို စိစစ်တဲ့အခါမှာ ကြန့်ကြာတယ်လို့ပဲ သိရှိထားပါတယ်။ စစ်ပြီးတဲ့အခါကြတော့ အားလုံး ပြည့်စုံလို့ သူတို့ ခွင့်ပြုပေးလိုက်တယ်လို့ ကျွန်တော်တို့ အပြုသဘောဆောင်ပြီးတော့ မြင်ပါတယ်” ဟု ပြည်သူ့ပါတီ တည်ထောင်လိုသူ ဒုတိယခေါင်းဆောင်ဖြစ်သော ဦးကျော်လင်းက NSS ကို ပြောသည်။

လက်ရှိတွင် ပါတီမှတ်ပုံတင်ခွင့် ရရှိခဲ့ပြီဖြစ်သည့်အတွက် ပြည်သူ့ပါတီအနေဖြင့် ရက်ပေါင်း (၉၀)အတွင်း ပါတီဝင်အင်အား တစ်သိန်းရရှိရန်အတွက် စီမံချက်ချကာ စုဆောင်းသွားမည်ဖြစ်ကြောင်း ဦးကျော်လင်းက ပြောသည်။

“ကျွန်တော်တို့ ပါတီမှတ်ပုံတင်ရပြီဆိုတော့ ရက်ပေါင်း (၉၀)အတွင်းမှာ ပါတီဝင်စုဆောင်းတဲ့ အလုပ်တွေ လုပ်ရတော့မှာ။ ဥပဒေ ပုဒ်မ ၅၊ ပုဒ်မခွဲ (စ)ပါအတိုင်းပေါ့။ ကျွန်တော်တို့က မြန်မာတစ်နိုင်ငံလုံး စည်းရုံးမယ့်ပါတီဖြစ်တဲ့အတွက် အနည်းဆုံး ပါတီဝင် တစ်သိန်းကို စုဆောင်းရမှာဖြစ်ပါတယ်။ အဲဒါကိုလည်း ကျွန်တော်တို့ ပုံစံ(ဇ)နဲ့ စုဆောင်းပြီးတော့ ပြည်ထောင်စု ရွေးကောက်ပွဲကော်မရှင်ကို တင်ပြရမှာပေါ့။ အဲဒါကြောင့် ကျွန်တော်တို့ တစ်နိုင်ငံလုံးမှာ ရှိတဲ့ပါတီဝင် အင်အားတွေကို စတင်ပြီး စုဆောင်းဖို့အတွက်ကို စီမံချက်ချပြီး ဆောင်ရွက်သွားမယ်” ဟု ၎င်းက ဆက်လက်ပြောသည်။

လွှတ်တော်အမတ်ဟောင်း ဦးစိန်ဝင်း ဦးဆောင်သော အမျိုးသားညီညွတ်သောဒီမိုကရက်တစ်ပါတီ(NUDP)သည် ဦးကိုကိုကြီး ဦးဆောင်သည့် ပြည်သူ့ပါတီနှင့် ပူးပေါင်းထားသည်။

နိုင်ငံရေးပါတီများမှတ်ပုံတင်ခြင်းဥပဒေအရ ရွေးကောက်ပွဲကော်မရှင်ထံတွင် မှတ်ပုံတင်လျှောက်ထားခဲ့သော နိုင်ငံရေးပါတီသည် လက်ရှိအချိန်ထိ စုစုပေါင်း (၆၅)ပါတီရှိကြောင်း သိရသည်။

အဆိုပါ (၆၅)ပါတီအနက် ပါတီပေါင်း (၄၇)ခုကို ပြည်ထောင်စုရွေးကောက်ပွဲကော်မရှင်က မှတ်ပုံတင်ခွင့်ပြုပေးထားကြောင်း သိရသည်။