ကျော်(NSS) - ဒီဇင်ဘာ ၂၂

ကရင်ပြည်နယ်၊ ကော့ကရိတ်မြို့နယ်အတွင်းဖြစ်ပွားလျက်ရှိသည့်တိုက်ပွဲများကြောင့် ဘားအံခရိုင်အတွင်း၌ စစ်ဘေးရှောင်ပြည်သူ (၁၀၀၀၀)ကျော်ရောက်ရှိ ခိုလှုံလျက်ရှိကြောင်း KNU ဗဟို နှင့် ဘားအံမြို့အခြေစိုက်လူမှုကူညီရေးအသင်းများထံမှ သိရသည်။

ဘားအံခရိုင်အတွင်းရှိ နဘူးမြို့နယ်တွင်(၄၄၈၉) ဦး၊ ပိုင်ကျုံမြို့နယ်တွင်(၂၆၇၉)ဦး နှင့် ဒုံရင်းမြို့နယ်တွင် (၃၅၂၀) ဦး စုစုပေါင်း စစ်ဘေးရှောင်ပြည်သူ (၁၀၆၈၈) ဦးခိုလှုံနေထိုင်လျက်ရှိကြောင်း သိရသည်။

"အခု စစ်ဘေးရှောင်အရေအတွက်က ဒီဇင်ဘာလဝက် ကကောက်ထားတဲ့စာရင်းပါ။ ဒီအချိန်ဆိုရင် ထပ်တိုးလာဖို့ပဲရှိတယ်။ လျော့သွားဖို့ဆိုတာမရှိပါဘူး။ အခုစစ်ဘေးရှောင်တွေက ကော့ကရိတ်ဘက်ကပါ အဲဒီမှာတိုက်ပွဲတွေဖြစ်နေတာကြောင့် ဘားအံဘက်ကိုစစ်ဘေးရှောင်တွေအနေနဲ့ပြေးလာကြတာပါ"ဟု ဘားအံမြို့အခြေစိုက် လူမှုကူညီရေးအသင်းဝင်တစ်ဦးကပြော သည်။

အဆိုပါ စစ်ဘေးရှောင်ပြည်သူများအား ကရင်ဒုက္ခသည်များဆိုင်ရာကော်မတီ(C.I.D.K.P)ဗဟို နှင့် တာဝန်ရှိသူများကသွားရောက်တွေ့ဆုံ၍ အခြေခံစားသောက် ကုန်များနှင့်အသုံးအဆောင်ပစ္စည်းများကို ထောက်ပံ့ပေးခဲ့ကြကြောင်း သိရသည်။

"လတ်တလောအရေးပေါ်လိုအပ်တာတွေကို ထောက်ပံ့ပေးသွားတာပါ။ စစ်ဘေးရှောင်တွေထဲမှာ ကျန်းမာရေးမကောင်းတဲ့လူတွေလည်းပါတဲ့အတွက် ကျန်းမာရေးစောင့်ရှောက်မှုတွေလုပ်ပေးဖို့လည်း လိုအပ်ချက်တွေရှိနေတယ်။ လူမှုကူညီရေးအသင်းဝင်တွေက ကူညီပေးနေပေမယ့် တကယ့်အရေးပေါ်ကျန်းမာရေးအခြေအနေကြတော့ အခက်အခဲဖြစ်နိုင်တယ်"ဟု ဘားအံမြို့အခြေ စိုက်လူမှုကူညီရေးအသင်းဝင်တစ်ဦးက ပြောသည်။

C.I.D.K.P ဗဟိုမှ စစ်ဘေးရှောင်များအတွက် အခြေခံစားသောက်ကုန်များ နှင့် စောင်၊ ခြင်ထောင်၊ ခေါင်းအုံး၊အခင်းများ၊ ဆေးဝါးပစ္စည်းများ၊ အဝတ်အထည်များကို ထောက်ပံ့ပေးခဲ့ကြကြောင်း သိရသည်။

ထိုသို့ ထောက်ပံ့မှုများအပြင် ဘားအံမြို့နယ်အခြေစိုက်လူမှုကူညီရေးအသင်းများမှလည်း စစ်ဘေးရှောင်ပြည်သူများအတွက်လိုအပ်သည့် စားသောက်ကုန်များ၊အဝတ်အထည်များနှင့်အခြားလိုအပ်သည်များကို အလှူရှင်များနှင့်ပူးပေါင်းကာ လိုက်လံလှူဒါန်းပေးလျက်ရှိကြောင်း သိရသည်။

လက်ရှိအချိန်တွင် ကော့ရိတ်မြို့နယ်အတွင်း၌ လုံခြုံရေးအဖွဲ့များ နှင့် KNU ၊ PDF ပူးပေါင်းအဖွဲ့ကြား တိုက်ပွဲများဖြစ်ပွားလျက်ရှိသည်။