Pika (NSS) - ဒီဇင်ဘာ ၂၇ 

ဩစတြေးလျနိုင်ငံ အရှေ့ပိုင်းတွင် ခရစ္စမတ်အားလပ်ရက်များအတွင် ပြင်းထန်သော မိုးကြိုးမုန်တိုင်းများ ဝင်ရောက်တိုက်ခတ်ခဲ့ရာ အနည်းဆုံးလူ(၉)ဦး သေဆုံးခဲ့ကြောင်း အာဏာပိုင်များက ဒီဇင်ဘာလ(၂၇)ရက်တွင် ထုတ်ပြန် ပြောကြားခဲ့သည်။

အဆိုပါမိုးကြိုးမုန်တိုင်းများ ဝင်ရောက်တိုက်ခတ်မှုကြောင့် သောင်းနှင့်ချီသောနေအိမ်များ လျှပ်စစ်မီး ပြတ်တောက်မှုများနှင့် ကြုံတွေ့နေရဆဲဖြစ်ကြောင်း သိရသည်။ ဒီဇင်ဘာလ(၂၅)ရက် နှင့် (၂၆)ရက်တို့တွင် ဗစ်တိုးရီးယားပြည်နယ်၊ နယူးဆောက်ဝေးလ်ပြည်နယ် နှင့် ကွင်းစ်လန်းပြည်နယ်တို့တွင် မိုးသည်းထန်စွာရွာသွန်းမှု နှင့်အတူ မိုးသီးကြွေခြင်းများလည်း ဖြစ်ပေါ်ခဲ့ကြောင်း သိရသည်။

ထို့အပြင် လေပြင်းများတိုက်ခတ်မှုကြောင့် နေအိမ်များ၏ အမိုးများလည်း လွင့်ထွက်ခဲ့သလို သစ်ပင်လဲကျခြင်းများ လည်း ရှိခဲ့ကြောင်း သိရသည်။ လက်ရှိအချိန်အထိ အိမ်ထောင်စုပေါင်း(၉)သောင်းကျော် လျှပ်စစ်မီးပြတ်တောက်မှု များ နှင့် ကြုံတွေ့နေရဆဲဖြစ်ကြောင်း အာဏာပိုင်များက ပြောကြားခဲ့သည်။

မုန်တိုင်းတိုက်ခတ်နေချိန်အတွင်း Moreton ပင်လယ်အောင်ရှိ Green Island အနီးတွင် လူ(၁၁)ဦးပါသော ရွက်လှေ တိမ်းမှောက်ခဲ့ပြီး အမျိုးသား(၃)ဦးသေဆုံးခဲ့ကြောင်း ကွင်းစ်လန်းပြည်နယ်ရဲမင်းကြီး ကတ်ထရီနာကာရိုးလ်က ပြောကြားခဲ့သည်။

Brisbane မြို့မြောက်ဘက် (၁၈ဝ)ကီလိုမီတာအကွာတွင်ရှိသော ဂျင်ပိုင်းမြို့အနီးတွင် အမျိုးသမီးနှစ်ဦးကို သေဆုံး လျက်တွေ့ရှိခဲ့ကြောင်း ရဲတပ်ဖွဲ့ကပြောကြားခဲ့သည်။ အဆိုပါအမျိုးသမီးနှစ်ဦးသည် ရေကြီးမှုအတွင်း မျောပါသွားခဲ့ ပြီးနောက် သေဆုံးခဲ့ခြင်းဖြစ်ကြောင်း ရဲတပ်ဖွဲ့က ပြောကြားခဲ့သည်။

ထို့အပြင် Brisbane မြို့တောင်ပိုင်းတွင် အသက်(၉)နှစ်အရွယ်မိန်းကလေးတစ်ဦး ရေစီးနှင့်အတူမျောပါသွားခဲ့ပြီး နောက် သေဆုံးလျက်တွေ့ရှိခဲ့ကြောင်း ရဲတပ်ဖွဲ့က ထပ်မံပြောကြားခဲ့သည်။ ခရစ္စမတ် နှင့် နှစ်သစ်ကူးသီတင်းပတ် များအတွင်း လူစည်ကားလေ့ရှိသော မြစ်များ နှင့် ချောင်းများအနီးတွင် ရေကြီးမှုများနှင့်အတူ ကမ်းပါးများ ပြိုကျ နိုင်ကြောင်း အာဏာပိုင်များက သတိပေးထားသည်။

ရေကြီးမှုများဖြစ်ပွားပြီးနောက် ဗစ်တိုးရီးယားပြည်နယ်ရှိ စခန်းချနေရာတစ်ခုတွင် အမျိုးသမီးတစ်ဦးကို သေဆုံးလျက်တွေ့ရှိခဲ့ပြီး အခြားလူနှစ်ဦးမှာ သစ်ပင် ပိမိခဲ့ပြီးနောက် သေဆုံးခဲ့ကြောင်းရဲတပ်ဖွဲ့က ပြောခဲ့သည်။ ထို့အပြင် ဒီဇင်ဘာလ(၂၇)ရက် နောက်ပိုင်းအထိ မိုးဆက်လက်သည်းထန်စွာ ရွာသွန်းနိုင်ဖွယ်ရှိကြောင်း ဩစတြေးလျမိုးလေဝသဗျူရိုက ခန့်မှန်းပြောထားသည်။