ဂျန်ဇက် (NSS) - ဒီဇင်ဘာ ၂၄ 

ပင်လယ်နီဒေသအတွင်းက ဖြတ်သန်းနေတဲ့ ကုန်စည်သင်္ဘောတွေကို ဟူသီလက်နက်ကိုင်အဖွဲ့ တိုက်ခိုက်နေခြင်း နောက်ကွယ်မှာ အီရန်နိုင်ငံ ပါဝင်နေတယ်ဆိုတဲ့ အမေရိကန်အစိုးရရဲ့စွပ်စွဲချက်တွေကို အမေရိကန်အစိုးရ ငြင်းဆန် ပယ်ချလိုက်ပါတယ်။  

ဟူသီလက်နက်ကိုင်အဖွဲ့ဟာ အစ္စရေးနဲ့ ဟားမက်စ်လက်နက်ကိုင်အဖွဲ့ကြား စစ်ပွဲဖြစ်လာခဲ့ပြီးနောက်ပိုင်းတည်းက ကုန်စည်သင်္ဘော အနည်းဆုံး ၁ဝ စင်းကို ပစ်မှတ်ထားပြီး ရော့ကဒ်ဒုံးကျည်၊ ဒရုန်းအစင်းပေါင်း ၁ဝဝ ကျော်နဲ့ တိုက်ခိုက်နေခဲ့ကြောင်း အမေရိကန်စစ်ဘက်က ပြောပါတယ်။

အမေရိကန်ထောက်လှမ်းရေးသတင်းအချက်လက်တွေအရ အီရန်ဟာ ဟူသီလက်နက်ကိုင်အုပ်စုတွေကို ဒရုန်းတွေ၊ ဒုံးကျည်တွေနဲ့ ထောက်လှမ်းရေးအချက်လက်တွေ မျှဝေကူညီပေးနေကြောင်း အမေရိကန်အစိုးရက စွပ်စွဲခဲ့ပါ တယ်။ ဒါပေမယ့် အီရန်နိုင်ငံခြားရေးဝန်ကြီးဌာန ဒုတိယဝန်ကြီး  Ali Bagheri-Kani က " ဟူသီ လက်နက်ကိုင် အုပ်စုဟာ သူတို့ဆုံးဖြတ်ချက်အတိုင်း လုပ်ဆောင်နေတာပါ။  အမေရိကန် နဲ့ အစ္စရေးနိုင်ငံလိုမျိုး အင်အားကြီး နိုင်ငံအချို့ဟာ လက်နက်ကိုင်အဖွဲ့ရဲ့တိုက်ခိုက်မှုတွေကို ရင်ဆိုင်နေရတယ်။ ဒေသအတွင်းမှာ အမေရိကန်ဦးဆောင် တဲ့ မဟာမိတ်နိုင်ငံတွေရဲ့စစ်ရေးတောင့်တင်းမှုက မေးခွန်းထုတ်စရာဖြစ်လာခဲ့တယ်" လို့ ပြောပါတယ်။

အီရန်ဟာ ဂါဇာစစ်ပွဲနဲ့ပတ်သက်ပြီး အမေရိကန်၊ အစ္စရေးနိုင်ငံတို့ကို ဆန့်ကျင်ဝေဖန်ခဲ့ပြီး ဂါဇာစစ်ပွဲမှာ စစ်ရာဇဝတ်မှုတွေ ဆက်လက်ကျူးလွန်နေမယ်ဆိုရင် မြေထဲပင်လယ်ဒေသကို ပိတ်ပင်ပစ်မယ်လို့ သတိပေးခဲ့ပါတယ်။ အစ္စရေးဟာ ဟားမက်စ်လက်နက်ကိုင်အဖွဲ့ရဲ့တိုက်ခိုက်ခံရမှုတွေကြောင့် လက်တုံ့ပြန် တိုက်ခိုက်ခဲ့ရာ ဂါဇာဒေသမှာ လူပေါင်း နှစ်သောင်းကျော် သေဆုံးထားကြောင်း သိရပါတယ်။ ဟူသီလက်နက်ကိုင် အုပ်စုဟာ ပါလက်စတိုင်းပြည်သူတွေကို အားပေးထောက်ခံကြောင်းပြသဖို့ ပင်လယ်နီဒေသမှာ ကုန်စည်သင်္ဘော တွေကို ဆက်လက်တိုက်ခိုက်သွားမယ်လို့ သတိပေးချက်များ ထပ်မံထုတ်ပြန်ထားပါတယ်။