ဂျန်ဇက် (NSS) - ဒီဇင်ဘာ ၂၄ 

တအောင်းလက်နက်ကိုင်အဖွဲ့ပြောရေးဆိုခွင့်ရှိသူတစ်ဦးက ၎င်းတို့ဟာ မြန်မာတပ်မတော်ကို အခြားလက်နက်ကိုင် အဖွဲ့နှစ်ခုနဲ့ပူးပေါင်းပြီး မတိုက်ခိုက်ခင် တရုတ်နိုင်ငံက ၎င်းတို့ကို ဆက်သွယ်ခဲ့တယ်လို့ ပြောဆိုလိုက်ကြောင်း ဂျပန်အခြေစိုက် NHK သတင်းဌာနမှာ ဖော်ပြထားပါတယ်။

တအောင်းလက်နက်ကိုင် (TNLA) ဟာ ကိုးကန့်လက်နက်ကိုင်အဖွဲ့၊ ရခိုင်လက်နက်ကိုင်အဖွဲ့တွေနဲ့ ပူးပေါင်းပြီး ရှမ်းပြည်နယ်မြောက်ပိုင်းရှိ တပ်မတော်စခန်းတွေကို အောက်တိုဘာ ၂၇ ရက်က စတင်တိုက်ခိုက်ခဲ့ကြောင်း သိရပါ တယ်။

TNLA ရဲ့ပြောရေးဆိုခွင့်ရှိသူက "အခြားတိုင်းရင်းသားလက်နက်ကိုင်အဖွဲ့နှစ်ဖွဲ့နဲ့အတူ တိုက်ပွဲစတင်ခဲ့ပြီး နောက်ပိုင်းမှာ ဒီမိုကရေစီလိုလားတဲ့အင်အားစုတွေနဲ့အတူ ထိုးစစ်တွေကို အရှိန်မြှင့်လုပ်ဆောင်ခဲ့ပါတယ်။ လက်နက်ကိုင်အဖွဲ့တွေဟာ အခု တစ်လအတွင်းမှာပဲ စစ်ဘက်ဆိုင်ရာအဆောက်အအုံ ၅ဝ လောက်ကို သိမ်းပိုက် နိုင်ခဲ့ပါတယ်" လို့ ပြောခဲ့ပါတယ်။

အဲဒီပူးပေါင်းတိုက်ခိုက်မှုတွေရဲ့ရည်မှန်းချက်တွေကတော့ အရပ်သားတွေရဲ့အသက်အိုးအိမ်နဲ့ ပိုင်ဆိုင်မှုကို ကာကွယ်ဖို့၊ စစ်အာဏာရှင်တွေကို ဖြုတ်ချဖို့၊ အင်တာနက်နဲ့ စမတ်ဖုန်းတွေကတစ်ဆင့် ငွေလိမ်တဲ့သူတွေကို နှိမ်နင်းဖို့ ဖြစ်တယ်လို့ TNLA ရဲ့ပြောရေးဆိုခွင့်ရှိသူက ထပ်မံပြောခဲ့ပါတယ်။

အွန်လိုင်းအသုံးပြုကာ တရုတ်က ငွေလိမ်တဲ့အဖွဲ့တွေဟာ တရုတ်နယ်စပ်အနီး ရှမ်းပြည်နယ်က နယ်မြေတွေမှာ အခြေစိုက်နေကြောင်း ၎င်းက ထပ်မံပြောဆိုခဲ့ပါတယ်။ TNLA ရဲ့ပြောရေးဆိုခွင့်ရှိသူက "အဲဒီ ငွေလိမ်သူတွေကို နှိမ်နင်းပေးဖို့ တရုတ်အစိုးရက အကြိမ်ကြိမ်တောင်းဆိုခဲ့ပါတယ်။ ဒါပေမဲ့ မြန်မာအစိုးရဟာ ငွေကြေးရယူပြီး သူတို့ကို အကာအကွယ်ပေးခဲ့တယ်ဆိုတဲ့ စွပ်စွဲချက်တွေ ထွက်ပေါ်လာနေပါတယ်။

အွန်လိုင်းအသုံးပြုကာ ငွေလိမ်နေတဲ့ဂိုဏ်းတွေကို နှိမ်နင်းဖို့ တရုတ်နိုင်ငံကစီစဉ်ခဲ့ပြီး လက်နက်ကိုင်အဖွဲ့တွေက အဲဒီအစီအစဉ်အတိုင်း လုပ်ဆောင်ဖို့ ဆုံးဖြတ်ခဲ့တယ်" လို့ ပြောပါတယ်။

အဆိုပါတိုက်ခိုက်မှုတွေမစတင်ခင် တရုတ်နိုင်ငံဟာ လက်နက်ကိုင်အဖွဲ့တွေဆီကနေ ပူးပေါင်းဆောင်ရွက်မှု ရရှိဖို့ ကြိုးပမ်းခဲ့သလို လက်နက်ကိုင်အဖွဲ့တွေက လိုလိုလားလား လက်ခံခဲ့ကြောင်း၊ တရုတ်ဟာ လက်နက်ကိုင်အဖွဲ့တွေ က တပ်မတော်ကို တိုက်ခိုက်မယ့်အစီအစဉ်နဲ့ပတ်သက်ပြီး ကြိုသိနေခဲ့ကြောင်း၊ TNLA ရဲ့ ပြောရေးဆိုခွင့်ရှိသူက ထပ်မံပြောဆိုထားပါတယ်။ ဒါ့အပြင် တရုတ်နိုင်ငံဟာ တပ်မတော်ကို လက်နက်ကိုင်အဖွဲ့တွေ တိုက်ခိုက်မယ့် အစီအစဉ်ကိုကြိုသိခဲ့ပေမယ့် နှုတ်ဆိတ်နေပေးဖို့ သဘောတူညီခဲ့ကြောင်း ၎င်းက သူရဲ့အမြင်ကို ထပ်မံပြောဆိုခဲ့ပါတယ်။