Pika (NSS) - ဒီဇင်ဘာ ၂၄ 

ဒီဇင်ဘာလ(၂၃)ရက်တွင် ပင်လယ်နီအတွင်းရှိ အမေရိကန်ရေတပ်ဖျက်သင်္ဘော Laboon သည် ယီမင်အခြေစိုက် ဟူသီလက်နက်ကိုင်အဖွဲ့ ပစ်လွှတ်ခဲ့သောဒရုန်းလေးစင်းကို ပစ်ချခဲ့ကြောင်း အမေရိကန်ဗဟိုကွပ်ကဲမှုဌာနချုပ် (CENTCOM) က ပြောကြားခဲ့သည်။

အဆိုပါဖြစ်ရပ်သည် အရှေ့အလယ်ပိုင်းဒေသတွင်ရှိသော အမေရိကန်စစ်သင်္ဘောများက ဟူသီလက်နက်ကိုင်အဖွဲ့ ပစ်လွှတ်ခဲ့သောဒုံးကျည်များ နှင့် ဒရုန်းများကို ကြားဖြတ်ဟန့်တားမှုများ လုပ်ဆောင်ခဲ့သည့် နောက်ဆုံးဖြစ်ရပ်တစ်ခုဖြစ်ကြောင်းလည်း သိရသည်။

ထို့အပြင် အမေရိကန်ရေတပ်ဖျက်သင်္ဘော Carney က ဒရုန်း(၁၄)စင်းကို ပင်လယ်နီအတွင်း ပစ်ချခဲ့ပြီးနောက် တစ်ပတ်အကြာတွင် ဖျက်သင်္ဘော Laboon က ယခုကဲ့သို့ပစ်ချမှုများ ထပ်မံလုပ်ဆောင်ခဲ့ခြင်းဖြစ်သည်။ အမေရိကန်ဗဟိုကွပ်ကဲမှုဌာနချုပ် က "ဖျက်သင်္ဘော Laboon ဟာ ကုန်တင်သင်္ဘောတွေကို ကာကွယ်ပေးဖို့ အတွက် ပင်လယ်နီတောင်ပိုင်းမှာ ကင်းလှည့်မှုတွေ လုပ်ဆောင်နေချိန်အတွင်း တိုက်ခိုက်ခံခဲ့ရတာပါ။ အဲဒီ ဒရုန်းတွေဟာ ဖျက်သင်္ဘော Laboon ဆီကို ဦးတည်လာတဲ့အချိန်မှာ ပစ်ချခဲ့တာပါ။ အဲဒီဖြစ်ရပ်အတွင်း ထိခိုက် ပျက်စီးမှုတွေ ဒါမှမဟုတ် လူထိခိုက်ဒဏ်ရာရရှိတာမျိုးလည်း မရှိခဲ့ပါဘူး" ဟု ပြောခဲ့သည်။

အဆိုပါဒရုန်းများကို ပစ်ချပြီးနောက် ဖျက်သင်္ဘော Laboon သည် ဒရုန်းများ၏ တိုက်ခိုက်မှုကိုခံခဲ့ရသည့် ကုန်တင်သင်္ဘောနှစ်စီး၏ အကူအညီပေးရန်တောင်းဆိုမှုများကို ချက်ချင်းတုံ့ပြန်ခဲ့ကြောင်းလည်း သိရသည်။ 

CENTCOM က "နော်ဝေးအလံလွှင့်တင်ထားတဲ့ M/V BLAAMANEN ရေနံတင်သင်္ဘောဟာ ဟူသီလက်နက်ကိုင်အဖွဲ့ လွှတ်တင်ခဲ့တဲ့ဒရုန်းတစ်စင်းရဲ့ တိုက်ခိုက်မှုကိုခံခဲ့ရပေမယ့်လည်း သင်္ဘောထိခိုက်ပျက်စီးတာ ဒါမှမဟုတ် လူထိခိုက်ဒဏ်ရာရရှိတာမျိုးတော့ မရှိခဲ့ပါဘူး။ ပြီးတော့ အိန္ဒိယအလံလွှင့်တင်ထားတဲ့ ဂါဘွန်နိုင်ငံပိုင် ရေနံစိမ်းတင် သင်္ဘော M/V SAIBABA ဟာ ဒရုန်းနဲ့တိုက်ခိုက်မှုတွေကို ခံခဲ့ရပေမယ့်လည်း ထိခိုက်ပျက်စီးတာမျိုးတော့ မရှိခဲ့ပါဘူး။ ဖျက်သင်္ဘော Laboon ဟာ အဲ့ဒီသင်္ဘောနှစ်စီးလုံးရဲ့အကူအညီပေးဖို့တောင်းဆိုမှုတွေကို ချက်ချင်း သွားရောက်တုံ့ပြန်ခဲ့ပါတယ်။ ဒီတိုက်ခိုက်မှုတွေဟာ အောက်တိုဘာလ(၁၇)ရက် နောက်ပိုင်းတည်းက ဟူသီ လက်နက်ကိုင်အဖွဲ့က သင်္ဘောတွေကို  (၁၄)ကြိမ်နဲ့ (၁၅)ကြိမ်မြောက်တိုက်ခိုက်မှု လုပ်ဆောင်ခဲ့တာဖြစ်ပါတယ်" ဟု ပြောခဲ့သည်။