ဂျန်ဇက် (NSS) - ဒီဇင်ဘာ ၂၇

အမေရိကန်နိုင်ငအနေဖြင့် အမျိုးသားကာကွယ်ရေးအက်ဥပဒေမူကြမ်းထဲတွင် ပါဝင်သော တရုတ်နိုင်ငံနှင့် ပတ်သက်သည့်ကိစ္စများကို ဆက်လက်ဆောင်ရွက်လာမည်ဆိုလျှင် တရုတ်နိုင်ငံကလည်း အချုပ်အခြာအာဏာပိုင်၊ လုံခြုံရေး နှင့် အကျိုးစီးပွားတို့ကို ကာကွယ်ရန်အတွက် တုံ့ပြန်ဆောင်ရွက်သွားမည်ဖြစ်ကြောင်း တရုတ်နိုင်ငံခြား ရေးဝန်ကြီးဌာနက ပြောသည်။ 

ဒီဇင်ဘာ ၂၆ ရက်က ပြုလုပ်ခဲ့သော ပုံမှန်သတင်းစာရှင်းလင်းပွဲအတွင်း အမေရိကန်အမျိုးသားကာကွယ်ရေး အက်ဥပဒေမှုကြမ်းနှင့်ပတ်သက်ပြီး မေးမြန်းမှုများအပေါ် တရုတ်နိုင်ငံခြားရေးဝန်ကြီးဌာနပြောရေးဆိုခွင့်ရှိသူ မာအိုနင်က တုံ့ပြန်ပြောဆိုခဲ့ခြင်းဖြစ်သည်။ 

အမေရိကန်လွှတ်တော်သည် လာမည့်နှစ်အတွင်း အမေရိကန်အစိုးရကို ကာကွယ်ရေးအသုံးစရိတ်အဖြစ် အမေရိကန်ဒေါ်လာ ၈၈ဝ ဘီလျံကျော် အသုံးပြုခွင့်ပေးမည့် အမျိုးသားကာကွယ်ရေးအက်ဥပဒေမူကြမ်းကို ခွင့်ပြုခဲ့ ကြောင်း သိရသည်။ အမေရိကန်သမ္မတဂျိုးဘိုင်ဒန်သည် လက်ရှိအချိန်တွင် အဆိုပါ အမျိုးသားကာကွယ်ရေးဥပဒေ မူကြမ်းကို ဥပဒေအဖြစ် ပြင်ဆင်ပြောင်းလဲရန် လုပ်ဆောင်နေပြီဖြစ်ကြောင်း သတင်းများထွက်ပေါ်နေသည်။ 

အမေရိကန်အစိုးရ၏ အမျိုးသားကာကွယ်ရေးဥပဒေထဲတွင် တရုတ်နိုင်ငံ၏ ပြည်တွင်းရေးကို ကြားဝင်စွက်ဖက် မည့်အစီအစဉ်များပါဝင်နေပြီး ထိုင်ဝမ်ကို စစ်ရေးကူညီပေးမည့်အစီအစဉ်များ ပါဝင်နေကြောင်း တရုတ်နိုင်ငံခြားရေးဝန်ကြီးဌာနပြောရေးဆိုခွင့်ရှိသူက ထပ်မံပြောဆိုထားသည်။ 

အမေရိကန်နိုင်ငံအနေဖြင့် ထိုင်ဝမ်လွှတ်လပ်ရေးရယူရန်ကြိုးပမ်းမှုများကို မထောက်ခံဘူးဆိုသောကတိများကို လိုက်နာဆောင်ရွက်စေလိုကြောင်း၊ ထိုင်ဝမ်ကို လှည့်စားနေခြင်းများကိုရပ်တန့်ရမည်ဖြစ်ကြောင်း မာအိုနင်က ပြောသည်။ ထိုင်ဝမ်ရေလက်ကြား ငြိမ်းချမ်းရေး၊ တည်ငြိမ်ရေးနှင့်ပတ်သက်ပြီး ဘေးအန္တရာယ်ဖြစ်စေနိုင်မည့် လုပ်ရပ်များကို ရပ်တန့်စေလိုကြောင်း၊ အမေရိကန်အမျိုးသားကာကွယ်ရေးဥပဒေမူကြမ်းထဲတွင် ပါဝင်နေသော တရုတ်နှင့်ဆက်နွယ်နေသည့်ကိစ္စများ အကောင်ထည်ဖော်မည့်အစီအစဉ်ကို ရပ်တန့်စေလိုကြောင်း တရုတ်နိုင်ငံခြားရေးဝန်ကြီးဌာနက ပြောသည်။

တရုတ်အစိုးရသည် အမေရိကန်အမျိုးသားကာကွယ်ရေးအက်ဥပဒေမူကြမ်း ထွက်ပေါ်လာသည့်အချိန်ကတည်းက ကန့်ကွက်ပြောဆိုခဲ့သော်လည်း အမေရိကန်အစိုးရက ရပ်တန့်ခြင်းမရှိဘဲ ဆက်လက်အကောင်အထည်ဖော်ခဲ့ရာ နှစ်နိုင်ငံကြား တင်းမာမှုအရှိန် ပိုမိုမြင့်တက်လာဖွယ်ရှိနေကြောင်း သတင်းများထွက်ပေါ်နေသည်။